Fræðslu- og frístundanefnd Fjallabyggðar

Fjallabyggð og Foreldrafélag Grunnskóla Fjallabyggðar gerðu með sér samkomulag vegna forvarnarstarfs í Grunnskóla Fjallabyggðar, á árunum 2022-2024 þar sem foreldrafélagið var styrkt árlega um 300.000 kr. til forvarna- og fræðslustarfs. Gildistími samkomulags er liðinn.

Þrátt fyrir aukna vitundarvakningu um mikilvægi svefns þá sofa margir unglingar of lítið og hópur þeirra sem sofa of stutt fer stækkandi milli ára sem er mikið áhyggjuefni. Á sama tíma og fleiri unglingar sofa of stutt sýna rannsóknir að andleg líðan þeirra fer versnandi en ljóst er að tengsl svefns og andlegrar heilsu eru töluverð.

Nokkur umræða hefur áður farið fram um að seinka byrjun á skóladeginum hjá 8. - 10. bekk í Grunnskóla Fjallabyggðar og hefur staðið til að kanna hug forráðafólks elstu nemenda til slíkrar breytingar.
Árgangarnir myndu þá byrja seinna að morgni en stjórnendur og starfsfólk skólans útfæra fyrirkomulagið eins og best hentar í skólastarfinu í samstarfi við fulltrúa nemenda og forráðafólks.

Frigg er nýr gagnagrunnur utan um skráningu upplýsinga um íslenska nemendur í leik-, grunn- og framhaldsskóla sem nú er í smíðum. Upplýsingarnar hafa fram til þessa verið vistaðar hjá mismunandi aðilum í mismunandi kerfum en verða með Frigg á einum miðlægum stað þvert á skóla, skólastig og landsvæði.

Gagnagrunnurinn mun m.a. halda utan um skráningu barna og ungmenna í, úr og milli skóla og námsárangur nemenda í hinu nýja samræmda námsmati, Matsferli, á síðari stigum.

Frigg er samstarfsverkefni mennta og barnamálaráðuneytisins, Miðstöðvar menntunar og skólaþjónustu, Stafræns Ísland (SÍ) og Sambands íslenskra sveitarfélaga (SÍS) um samræmt verklag við nemendaumsýslu og innleiðingu þvert á skóla og sveitarfélög.
Fyrsta skrefið í innleiðingunni er að innrita öll börn fædd 2019 í grunnskóla haustið 2025 í gegnum Frigg, í gegnum samræmda umsókn á Ísland.is.

Gæðaráð Leikskóla Fjallabyggðar lagði fyrir starfsmannakönnun sl. haust samkvæmt endurbótaáætlun leikskólans. Tilgangurinn var að fylgja eftir niðurstöðum síðustu starfsmannakönnunar. Svarhlutfall var 94,6%.