Skipulags- og umhverfisnefnd Fjallabyggðar

Bæjarstjórn Fjallabyggðar hefur auglýst tillögu að nýju Aðalskipulagi Fjallabyggðar 2008-2028 ásamt umhverfisskýrslu samkv. 18. gr. skipulags og byggingarlaga nr. 73/1997.  Tillagan sem nær til alls sveitarfélagsins er sett fram í aðalskipulagsgreinargerð, umhverfisskýrslu, þéttbýlisuppdrætti í mælikvarða 1:10.000 og sveitarfélagsuppdrætti í mælikvarða 1:100.000.

Frestur til að senda inn athugasemdir var miðvikudagurinn 4. ágúst 2010.

Lagðar eru fram til kynningar þær athugasemdir sem bárust og er aðalskipulagshönnuði skipulagsins falið að fara yfir innkomnar athugasemdir og boðað verður til vinnufundar með hönnuði og skipulagsnefnd.

Samhliða auglýsingu að tillögu að nýju Aðalskipulagi Fjallabyggðar 2008-2028, var auglýst skv. 1. mgr. 25. gr. skipulags- og byggingarlaga nr. 73/1997 deiliskipulag við Eyrarflöt, Siglufirði.  Skipulagshugmyndin gengur út á að fullbyggja það svæði sem aðalskipulag gerir ráð fyrir að sé íbúðasvæði við Eyrarflöt.

Engar athugasemdir bárust.

Samþykkir nefndin deiliskipulagið með þeim viðauka að möguleiki verði á að fjölga megi bílastæðum á grasflöt/leiksvæði.

Samhliða auglýsingu að tillögu að nýju Aðalskipulagi Fjallabyggðar 2008-2028, var auglýst skv. 1. mgr. 25. gr. skipulags- og byggingarlaga nr. 73/1997 deiliskipulag við Túngötu, Siglufirði.  Skipulagshugmyndin gengur út á að þétta byggð með því að koma fyrir tveimur raðhúsum og þremur parhúsum og einu einbýlishúsi miðsvæðis á Siglufirði.

Frestur til að senda inn athugasemdir var miðvikudagurinn 4. ágúst 2010.

Lagðar voru fram þær athugasemdir sem bárust, þar sem komu fram kröftug andmæli gegn tillögunni.

Nefndin hafnar auglýstri tillögu að deiliskipulagi við Túngötu, þar sem skipulagið fellur ekki að núverandi byggingum og umhverfi.  Leggur nefndin til að samkeppni verði haldin um skipulagningu svæðisins.

Auðun Pálsson fyrir hönd Íslenska Gámafélagsins ehf vill leggja til skoðunar breytingar á staðsetningu gámasvæðisins á Siglufirði.  Að gámasvæðið verði staðsett innanhúss í Aravíti við hlið áhaldahússins á Siglufirði. 

Nefndin tekur jákvætt í hugmyndina og vísar erindinu til bæjarráðs.

Deloitte fyrir hönd húseigenda Aðalgötu 32, Siglufirði óskar eftir endurupptöku á bókunum 93. og 94. fundar skipulags- og umhverfisnefndar Fjallabyggðar varðandi umsókn um leyfi til að klæða suður- og austurhlið fasteignarinnar að Aðalgötu 32.  Ástæða endurupptökubeiðni er meðfylgjandi upplýsingar og svör við athugasemdum nefndarinnar.

Nefndin vill halda sig við fyrri afgreiðslu, til að koma í veg fyrir að upprunalegu útliti sé fórnað.

Valgeir Tómas Sigurðsson sem rekur kaffihúsið Harbour House við Ingvarsbryggju, óskar eftir því að bæjaryfirvöld sjái sóma sinn í að halda áfram fegrun hafnarsvæðisins við Ingvarsbryggju.

Felur nefndin tæknideild að vinna að lausn málsins í samráði við viðkomandi aðila.

Sveinn Þorsteinsson sækir um að fá löggildingu sem húsasmíðameistari í Fjallabyggð.

Nefndin samþykkir erindið.

Ásgeir Ásgeirsson sækir um leyfi til að fá að grafa út fyrir tunnuskýli og smá plani norðan við tröppur upp að húseigninni Hlíðarvegi 51, Ólafsirði.  Umrædd lóð er í eigu sveitarfélagsins.

Erindið samþykkt.

Á fundi nefndarinnar 15. júlí sl. óskaði Brynjar Harðarson eftir leyfi til að byggja bílskúr við húseignina Lækjargötu 7b, Siglufirði.  Þar sem ekki er til deiliskipulag af svæðinu var samþykkt að framkvæmdin færi í grenndarkynningu.  

Grenndarkynningu er lokið og samþykkir nefndin framkvæmdina.

Magnús Pálsson sendir inn erindi með tillögum að breytingum á akstri um Mjóstræti, Siglufirði.

Nefndin leggur til að Mjóstræti verði lokuð gata frá Túngötu með innkeyrslu frá Hvanneyrarbraut.

Á síðasta fundi nefndarinnar þann 29. júlí sl. óskaði Sigurður Jóhannsson eftir leyfi til að byggja við og gera breytingar á húseigninni Túngötu 29b.  Samþykkt var að framkvæmdin færi í grenndarkynningu, og hafa nú þeir aðilar sem grenndarkynningin náði til samþykkt framkvæmdina með undirskrift á uppdrátt.

Nefndin samþykkir framkvæmdina.

Skipulags- og byggingarfulltrúi kynnti hugmynd að tillögu að deiliskipulagi við Snorragötu.

Nefndin tekur vel í hugmyndina að undanskildu hringtorgi við ráðhústorg.

Á fundi nefndarinnar þann 25. júní sl. sótti Marín Gústafsdóttir um leyfi til að halda hænur í garði sínum að Hólavegi 67, Siglufirði.

Fór umsóknin í grenndarkynningu þar sem kom ein athugasemd, óskað var eftir því að leyfið yrði gefið tímabundið til reynslu.

Nefndin samþykkir að veita leyfið til eins árs.

Ingólfur Frímannsson óskaði eftir leyfi til byggingar bílskúrs við Ólafsveg 13, Ólafsfirði í júlí 2009. Þar sem ekki fylgdu byggingarnefndarteikningar með umsókninni var óskað eftir þeim, og hafa þær nú borist tæknideildinni. En þar sem rúmt ár er liðið frá því að umsókn var tekin fyrir í skipulags- og umhverfisnefnd er hún lögð aftur fyrir nefndina.

Erindið samþykkt.

Ólafur Helgi Marteinsson fyrir hönd Ramma hf. sækir um leyfi til að rífa Vetrarbraut 8 - 10, skreiðargeymslu.

Nefndin samþykkir að húsið verði rifið með þeim skilirðum að svæðið verði fullhreinsað og gengið verði frá suðurvegg nærliggjandi húss.