Fjárhagsáætlun 2025 og þriggja ára áætlun 2026-2028

Bæjarráð samþykkir að fela bæjarstjóra að boða til fundar með kjörnum fulltrúum í byrjun júní um vinnu við fjárhagsáætlun 2025 og þriggja ára áætlunar, 2026-2028. Því er jafnframt vísað til fastanefnda að ræða hugmyndir að verkefnum, framkvæmdum, áherslum, forgangsröðun og stefnu þeirra málaflokka sem undir þær heyra.

Hafnarstjóri fór yfir nýtt verklag varðandi gerð fjárhagsáætlunar, annars vegar eins árs áætlun og hins vegar þriggja ára áætlun. Þar sem því er vísað til fastanefnda að koma fram með hugmyndir að verkefnum og framkvæmdum sem undir þær heyra. Hafnarstjórn leggur áherslu á eftirtalin atriði varðandi Siglufjarðarhöfn: Hugsanlega færslu á tender bryggju, aðgangsstýringar á hafnarsvæði og aðstöðuhús fyrir upplýsingagjöf fyrir gesti skemmtiferðaskipa. Eftirtalin atriði varðandi Ólafsfjarðarhöfn: Hugsanleg færsla á flotbryggju og auknir nýtingarmöguleikar á hafnarsvæðinu til dæmis með tilliti til uppbyggingar á ferðaþjónustu. Hafnarstjórn kallar eftir starfshópi um hafnsækna starfsemi, líkt og kveðið er á um í málefnasamningi meirihlutans.

Fræðslu- og frístundanefnd leggst undir feld og kemur með tillögur á næsta fundi sínum.

Rætt var um ýmsar tillögur og ákvað nefndin að vera klár með áherslu og tillögur á næsta fundi sínum.

Fræðslu- og frístundanefnd fór yfir hugmyndir og tillögur hennar fyrir komandi fjárhagsáætlunargerð. Deildarstjóra fræðslu-, frístunda- og menningarnefndar falið að taka saman hugmyndir nefndarinnar og vísa til bæjarráðs.

Fræðslu- og frístundanefnd setti niður áherslur sínar við gerð fjárhagsáætlunar 2025 og þriggja ára áætlun.
Áherslum og tillögum nefndarinnar er vísað til bæjarráðs.

Markaðs- og menningarnefnd setti niður áherslur sínar við gerð fjárhagsáætlunar 2025 og þriggja ára áætlun. Áherslum og tillögum nefndarinnar er vísað til bæjarráðs.

Lagt fram til kynningar og vísað til ferkari vinnslu bæjarráðs í tengslum við fjárhagsáætlun 2025.

Bæjarráð þakkar nefndinni fyrir gagnlegar ábendingar. Vísað til gerðar fjárhagsáætlunar 2025.

Bæjarráð samþykkir að vísa fyrirliggjandi drögum að fjárhagsáætlun 2025 til úrvinnslu nefnda sveitarfélagsins. Bæjarráð beinir því til deildarstjóra og formanna nefnda að vinnu nefndanna verði lokið fyrir 22. nóvember og þeim skilað fyrir þann tíma til bæjarráðs.

Lögð fram tillaga að fjárhagsáætlun Félagsþjónustu Fjallabyggðar fyrir árið 2025. Félagsmálanefnd samþykkir fyrir sitt leyti framlagða tillögu.

Skarphéðinn Þórsson forstöðumaður íþróttamiðstöðvar, Ása Björk Stefánsdóttir skólastjóri grunnskóla og Kristín María Hlökk Karlsdóttir skólastjóri leikskóla sátu undir þessum dagskrárlið.
Fræðslu- og frístundanefnd samþykkir fyrirliggjandi tillögu að rammaáætlun fjárhagsáætlunar Fjallabyggðar fyrir árið 2025 fyrir sitt leyti.

Nefndin samþykkir fyrirliggjandi tillögu að rammaáætlun fjárhagsáætlunar Fjallabyggðar fyrir sitt leyti.

Markaðs- og menningarnefnd samþykkir fyrirliggjandi tillögu að rammaáætlun fjárhagsáætlunar Fjallabyggðar fyrir árið 2025 fyrir sitt leyti.

Hafnarstjórn samþykkir framlagða tillögu og vísar henni til afgreiðslu bæjarstjórnar.

Bæjarráð vísar fjárhagsáætlun og þriggja ára áætlun til fyrri umræðu í bæjarstjórn.

Bæjarstjórn samþykkir að vísa fyrirliggjandi tillögu að fjárhagsáætlun til síðari umræðu í bæjarstjórn. Á milli umræðna er áætlun vísað til frekari undirbúnings með fram komnum breytingatillögum til bæjarstjóra og deildarstjóra

Bæjarráð samþykkir að vísa fjárhagsáætlun 2025 og þriggja ára áætlun 2026-2028 til seinni umræðu bæjarstjórnar.

