Fréttir

Lokaathöfn stóru upplestrarkeppninnar fór fram í Dalvíkurkirkju á mánudag. Þar komu fram átta nemendur sem allir lásu mjög vel. Skáld keppninnar voru að þessu sinni Jón Sveinsson (Nonni) og Steinn Steinarr. Á lokahátíðinni komu saman þeir þrír nemendur 7. bekkjar sem þóttu standa sig best í undankeppni hvers skóla í Dalvíkurbyggð og Ólafsfirði.

Þann 15. maí n.k. munu Heimili og skóli – landssamtök foreldra veita hin árlegu Foreldraverlaun og er það nú gert í 13. sinn. Leitað var eftir tilnefningum um einstakling, fyrirtæki, stofnanir, sveitarfélög eða skóla á leik-. grunn- og framhaldsskólastigi sem stuðlað hafa að árangursríkum leiðum til að efla samstarf foreldra og kennara og verkefnum sem hafa komið sér vel fyrir foreldra eða börn á einhvern hátt. Alls bárust 35 tilnefningar.

Fimmtudaginn 10 apríl úthlutaði Menningarráð Eyþings verkefnastyrkjum til menningarstarfs á starfssvæði Eyþings. Er þetta önnur úthlutun ráðsins og fór athöfnin fram í Tónlistarhúsinu Laugarborg að viðstöddu fjölmenni. Alls bárust ráðinu 75 umsóknir um rúmar 60 milljónir. 49 verkefni hlutu styrk að upphæð rúmar 20 milljónir króna, þar af voru fjögur verkefni úr Fjallabyggð.