Skipulags- og umhverfisnefnd Fjallabyggðar

Lögð fram umsókn L-7 ehf. dagsett 6. september 2023, þar sem óskað er eftir stækkun lóðar fyrirtækisins við Vesturtanga 1-5 um 10 metra til austurs í samræmi við meðfylgjandi mynd.

Lögð fram tillaga að deiliskipulagi fyrir brimbrettaaðstöðu við Brimnestungu unnin af Basalt arkitektum ásamt breytingu á aðalskipulagi sem unnin er samhliða af Lilium teiknistofu. Tillögurnar voru kynntar fyrir opnu húsi á tæknideild sveitarfélagsins þann 7.september sl. skv. 3.mgr. 40.gr skipulagslaga nr.123/2010.

Lögð fram tillaga að deiliskipulagi suðurbæjar Siglufjarðar unnin af Yrki arkitektum. Gunnar Ágústsson hjá Yrki arkitektum fór yfir tillöguna í gegnum fjarfundarbúnað.

Tillaga að breytingu á Aðalskipulagi Fjallabyggðar 2020-2032 vegna afmörkunar kirkjugarðsins á Saurbæjarási var auglýst með athugasemdafrest frá 11. ágúst til 28. september 2023. Fimm umsagnir bárust vegna tillögunnar. Náttúrufræðistofnun Íslands sendi inn sameiginlega umsögn fyrir aðalskipulags- og deiliskipulagstillöguna.

Umsagnir bárust einnig frá Sóknarnefnd Siglufjarðarkirkju, Heilbrigðiseftirliti Norðurlands vestra, Minjastofnun Íslands og Vegagerðinni sem gerðu engar athugasemdir við tillöguna.

Tillaga að deiliskipulagi kirkjugarðs við Saurbæjarás var auglýst með athugasemdafrest frá 11. ágúst til 28. september 2023. Fimm umsagnir bárust vegna tillögunnar. Náttúrufræðistofnun Íslands sendi inn sameiginlega umsögn fyrir aðalskipulags- og deiliskipulagstillöguna. Þar kemur m.a fram að ekki virðist hafa verið lagt mat á áhrif skipulagsins á fuglalíf, en að skipulagssvæðið sé ekki mjög stórt þannig að rask á varplöndum mófugla verður tæplega mikið en aukin umferð fólks gæti haft fælandi áhrif á einhverjar tegundir. Lagt er til að notast sé við trjátegundir sem vaxa vel með náttúrulegum gróðri og mynda ekki of mikið skuggavarp. Huga skal að því við framkvæmdir að flutningur á jarðefni út af svæðinu geti aukið útbreiðslu lúpínu inn á ný svæði.

Í umsögn Vegagerðarinnar var bent á að merking veghelgunarsvæðis Vegagerðarinnar vantaði á deiliskipulagsuppdráttinn. Minjastofnun benti á í umsögn sinni að gera þurfi ráð fyrir 15 metra friðhelgi við minjar og að laga þurfi kafla í greinargerð um fornminjar.

Umsagnir bárust einnig frá Sóknarnefnd Siglufjarðarkirkju og Kirkjugarðaráði sem gerðu ekki athugasemdir við tillöguna.

Lagður fram uppfærður deiliskipulagsuppdráttur ásamt greinargerð þar sem búið er að setja inn veghelgunarmörk, aðlaga uppdrátt að skráðum fornminjum og bæta við texta í greinargerð undir kafla um fornminjar og gróður.

Lögð fram umsókn um byggingarheimild dagsett 20. september 2023 þar sem Bjarni Þór Einarsson sækir um byggingarheimild f.h. Sveinu Guðbjargar Ragnarsdóttur. Sótt er um heimild til að byggja 25,3 fm viðbyggingu norðan við íbúðarhúsið á Garði 2A í Ólafsfirði þar sem áður stóð geymsla. Einnig lagðir fram aðal- og séruppdrættir ásamt skráningartöflu og starfsábyrgðartryggingu hönnuða.