S. Guðrún Hauksdóttir forseti bæjarstjórnar lagði fram eftirfarandi bókun fyrir hönd bæjarstjórnar:
Á fundi bæjarráðs þann 6.12 síðastliðinn voru lagðar fram breytingartillögur á fjárhagsáætlun 2025-2028 fyrir seinni umræðu um áætlunina í bæjarstjórn. Bæjarráð samþykkti breytingar á fjárhagsætlun og áætluð rekstarniðurstaða A-hluta nú áætluð jákvæð um 12 milljónir og rekstrarniðurstaða B-hluta áætluð jákvæð um 35 milljónir. Rekstarniðurstaða samstæðu er því samtals áætluð jákvæð um rúmlega 47 milljónir.

Framlögð áætlun byggir á eftirfarandi meginforsendum:

• Útsvarsprósenta er óbreytt milli ára þ.e. 14,93%.


• Álagningarhlutföll fasteignaskatta breytast lítillega og verða eftirfarandi:
  
  
  
  • A -flokkur helst óbreyttur eða 0,46% af heildar fasteignamati
  
  
  • B-flokkur helst óbreyttur eða 1,32% af heildar fasteignamati
  
  
  • C-flokkur helst óbreyttur eða 1,57% af heildar fasteignamati
  
  
  • Lóðarleiga íbúðarhúsa, bifreiðageymslna og félagsheimila verður 1,8% af lóðarhlutamati
  
  
  • Sorphirðugjald íbúðarhúsnæðis (hverrar íbúðar) hækkar í 95.000 kr. vegna nýrra laga um sorphirðu.
  
  
  • Fráveitugjald lækkar og verður 0,27% af heilar fasteignamati
  
  
  • Vatnsgjald lækkar og verður 0,27% af heildar fasteignamati
  
  

Hvað varðar fasteignaskatta þá telur bæjarstjórn að það kerfi og sú umgjörð sem sveitarfélögum er ætlað að starfa eftir þegar kemur að innheimtu fasteignaskatta sé í raun orðið ósjálfbær og tímabært að heildarendurskoðun fari fram á innheimtu fasteignaskatta og tengingar þeirra við framlög til sveitarfélaga úr jöfnunarsjóði.

• Hækkun útsvarstekna er áætluð 6%


• Þjónustugjöld hækka um 3,5% fyrir fólk í viðkvæmri stöðu (sbr. Lífskjarasamninga) en að öðru leyti hækka gjaldskrár um 6 %.


• Afsláttur af fasteignaskatti hjá tekjulágum elli- og örorkulífeyrisþegum hækkar, og verður að hámarki kr. 100.000, ásamt því að tekjumörk fyrir afslætti hækka í samræmi við launavísitölu.


• Frístundastyrkur fyrir börn á aldrinum 4 - 18 ára hækkar í kr. 50.000 úr kr. 47.500


• Gert er ráð fyrir 6% hækkun á launum að jafnaði


• Hækkun útsvarstekna er áætluð 6%

Ljóst er að þrátt fyrir sterka fjárhagsstöðu sveitarfélagsins og til að tryggja að svo verði áfram, er tími til komin að staldra við og endurskoða þjónustuframboð og rekstur sveitarfélagsins, samhliða endurskoðun á samþykktum sveitarfélagsins. Íbúar sveitarfélagsins hafa notið þess undanfarin ár þegar kemur að gjaldskrá hækkunum að þeim hefur verið stillt í hóf. Fyrir árið 2025 þá hækka gjaldskrár fyrir viðkvæma hópa um 3,5% en að öðru leyti hækka gjaldskrár um 6%.

Hvað varðar framkvæmdir og viðhald eigna á komandi ári, er gert ráð fyrir að fjárfestingageta sveitarfélagsins nemi um 465 milljónum og verða þær fjármagnaðar með handbæru fé. Þrátt fyrir þetta þá útilokar bæjarstjórn ekki lántöku á árinu vegna þeirra fjölmörgu verkefna sem fyrir liggja. Fjárfestingaráætlanir síðustu ára hafa markast af því að erfitt hefur reynst að raungera stærri fjárfestingar sveitarfélagsins og því hefur reynst nauðsynlegt að færa ýmis verkefni á milli ára þar sem ekki hefur náðst að fullklára þau innan hvers árs. Því er svo komið að töluverð fjárfestingaþörf hefur safnast upp hjá sveitarfélaginu bæði af minni og stærri verkefnum.

Bæjarstjórn samþykkir að farið verði í eftirfarandi stærri framkvæmdir á árinu 2025:

• Endurnýjun þaks á Íþróttahúsinu við Tjarnarstíg


• Endurnýjun þaks á Sundlauginni við Hvanneyrarbraut


• Endurnýjun á tækni- og lagnarými Sundlaugarinnar við Hvanneyrarbraut


• Haldið áfram með uppbyggingu þjóðvegarins í gegnum Ólafsfjörð (II og III áfangar)


• Lagnir og yfirborðsfrágangur á Ránargötu frá Norðurgötu Siglufirði


• Tjaldstæðið í Ólafsfirði - endurskipulagning svæðisins og yfirborðsfrágangur


• Tjaldstæðamál á Siglufirði í samræmi við gildandi deiliskipulag.


