Fréttir

Síminn hefur nýlokið uppfærslu á ADSL búnaði á Siglufirði, Ólafsfirði og Dalvík. Þar með mun íbúum og fyrirtækjum bjóðast ný þjónusta með möguleikum á mun öflugri nettengingu, yfir 80 sjónvarpsstöðvum og 1500 bíómyndum í gagnvirku sjónvarpi.

Á síðasta bæjarstjórnarfundi var samþykkt að frá og með 1. ágúst fái börn í grunnskóla frítt í sund. Fyrir fá börn undir grunnskólaaldri frítt í sund og því þýðir þetta að öll börn fá frítt í sund í Fjallabyggð fram til 16 ára aldurs.

Í viðtali í hádegisfréttum útvarps í gær greindi Þórir Kristinn Þórisson bæjarstjóri frá því að sveitafélagið hygðist nýta vatnið í Héðinsfjarðargöngunum til neyslu, iðnaðar og jafnvel útflutnings. Hann sagði vatnsfundinn mikinn feng fyrir sveitarfélagið og svo mikið vatn væri á svæðinu að það gæti dugað öllu Eyjafjarðarsvæðinu.

Með Fréttablaðinu í dag fyrlgir sérstakt blað um Siglufjörð. Í blaðinu eru m.a. skemmtilegar greinar um mannlíf og atvinnulíf á Siglufirði auk fjöld mynd frá honum Steingrími okkar. Einnig er Síldarævintýrinu gerð góð skil.

Fram kom í Svæðisútvarpinu fyrir helgi að unglingar á Eyjafjarðarsvæðinu eru mis vel launaðir. Sextán ára unglingar í Grýtubakkahreppi bera mest úr býtum þegar skoðað er tímakaup unglinga fyrir sumarvinnu hjá sveitarfélögum í Eyjafirði. Hæsta tímakaupið hjá fjórtán og fimmtán ára er hjá Dalvíkurbyggð. Lægsta tímakaupið hjá öllum þremur aldursflokkunum greiðir Fjallabyggð.

Fimm íslenskir íþróttamenn undirbúa sig nú fyrir Ólympíumót fatlaðra sem fram fer í Peking í september og keppa þar í sundi, frjálsíþróttum og kraftlyftingum. Þeirra á meðal er Ólafsfirðingurinn Baldur Ævar Baldursson sem keppir í langstökki. Baldur Ævar er öflugur íþróttamaður í fleiri en einni grein og hefur m.a. hlotið styrki úr Afrekssjóði ÍSÍ. Baldur Ævar starfar hjá Fjallabyggð við íþróttasvæðin í Ólafsfirði.