Fréttir

Fréttatilkynning frá hafnarstjóra: Samkvæmt veðurspá er gert ráð fyrir vaxandi norðanátt og vonskuveðri frá miðvikudegi til föstudags, einnig er gert ráð fyrir mikilli ölduhæð.

Þann 11. desember klukkan 19:30, munu nemendur Menntaskólans á Tröllaskaga stíga á stokk og ætla sér það verkefni að halda tónleika til styrktar Krabbameinsfélags Akureyrar og nágrennis. Alls eru það sex nemendur í áfanga sem heitir Skapandi tónlist og meðal flytjenda eru sigurvegarar söngkeppni framhaldsskólanna 2020.

Mikil hreinsun á hvers kyns plastrusli hefur farið fram í Héðinsfirði nú í haust og vetur. Það eru Siglfirðingarnir Ragnar Ragnarsson og Lísa Dombrowe sem hafa staðið í ströngu og lagt á sig óheyrilega mikið verk. Þarna er um að ræða hverskyns plastúrgang, frá uppþvottabrúsum til heilu og hálfu veiðarfæranna, fiskikassar og kör, kaðlar, bíldekk, trollkúlur og ótalmargt fleira. Allt hefur þetta mikla plastmagn borist utan af hafi undanfarna marga áratugi og virðist að mestu leyti vera tengt sjávarútvegi.

Fréttatilkynning frá forsvarsmönnum Jólakvöldsins í Ólafsfirði! Tekin hefur verið ákvörðun um að aflýsa árlegu Jólakvöldi sem halda átti föstudaginn 4. desember nk. Gera má ráð fyrir að fjöldatakmarkanir verði áfram í gildi eins og verið hefur sem gerir okkur erfitt fyrir að halda jólakvöldið eins og við mundum vilja gera. Þar ræður mestu að 10 manna fjöldatakmarkanir og tveggja metra regla inni í húsum á svæðinu gerir þetta mjög erfitt í framkvæmd. En við komum bara enn hressari að ári liðnu með jólakvöldið í Jólafsfirði.

194. fundur bæjarstjórnar Fjallabyggðar verður haldinn í Ráðhúsi Fjallabyggðar, Gránugötu 24, Siglufirði, 1. desember 2020 kl. 17.00

Hefðbundnum föstum viðburðum sem tengjast jólahátíðinni í Fjallabyggð líkt og tendrun jólaljósa jólatrjánna fyrstu helgina í aðventu og árlegum jólamarkaði í Tjarnarborg hefur verið aflýst vegna samkomutakmarkana. Yngri börn leik- og grunnskóla munu þó gera sér ferð að trjánum í desember og hengja á þau jólaskraut. Áramótabrennur og flugeldasýningar verða haldnar eins og venjulega sem og á þrettándanum.

Samtök sveitarfélaga og atvinnuþróunar á Norðausturlandi (SSNE) í samvinnu við fleiri, bjóða nú fyrirtækjum á sínu starfssvæði að taka þátt í Ratsjánni Ratsjáin er ákveðið verkfæri ætlað stjórnendum í ferðaþjónustu og tengdum greinum sem vilja auka nýsköpunarhæfni sína, hraða mikilvægum breytingaferlum og öðlast aukna yfirsýn og getu til að þróa vörur og þjónustu. Íslenski ferðaklasinn leiðir verkefnið í samstarfi við RATA og tengiliði frá landshlutasamtökum sveitarfélaga á Austurlandi, Norðurlandi eystra, Norðurlandi vestra, Vestfjörðum, Vesturlandi, Reykjanesi og Suðurlandi.

Stöðug fjölgun rafbíla á Íslandi kallar á nýjar áskoranir. Eigendur rafbíla þurfa að huga að drægni þeirra, búnaði, leyfismálum, öryggi og heimahleðslu - ekki síst í fjölbýlishúsum.

Fjallabyggð auglýsir eftir hentugu framtíðar húsnæði til kaups eða leigu á Siglufirði undir starfsemi félagsmiðstöðvarinnar NEON. Við val á húsnæði verður horft til eftirtalinna þátta: Að húsnæðið sé ekki minna en 220 fermetrar. Að húsnæðið uppfylli skilyrði um aðgengi fyrir hreyfihamlaða eða bjóði upp á breytingu á aðgengi. Að skipulag húsnæðisins og staðsetning sé með þeim hætti að það henti starfsemi félagsmiðstöðvarinnar.

Laugardaginn 28. nóvember kl. 14.00 opnar Aðalheiður S. Eysteinsdóttir sýningu í Kompunni, Alþýðuhúsinu á Siglufirði. Þetta er árlegur viðburður hjá Aðalheiði sem ávallt sýnir það nýjasta sem hún er að fást við í list sinni og hefur um leið opið í anddyrinu þar sem sjá má ýmis smáverk sem ratað gætu í jólapakka.