Bæjarráð Fjallabyggðar

Tekin fyrir beiðni Hollvinafélags Kvíabekkjarkirkju þar sem óskað er eftir föstu fjárframlagi frá Fjallabyggð næstu þrjú árin til uppbyggingar og endurbóta á Kvíabekkjarkirkju. Bæjarráð óskaði eftir því að fá forsvarsmenn félagsins á sinn fund til að fara yfir verkefnið og mögulega aðkomu sveitarfélagsins.

Lögð fram umsókn L-7 ehf. um raðhúsalóðina Eyrarflöt 22-28 sem auglýst var laus til umsóknar frá 8. - 20.janúar sl. Umsögn skipulags- og umhverfisnefndar einnig lögð fram.

Á 820. fundi bæjarráðs óskaði deildarstjóri tæknideildar eftir heimild bæjarráðs til þess að halda útboð vegna verkefnisins. Á fundinum óskaði bæjarráð eftir umsögn tæknideildar um áhrif þeirra tillagna sem bókað var um á 308. fundi skipulags- og umhverfisnefndar, sem ekki krefjast nýs samráðs á heildarkostnað verkefnisins og áætlaðan verktíma þess. Útboðsgögn fyrir síðasta áfanga á endurnýjun Aðalgötu á Siglufirði og jafnframt fyrsta áfanga í nýju skipulagi miðbæjarins á Siglufirði voru lögð fram að nýju.

Á fundi fræðslu- og frístundanefndar, 12. febrúar 2024, fór stjórnendateymi Leikskóla Fjallabyggðar yfir hvernig til hefur tekist með stjórnun leikskólans en tilraunaverkefni var sett á laggirnar til eins árs þar sem skólastjóri hefur þrjá deildarstjóra með sér í stjórnunarteymi. Fræðslu- og frístundanefnd leggur til við bæjarráð að tilraunaverkefnið verði framlengt og sama stjórnunarteymi stýri leikskólanum á næsta skólaári.

Tekið fyrir bréf frá Persónuvernd, dagsett þann 11. janúar sl, þar sem vísað er til ákvarðana Persónuverndar frá 6. desember sl. vegna úttekta á notkun fimm sveitarfélaga á nemendakerfi Google, Google Workspace frá Education, í grunnskólastarfi. Í ljósi þess að fjöldi grunnskóla notast við Google-nemendakerfið telur Persónuvernd þörf á að vekja athygli allra sveitarfélaga á ákvörðunum. Persónuvernd beinir því til sveitarfélaga sem nota umrætt kerfi að meta hvort þörf er á að gera viðeigandi úrbætur á vinnslu persónuupplýsinga í kerfinu.

Bæjarstjóri fór yfir og gerði grein fyrir þeim framkvæmdum sem hófust á árinu 2023.

Lagt fram minnisblað deildarstjóra stjórnsýslu og fjármáladeildar, félagsmáladeildar og fræðslu-, frístunda- og menningarmáladeildar þar sem óskað er eftir fjárveitingarheimild til þess að hefja innleiðingu kerfiseininga fyrir skólaþjónustu, félagsþjónustu ásamt öðrum minni háttar kerfiseiningum og uppfærslum á OneCRM málakerfi stjórnsýslunnar.

Á 819. fundi bæjarráðs var bæjarstjóra falið að leita tilboða og verkáætlana hjá áhugasömum aðilum í tengslum við stjórnsýslu- og rekstrarúttekt. Tilboðin lögð fram.

Bæjarráð felur tæknideild að greina hvaða opin svæði í sveitarfélaginu séu hentug fyrir umhirðu með sláttuþjörkum. Þá er deildinni einnig falið að kanna hvers konar þjarkar séu hentugir fyrir umhirðu opinna svæða, leita tilboða og leggja fyrir bæjarráð hið fyrsta.

Lögð fram ársskýrsla Slökkviliðs Fjallabyggðar 2023.

Mennta-og barnamálaráðuneyti hefur nú undanfarið beint sjónum sínum að málefnum tónlistarfræðslunnar. Hafin er ákveðin undirbúningsvinna vegna stefnumörkunar og heildarendurskoðunar á tónlistarfræðslu á öllum skólastigum meðal annars í samræmi við sáttmála um ríkisstjórnarsamstarf og í tengslum við Menntastefnu til 2030.
Sem lið í undirbúningsvinnunni hefur ráðuneytið ákveðið að framkvæma úttekt á starfsemi tónlistarskóla sem viðurkenndir hafa verið samkvæmt 1.gr. laga nr. 75/1985 um fjárhagslegan stuðning við tónlistarskóla.
Markmið með úttektinni er að safna gögnum sem þannig koma til með að styðja viðkomandi starf.
Úttektin er þannig mikilvægur hluti af undirbúningi að stefnumótun ráðuneytisins um listmenntun, sem og endurskoðun á aðalnámskrá tónlistarskóla en einnig almennu eftirlitshlutverki þess.
Úttektin felur meðal annars í sér að utanaðkomandi aðili leggur mat á starfsemi tónlistarskóla með hliðsjón af gildandi lögum og aðalnámskrá og könnun þátta svo sem stjórnun, innra starf, aðstaða, samskipti innan skóla og við aðila utan skólans, þjónusta við nemendur og starfsfólk og umbætur í skólastarfi.
Verður það m.a. gert með því að skoða fyrirliggjandi gögn um starfsemi skóla, útsendum spurningalistum, heimsóknum úttektaraðila og viðtölum við nemendur, starfsfólk skóla og foreldra. Úttektirnar eru gerðar í samræmi við aðalnámskrá tónlistarskóla og ákvæði 12.gr. laganr.75/1985 um fjárhagslegan stuðning við tónlistarskóla. Framkvæmdin er með þeim hætti að sendir verða spurningalistar til allra skólastjórnenda en heimsóttir verða tíu skólar. Umsjón og ábyrgð á framkvæmd úttektarinnar er í höndum ráðgjafafyrirtækisins Arcur.
Gert er ráð fyrir að úttektin fari fram á tímabilinu febrúar til apríl nk. og að fyrstu niðurstöður liggi fyrir í maí 2024.

