Skipulags- og umhverfisnefnd Fjallabyggðar

Lögð fram breyting á Aðalskipulagi Fjallabyggðar dags. 25.3.2024. Breytingin er unnin samhliða breytingu deiliskipulags Flæða þar sem gert er ráð fyrir raðhúsi á svæði sem í dag er skilgreint sem opið svæði (323 OP). Opið svæði minnkar um 0.3 ha og íbúðarsvæði (320 ÍB) stækkar sem því nemur.

Lögð fram breyting á deiliskipulagi Flæða dagsett 5.4.2024. Sú breyting er gerð að í stað fjögurra lóða fyrir einbýlishús við Ægisbyggð 7 og Mararbyggð 14, 16 og 18, verða á svæðinu þrjár lóðir fyrir parhús á einni hæð ásamt sambyggðum bílgeymslum. Einnig er bætt við lóð fyrir fimm íbúða raðhús ásamt sambyggðum bílgeymslum á óbyggðu svæði/útivistarsvæði sunnan raðhúsalóða við Bylgjubyggð 13-25 og 27-35. Með breytingu á deiliskipulagi er verið að bjóða upp á fjölbreyttari húsagerðir á svæðinu en gert er ráð fyrir í gildandi deiliskipulagi, þar sem aðeins er gert ráð fyrir einbýlishúsum á nýjum lóðum á svæðinu.

Lögð fram tillaga að nýju deiliskipulagi við Hrannar- og Bylgjubyggð 2. Tillagan samanstendur af uppdrætti dags. 4.4.2024 og greinargerð dags. 5.4.2024. Tilgangur deiliskipulagsins er að ná óbyggðum svæðum inn í skipulag, skilgreina nýjar lóðir með skilmálum fyrir nýbyggingar. Markmiðið er að halda í heildrænt yfirbragð byggðarinnar á svæðinu þannig að nýbyggingar verði hluti af núverandi heild.

Lögð fram tillaga að breytingu Aðalskipulags Fjallabyggðar við Námuveg 8 í Ólafsfirði, dags. 25.3.2024. Landnotkunarreitur 302 AT minnkar um 0,5 ha og nýr landnotkunarreitur verslunar og þjónustu við Námuveg 8 verður til (329 VÞ). Skipulagsákvæði sett í samræmi við fyrirhugaða nýtingu húsnæðis við Námuveg 8.

Lögð fram tillaga að óverulegri breytingu deiliskipulags þjóðvegarins við Aðalgötu/Múlaveg í Ólafsfirði, dags. 9.4.2024. Á breytingaruppdrættinum eru listaðar upp þær breytingar sem lagðar eru til.

Lögð fram umsókn frá Byggingarfélaginu Berg ehf. þar sem sótt er um breytingu á deiliskipulagi Þormóðseyrar fyrir lóðina Norðurgötu 16. Breytingin felur í sér stækkun á byggingarreit og lagfæringu lóðarmarka til samræmis við lóðarleigusamning.

Lögð fram umsókn um byggingarleyfi við Bakkabyggð 10 í Ólafsfirði ásamt fylgigögnum.

Lögð fram til samþykktar merkjalýsing fyrir nýja lóð við Skarðsveg 1 sem er í samræmi við gildandi deiliskipulag lóða undir smáhýsi í Skarðsdal.

Lögð fram til samþykktar merkjalýsing fyrir nýja lóð við Bakkabyggð 10, sem er í samræmi við gildandi deiliskipulag Flæða í Ólafsfirði.

Lögð fram bókun félagsmálanefndar frá 8.4.2024 þar sem óskað er eftir því að lóðirnar að Gránugötu 8, Gránugötu 12 og Hvanneyrarbraut 27 á Siglufirði verði teknar frá fyrir uppbyggingu búsetuúrræða fyrir fatlað fólk en ekki liggur fyrir hvaða lóð eða lóðir verða fyrir valinu á þessu stigi málsins. Einnig er óskað eftir því að undirbúningur verði hafinn fyrir deiliskipulag væntalegrar starfsemi búsetuþjónustu fatlaðs fólks með þessar lóðir í huga. Gert er ráð fyrir byggingarmagni sem nemur 5-6 íbúðum.

Lögð fram breyting á lóðarmörkum Snorragötu 4A vegna staðsetningar stofnlagnar vatnsveitu á lóðinni.

Lagt fram erindi Icelandic Eider ehf., leigutaka dúntekju á Leirutanga, þar sem óskað er eftir því að endurnýja leyfi til vargeyðingar á Leirutanga. Sérstakt leyfi var gefið út fyrir framkvæmdarstjóra Icelandic Eider ehf, Árna Rúnar Örvarsson, til vargeyðingar þar árið 2023 en endurnýja þarf leyfið árlega. Einnig vill Icelandic Eider ehf. koma því áleiðis að vargeyðingu hefur verið afar ábótavant þá mánuði sem ekki er varptími æðarfugls, bæði á Siglufirði og í Ólafsfirði og vonar undirritaður að það standi til bóta.

Á síðasta fundi skipulags- og umhverfisnefndar var kallað eftir frekari upplýsingum um fyrirætlanir málsaðila sem sendi inn fyrirspurn um lóðina Hvanneyrarbraut 70. Svar barst í tölvupósti þann 26.3.2024 þar sem lýst var yfir áhuga á að byggja á lóðinni hús og bílskúr í svipuðum stíl og það sem stendur við Hvanneyrarbraut 66.

Fulltrúar SSNE mættu á fundinn í gegnum fjarfundarbúnað og kynntu málefni loftslagsstefnu sem sveitarfélögum er skylt að setja skv. lögum nr.70/2012 um loftslagsmál.

Lagt fram erindi Haraldar S. Magnússonar f.h. Orku Náttúrunnar þar sem óskað er eftir samstarfi við uppbyggingu hleðsluinnviða fyrir rafbíla í Fjallabyggð.

Lögð fram til kynningar úrskurður Úrskurðarnefndar umhverfis- og auðlindamála vegna kæru framkvæmda á lóð nr. 24 við Lindargötu á Siglufirði.