Lögð fram umsókn um byggingarheimild dagsett 29. september 2023 þar sem Kristján Eldjárn Hjartarson sækir um byggingarheimild f.h. Jóhanns Júlíusar Jóhannssonar. Sótt er um heimild til að byggja 53,5 fm frístundahús á gömlum grunni við Litla-Lón í Ólafsfirði. Einnig lagðir fram aðaluppdrættir ásamt skráningartöflu.

Lögð fram umsókn dagsett 25.september 2023 þar sem Hafþór Máni Baldursson sækir um lóð nr. 10 við Bakkabyggð. Um lóðina gilda skilmálar deiliskipulags Flæða frá 2013 m.s.br.

Lögð fram umsókn dagsett 1. október 2023 þar sem Guðný Hallsdóttir sækir um lóð nr. 18 við Bakkabyggð. Um lóðina gilda skilmálar deiliskipulags Flæða frá 2013 m.s.br.

Lögð fram umsókn dagsett 19.september 2023 þar sem Finnur Ingi Sölvason sækir um lóð nr. 87 við Suðurgötu. Unnið er að deiliskipulagi lóðarinnar undir deiliskipulagi suðurbæjar Siglufjarðar.

Með umsókn dagsettri 28. september 2023 sækir Bjarni Már Bjarnason f.h. Vorhúss ehf. eftir endurnýjun lóðarleigusamnings við Suðurgötu 55 á Siglufirði. Einnig lagt fram lóðarblað tæknideildar dags. 28.9.2023.

Með umsókn dagsettri 28. september 2023 sækir Bjarni Már Bjarnason f.h. Vorhúss ehf. eftir endurnýjun lóðarleigusamnings við Eyrargötu 3 á Siglufirði. Einnig lagt fram lóðarblað tæknideildar dags. 28.9.2023.

Með umsókn dagsettri 28. september 2023 sækir Bjarni Már Bjarnason f.h. Vorhúss ehf. eftir endurnýjun lóðarleigusamnings við Eyrargötu 18 á Siglufirði. Einnig lagt fram lóðarblað tæknideildar dags. 28.9.2023.

Með umsókn dagsettri 18. september 2023 sækir Fríða Jónasdóttir um endurnýjun á lóðarleigusamning Hávegar 37 með stækkun lóðarinnar til suðurs í huga. Einnig lögð fram mynd af fyrirhugaðri stækkun.

Á síðasta fundi nefndarinnar var tæknideild falið að vinna tillögu fyrir næsta fund að fegrun og mótun svæðisins norðan við Túngötu 40 sem felur í sér skýrari mörk á milli almenningssvæðis og lóðarinnar að Túngötu 40. Nefndin óskaði einnig eftir kostnaðaráætlun fyrir gerð fjárhagsáætlunar 2024.

Lögð fram tillaga tæknideildar að fegrun og mótun svæðisins ásamt kostnaðaráætlun.

Á fundi bæjarstjórnar þann 13. september sl. var samþykkt að fela skipulags- og umhverfisnefnd að leiða heildarendurskoðun reglna um úthlutun lóða í Fjallabyggð sem samþykktar voru af bæjarstjórn Fjallabyggðar í janúar 2020.

Lagt fram erindi Skotfélags Ólafsfjarðar þar sem óskað er eftir leyfi Fjallabyggðar til að geyma gám félagsins norðan við Námuveg 11 yfir vetrartímann svo hægt sé að komast í rafmagn og halda hita á gámnum. Ekkert rafmagn er á gámasvæðinu þar sem hann hefur verið geymdur á veturna hingað til.

Bæjarráð vísaði útboðsgögnum fyrir snjómokstur og hálkuvarnir og forsendum þeirra til umsagnar skipulags- og umhverfisnefndar á fundi sínum 15. september sl.

