Fréttir

Í dag eru tímamót á bæjarskrifstofunni þegar hún Biddý okkar, Brynhildur Baldursdóttir, lýkur sinni síðustu vakt eftir langan starfsferil sem spannar rúm 43 ár. Biddý hóf störf hjá Siglufjarðarkaupstað 1. janúar 1980 og hefur upplifað tímana tvenna og nokkur tímamót í sögu bæði Siglufjarðar og sameinuðu sveitarfélagi Fjallabyggð. Biddý hefur meðal annars unnið með 11 bæjarstjórum og verið ein af okkar dýrmætustu starfsmönnum, þjónað bæjarbúum af samviskusemi og dugnaði. Síðasti starfsdagur hennar er í dag 26. maí.

Mikið hefur borið á því að fólk sé að keyra inn á flugbrautina eða sleppa þar hundum sínum lausum. Flugbrautin er opin lendingarstaður og er því ítrekað að öll óviðkomandi umferð á flugvellinum er bönnuð

Tilkynning ! Yfirvofandi er vinnustöðvun félagsmanna Kjalar í íþróttamiðstöðvum Fjallabyggðar. Vinnustöðvun mun vara dagana 27.-29. maí ef kjarasamningar BSRB við Samninganefnd sveitarfélaga nást ekki fyrir þann tíma. Af þessum sökum verður lokað í íþróttamiðstöðvum Fjallabyggðar laugardaginn 27. maí og hvítasunnudag 28. maí. Mánudaginn 29. maí, annan í hvítasunnu er íþróttamiðstöðin á Siglufirði opin kl. 10:00-14:00, en lokað í íþróttamiðstöðinni á Ólafsfirði.

Markaðs- og menningarfulltrúi Fjallabyggðar, Linda Lea Bogadóttir leit við í Alþýðuhúsinu og færði Aðalheiði blóm og hamingjuóskir með verðskuldaða viðurkenningu og þakkir fyrir hið gríðarlega mikla og góða starf sem hún hefur gefið til samfélagsins á síðastliðnum áratug.

Orðsending frá Fjallabyggðarhöfnum til þeirra sem eiga veiðarfæri, bátavagna, ker og eða aðra lausamuni á hafnarsvæðum

Bæjarstjóri / Hafnarstjóri Fjallabyggðar Sigríður Ingvarsdóttir hitti á rölti sínu um hafnarbryggjuna í morgunsárið hinn 18 ára nýstúdent, Jón Grétar Guðjónsson sem einnig hefur nýlokið skipstjórnarréttindum. Jón Grétar var á fullu að landa úr Oddverja SI en hann er á strandveiðum þessa dagana. Einn línubátur var einnig við bryggju, einn af þeim sem kemur til löndunar á Siglufirði á hverju vori. Voru sjómenn að vonum ánægðir með aflabrögð. Gaman er að segja frá því að nýverið var sett upp skemmtilegt skilti á bryggjuna á Siglufirði sem sýnir fjarlægðir til hinna ýmsu borga og staða í heiminum.

Tilkynning frá Íþróttamiðstöð Fjallabyggðar! Heiti pottur sundhallarinnar á Siglufirði verður lokaður vegna viðhalds frá deginum í dag 22. maí í nokkra daga. Tilkynnt verður þegar potturinn verður opnaður á ný. Íþróttamiðstöð Fjallabyggðar.

Daganna 16. til 19. maí 2023 var haldin atkvæðagreiðsla meðal félagsmanna Kjalar um boðun verkfalls hjá Fjallabyggð. Niðurstaðan varð sú að 61 samþykktu verkfallsboðun af alls 70 greiddum atkvæðum. Þannig samþykktu 87,14 % félagsmanna verkfallsboðun. Þátttakan var 58,82 % eða 70 af alls 119 sem voru á kjörskrá.

Opið hús vegna kynningar á skipulagstillögunum fer fram á tæknideild í Ráðhúsi Fjallabyggðar, Gránugötu 24, mánudaginn 22. maí milli kl. 12:00 og 14:00. Opið hús fer fram í samræmi við gr. 4.6.1. og 5.6.1. í skipulagsreglugerð nr. 90/2013 og mun skipulagsfulltrúi veita upplýsingar um skipulagstillöguna og taka við ábendingum.

Innleiðing fjórða ílátsins við heimili Allir íbúar Fjallabyggðar eiga nú að hafa fengið afhent fjórða ílátið fyrir úrgang þ.e. plast og flokka því í fjóra flokka við heimili, þ.e. almennt sorp, pappa og pappír, plast og lífrænan úrgang. Búið er að setja viðeigandi merkingar á ílátin.