Líkt og undanfarin ár hefur Byggðastofnun fengið Orkustofnun til að reikna út kostnað á ársgrundvelli, við raforkunotkun og húshitun á sömu fasteigninni, á flestum þéttbýlisstöðum og í dreifbýli.
Nú er komin út skýrsla um orkukostnað heimila m.v. gjaldskrár 1. september 2023. Alls eru 91 byggðakjarni í greiningunni og ná tölur fyrir þá aftur til ársins 2014. Samhliða skýrslunni kemur út mælaborð þar sem hægt er að skoða orkukostnað í byggðakjörnum á Íslandskorti, skoða raforku- og húshitunarkostnað sér og bæta við útreikningi fyrir varmadælu fyrir staði með beina rafhitun.

Fjármála- og efnahagsráðherra hefur fyrir hönd íslenska ríkisins afhent óbyggðanefnd kröfur um þjóðlendur á svæði 12 sem nefnist "eyjar og sker" og tekur til landsvæða innan landhelginnar en utan meginlandsins. Um er að ræða sautjánda og síðasta svæðið sem óbyggðanefnd tekur til meðferðar. Hér á eftir fara upplýsingar um kröfugerð íslenska ríkisins og málsmeðferð.
Óbyggðanefnd kallar nú eftir kröfum þeirra sem kunna að eiga öndverðra hagsmuna að gæta. Kröfum skal lýst skriflega í síðasta lagi 15. maí 2024. Að lokinni gagnaöflun og rannsókn á eignarréttarlegri stöðu svæðanna úrskurðar óbyggðanefnd um framkomnar kröfur.

Flugklasann Air 66N boðar til kynningarfunda á Teams fyrir alla kjörna fulltrúa sveitarfélaga á Norðurlandi og fulltrúa SSNV og SSNE til þess að hefja vinnu við framtíðarsýn í málefnum Flugklasans. Fundirnir eru hugsaðir sem tækifæri til að fara yfir hvað hefur verið gert og opna umræðuna um hvað verður gert í framtíðinni.

Lagt fram erindi frá skrifstofu landbúnaðar í Matvælaráðuneytinu þar sem ráðuneytið vill koma á framfæri sjónarmiðum ráðuneytisins í málinu og benda á nokkur atriði sem þau geti hugsanlega gert til að skýra stöðuna á sínu svæði. Samantektin er eingöngu upplýsingar og ábendingar sem vonast er til að komi að gagni.

Eimur, Samtök sveitarfélaga og atvinnuþróunar á Norðurlandi eystra (SSNE) og Íslensk Nýorka halda málstofu í Hofi og í streymi 21. febrúar.
Fjallað verður um stöðu mála í orkuskiptum á Norðurlandi, olíunotkun svæðisins verður kynnt ásamt sérstakri umfjöllun um orkuskipti í þungaflutningum og við hafnir.
Fulltrúar frá Orkustofnun og Umhverfis-, orku- og loftslagsráðuneyti munu flytja erindi.

Lögð fram umsagnarbeiðni frá allsherjar- og menntamálanefnd Alþingis, dags. 13. febrúar 2024, þar sem sent er til umsagnar 112. mál, frumvarp til laga um breytingu á barnalögum, nr. 76/2003 (greiðsla meðlags). Þess er óskað að undirrituð umsögn berist eigi síðar en 27. febrúar nk.

Fundargerð 60. fundar stjórnar SSNE lögð fram til kynningar.

Þann 9. febrúar 2024 var haldinn aukaaðalfundur í einkahlutafélaginu Leigufélagið Bríet ehf. Fundurinn fór fram í húsnæði Húsnæðis- og mannvirkjastofnunar að Borgartúni 21 í Reykjavík. Fundargerð lögð fram til kynningar ásamt uppfærðum samþykktum félagsins.

Fundargerðir 308. fundar skipulags- og umhverfisnefndar og 136. fundar fræðslu- og frístundanefndar lagðr fram til kynningar.