Lagt fram erindi Birkis Inga Símonarsonar f.h. Barðsmanna ehf. þar sem óskað er eftir leyfi til að moka upp efni í Fjarðará til að fyrirbyggja skemmdir á golfvelli og umhverfi hans. Fyrir liggur að moka þurfi upp efni í kringum eyju (holu 7) auk svæðis við hliðina á braut 8 sem liggur meðfram Fjarðaránni til norðurs. Efnistakan yrði unnin í apríl 2024 þegar frost er enn í jörðu til að raska sem minnst umhverfi golfvallar.

Lagt fram erindi landeiganda Víkur í Héðinsfirði þar sem óskað er eftir leyfi fyrir breyttri tilhögun áður samþykktrar verkframkvæmdar á bakkavörn við veiðihús á Sandvöllum sem unnin er í samstarfi við Landgræðsluna. Breytingin felur í sér í megindráttum að í stað þess að nota staura í bakkavörnina, verður notast við efni úr fjöruborði Héðinsfjarðar. Er það mat landeigenda að betur færi á því ef notað yrði efni á staðnum sem falli betur að landslagi og sé jafnvel betur fallið til þess að verja bakka Sandvalla.

Með erindi dagsettu 1. október 2023 óskar Þorvaldur Hreinsson f.h. Veiðifélags Ólafsfjarðar eftir heimild til að fara í bakkavörn nr. 6 skv. meðfylgjandi loftmynd unna af Sigurjóni Einarssyni f.h. Landgræðslunnar. Bakkavörnina þarf að setja vegna mikils landbrots á staðnum. Einnig er óskað eftir heimild til að taka 5250 m3 úr eyrum ofan Hrúthólshyls í Fjarðará Ólafsfirði. Megnið af efninu færi í ofangreinda bakkavörn og einnig til að bæta staði fyrir hrygningu og uppeldi seyða.

Á árunum 2003-2007 voru reistir snjóflóðavarnargarðar ofan við byggðina á Siglufirði. Um var að ræða 5 leiðigarða sem náðu nánast endanna á milli í bænum auk eins leiðigarðs nyrst í bænum. Á árunum eftir að garðarnir voru fullgerðir tóku að berast kvartanir frá íbúum víðsvegar um bæinn þar sem kvartað var yfir að bleyta væri í lóðum eða leki í húsum, sem ekki átti að hafa verið þar áður. Fjallabyggð fékk EFLU verkfræðistofu til að skoða hvert einstakt tilfelli og hvort rekja mætti það til áhrifa frá varnargörðunum og var skýrslu þar um skilað í ársbyrjun 2016.
Síðan þá hafa sveitarfélaginu af og til borist kvartanir af svipuðum toga núna síðast á þessu og síðasta ári. EFLA verkfræðistofa var fengin til að skoða þessi síðustu mál og vann minnisblað útfrá vettvangsskoðun sem farið var í þann 24.júlí sl.

Eftirfarandi lóðir voru skoðaðar og metið hvort rekja mætti bleytu í lóðum til snjóflóðavarnargarða ofan byggðarinnar:
* Fossvegur 9
* Fossvegur 11
* Fossvegur 13
* Fossvegur 15
* Fossvegur 31
* Hafnartún 6
* Síldarminjasafnið (Bátahúsið)

Lagt fram til kynningar bréf frá stjórn Skógræktarfélags Íslands með ályktun sem samþykkt var á aðalfundi félagsins nýverið. Þar eru sveitarfélög m.a. hvött til að huga sérstaklega að verndun og varðveislu skógarreita, trjálunda og grænna svæða innan byggðar og í næsta nágrenni.

Lögð fram til kynningar 1. áfangi fornleifaskráningar sem unnin var skv. samkomulagi milli Fjallabyggðar og Minjastofnunar um frágang fornleifaskráningar innan sveitarfélagsins.