• Áframhaldandi viðhald á Skálarhlíð


• Áframhaldandi uppbyggingu vatnsveitunnar í Ólafsfirði


• Ýmis smærri verkefni s.s. lóð Tjarnarborgar, viðlegukantar á Siglufirði, eftirlitskerfi fyrir vatnsveitu Fjallabyggðar og göngu og hjólastígar í báðum byggðakjörnum.

Í fjárhagsáætlun 2025 verður haldið áfram með áherslu á viðhald eigna sveitarfélagsins og er áætlað að kostnaður vegna viðhalds á árinu verði um 197,5 m. kr. Til samanburðar þá var gert ráð fyrir um 190 m.kr. á árinu 2024. Bæjarstjórn telur reyndar þarft í ljósi þess hve umfangsmikil mörg viðhaldsverkefni virðast vera orðinn að kanna hvort skynsamlegt sé að greina enn frekar á milli smærri og stærri viðhaldsverkefna. Þetta verklag myndi að öllum líkindum leiða til betri rekstrarniðurstöðu bæjarsjóðs þar sem hægt væri að beita útboðum og föstum samningum í enn meiri mæli við framkvæmd viðhaldsverkefna.

Þá finnst bæjarstjórn mikilvægt að árétta að ekki er enn þá búið að semja við kennara og býr sú staðreynd til óvissu m.t.t. fjárhagsáætlunar 2025. Að mati bæjarstjórnar verða kjarabætur umfram það sem samið hefur verið um á almennum vinnumarkaði ekki sóttar einvörðungu til sveitarfélaganna í landinu heldur þarf aðkomu ríkisvaldsins.

Að lokum vill forseti, fyrir hönd bæjarstjórnar, koma á framfæri þökkum til bæjarstjóra, nefndarmanna og starfsmanna sveitarfélagsins fyrir þeirra aðkomu að gerð fjárhagsáætlunar og ánægjulegs samstarfs og óskar íbúum Fjallabyggðar gleðilegra jóla og farsældar á nýju ári.

Samþykkt með 7 atkvæðum.

Helgi Jóhannsson og Þorgeir Bjarnason H-lista óska bókað:

Hér liggur fyrir bæjarstjórn að samþykkja fjárhagsáætlun fyrir árið 2025 og þriggja ára áætlun einnig. H-listinn hefur komið að gerð áætlunarinnar á vinnufundum bæjarstjórnar, bæjarráði og í nefndum. Fjárhagsstaða Fjallabyggðar er sterk og reiknað er með að ekki þurfi að koma til lántöku til fjárfestinga og viðhalds og er það vel. Hins vegar verður að segjast að mikil viðhaldsþörf og önnur þörf uppbygging m.a. í skólamálum og íþróttamálum bíður handan við hornið og á einhverjum tímapunkti gæti komið til þess að fara þurfi í lántökur því listinn er langur og lítið gengur á hann.
Það er áhyggjuefni að þær verklegu framkvæmdir sem fara á í hafa oft dregist og flust yfir á næsta ár og veldur því að minna er hægt að framkvæma á næsti ári. Ein leið til að sporna við þessu er að verk verði klár til útboðs á fyrstu þremur mánuðum ársins, sé þess nokkur kostur. Það eru þá auknar líkur á að hægt sé að standa við að skila framkvæmdum innan tímamarka.
Núverandi framkvæmdaáætlun er lögð fram af meirihlutanum en þarna eru verkefni sem allir geta verið sammála um að farið sé í en alltaf einhver sem minnihlutinn hefði viljað sjá ná fram að ganga. Þó eru nokkur verkefni sem reiknað var með að kæmu til framkvæmda á næsta ári og þar má nefna gervigrasvöll og viðbygging við grunnskólann í Ólafsfirði. Einnig er orðið nauðsynlegt að klára að taka ákvarðanir um fyrirkomulag sorpmála og þá aðallega rekstur gámasvæðana, ekki síst til að leita leiða að sorpgjöld haldi ekki áfram hækka ár frá ári umfram aðra þjónustu.
Miklar framkvæmdir hafa staðið yfir á skíðasvæðinu á Siglufirði s.l. mánuði og má segja að það hafi ekki verið reiknað með svo umfangsmiklum framkvæmdum eins og raunin varð en kostnaður er að nálgast 90 mkr. og skíðasvæðið að verða hið glæsilegasta. En það er ljóst að endurskoða þarf það fyrirkomulag sem nú er í gangi við Leyningsáss um rekstur skíðasvæðisins.
H listinn mun samþykkja fyrirliggjandi fjárhagsáætlun fyrir árið 2025.
Að lokum vill H listinn þakka öllum þeim sem komu að gerð fjárhagsáætlunarinnar fyrir þeirra vinnu .
Gleðileg jól og gleðilegt nýtt ár.