Fréttir

Í dag munu götukynnar Barnahjálpar Sameinuðu þjóðanna (UNICEF) heimsækja Ólafsfjörð og bjóða heimamönnum að gerast „heimsforeldrar“ eða styrktaraðilar UNICEF. Heimsforeldrar eru hópur einstaklinga sem styrkja starf UNICEF til hjálpar börnum í þróunarlöndunum með mánaðarlegu framlagi og eru íslenskir heimsforeldrar hvorki fleiri né færri en 14 þúsund.

Sigurbjörgin  landaði í gær á Siglufirði afla úr Barentshafi. Verðmæti aflans var um 172 milljónir króna, sem ku vera mesta aflaverðmæti skipsins í einni veiðiferð til þessa. Hásetahluturinn er ríflega 1,7 milljónir króna.

Borið hefur á fyrirspurnum um hvort mögulegt væri að nálgast fleiri póstkort með viðburðardagskrá Fjallabyggðar. Áhugasamir geta sótt sér fleiri póstkort á skrifstofur sveitarfélagsins. Kortin kosta ekkert.

Á morgun mun Sigmar B. Hauksson framkvæmdastjóri verkefnisins „Siglufjörður, miðstöð skútusiglinga í Norður Atlantshafi" vera við kvikmyndatökur á Siglufirði ásamt kvikmyndaliði. Verið er að vinna að auglýsingu fyrir væntanlega alþjóðlega skútusiglingakeppni sem halda á Jónsmessunni 2009.

Skarðsganga Þjóðlagahátíðar og Ferðafélags Siglufjarðar verður miðvikudaginn 2. Júlí. Mæting er á Ráðhústorgið á Siglufirði kl. 13.00. Gengið þaðan upp Hafnarfjall í u.þ.b. 500 mtr. hæð fyrir ofan bæinn.