Bæjarráð Fjallabyggðar

Sigríður Ólafsdóttir mannauðsráðgjafi hjá Mögnum mætti til fundarins í gegnum fjarfundarbúnað og fór yfir helstu forsendur og niðurstöður eftir viðtöl og úttekt á mannauðsmálum í Hornbrekku.

Yfirlit staðgreiðslu fyrir febrúar 2024 lagt fram til kynningar. Staðgreiðsla fyrir tímabilið nemur kr. 128.256.936,- eða 122,67% af tímabilsáætlun 2024. Íbúum bæjarfélagsins hefur fjölgað um 15 á árinu.

Yfirlit launakostnaðar og kostnaðar vegna langtímaveikinda fyrir janúar-febrúar 2024 lagt fram til kynningar. Áfallinn launakostnaður er 98,97% af tímabilsáætlun.

Rekstraryfirlit málaflokka fyrir 2023 og tímabilið janúar til febrúar 2024 lagt fram til kynningar.

Minnisblað deildarstjóra tæknideildar um veiðireglur og veiðistjórn í Hólsá lagt fram til kynningar.

Samstarfssamningur milli Fjallabyggðar og hestamannafélagsins Gnýfara fyrir árið 2024 lagður fram.

Í 130. gr. sveitarstjórnarlaga nr. 138/2011 er ákvæði um að sveitarfélög skuli setja sér málstefnu í samráði við Íslenska málnefnd og eftir atvikum málnefnd um íslenskt táknmál.

Í málstefnunni skal koma fram að öll gögn liggi fyrir á íslensku svo sem kostur er og gerð grein fyrir heimilum undantekningum á þeirri reglu. Þar skulu einnig settar reglur um notkun íslensks táknmáls og íslensks punktaleturs í gögnum og starfsemi sveitarfélagsins.

Drög að málstefnu Fjallabyggðar lögð fram til afgreiðslu.

Drög að reglum um stofnframlög Fjallabyggðar lögð fram til afgreiðslu.
Markmið með veitingu stofnframlaga er að bæta húsnæðisöryggi fjölskyldna og einstaklinga í sveitarfélaginu, sem eru undir tekju- og eignamörkum skv. 10. gr. laga um almennar íbúðir, með því að auka aðgengi að öruggu og viðeigandi íbúðarhúsnæði til leigu og stuðla að því að húsnæðiskostnaður sé í samræmi við greiðslugetu leigjenda.
Veitingu stofnframlaga er ætlað að stuðla að því að í boði verði leiguíbúðir í sveitarfélaginu á viðráðanlegu verði fyrir þá sem þurfa á því að halda, þ.m.t. fyrir námsmenn, ungt fólk, aldraða, fatlað fólk og fólk sem ekki er fært um að sjá sér fyrir húsnæði sökum félagslegra aðstæðna eða verulegs fjárhagsvanda.
Til að ná þessum markmiðum skal lögð sérstök áhersla á nýbyggingar og að fjölga leiguíbúðum sem uppfylla skilyrði laga um almennar íbúðir og reglna þessara.

Drög að viðverustefnu Fjallabyggðar lögð fram til afgreiðslu.
Markmiðið með viðverustefnu er að styðja við og hlúa að starfsmönnum vegna fjarveru frá vinnu vegna veikinda, slysa eða áfalla um lengri eða skemmri tíma. Auka ánægju og skapa traust og heilsusamlegt vinnuumhverfi. Halda fjarvistum í lágmarki, þ.e. fækka skiptum, stytta fjarverutímann og efla hag sveitarfélagsins.
Viðverustefnan hefur því þann tilgang að samræma verklag og viðbrögð vegna fjarveru þannig að allir starfsmenn og stjórnendur hafi skýra verkferla í tengslum við tilkynningar, skráningar og viðbrögð við fjarvistum sem/og endurkomu til vinnu eftir veikindi.

Drög að reglum um viðveruskráningu lögð fram til afgreiðslu.
Tilgangur reglna þessara er að skýra hlutverk og ábyrgð starfsmanna vegna notkunar á viðverukerfinu VinnuStund.

Talnakönnun hefur reiknað áfallna lífeyrisskuldbindingu vegna áunninna réttinda starfsmanna Fjallabyggðar hjá Lífeyrissjóði starfsmanna ríkisins B deild pr. 31. desember 2023.
Skuldbindingin er reiknuð samkvæmt tryggingafræðilegum forsendum sjóðsins, þar sem miðað er við spá um lækkandi dánartíðni. Helstu forsendurnar eru 2% vextir, lífslíkur samkvæmt reynslu LSR á árunum 2018 til 2022 með spá FÍT um lækkandi dánartíðni. Örorkulíkur eru samkvæmt reynslu LSR 2010 - 2014. Gögn um lífeyrisréttindi eru sömu gögn og notuð voru við útreikninginn í árslok 2023 og samkvæmt yfirferð bæjarins.

Á 822. fundi bæjarráðs var bæjarstjóra falið að semja við landeigendur um þóknun vegna skertrar raforkuframleiðslu sem nemur áhrifum af vatnstöku sveitarfélagsins.
Deildarstjóra tæknideildar var falið að hefja strax ástandsskoðun á núverandi lögn frá Burstabrekku, svo koma megi vatni að núverandi mannvirkjum vatnsveitu við nyrðri enda lagnarinnar. Bæjarráð óskar eftir upplýsingum um ástand lagnarinnar á næsta fund bæjarráðs. Samhliða því skal hefja vinnu við að koma upp nauðsynlegum rafrænum vöktunarbúnaði fyrir vatnsveituna sem gefur heildræna sýn á stöðu veitunnar hverju sinni með fjarlestri.
Samhliða viðræðum bæjarstjóra við landeigendur var deildarstjóra tæknideildar einnig falið að hefja undirbúning á beintengingu við Styrjueldið með nýrri lögn frá núverandi veitumannvirkjum. Verði því við komið er æskilegt að nýta tímabundið ónotaðar eldri lagnir, ef þær eru taldar flýta fyrir afhendingu vatns, s.s. til að þvera götur eða erfið svæði.
Minnisblað deildarstjóra tæknideildar og bæjarstjóra lagt fram.

Samkvæmt 7. gr. reglna um stuðning við frumkvöðla og fyrirtæki sem staðfestar voru á 97. fundi bæjarstjórnar þann 12. febrúar 2014 skal Markaðs- og menningarmálanefnd Fjallabyggðar endurskoða reglurnar árlega, fyrir lok ágústmánaðar og gera tillögur til bæjarráðs.
Samkvæmt gildandi erindisbréfi markaðs- og menningarnefndar frá 3. júlí 2018 hefur nefndin ekki lengur umsjón með málaflokknum. Af þeim sökum eru reglurnar lagðar fyrir bæjarráð.
Deildarstjóri stjórnsýslu og fjármála leggur til að reglurnar verði afnumdar.

Gildistími samnings á milli Fjallabyggðar og hestamannafélagsins Glæsis er liðinn. Fyrir liggja drög að endurnýjun til eins árs. Með samningi þessum styður Fjallabyggð við rekstur mannvirkja í eigu félagsins en á móti skuldbindur hestamannafélagið sig til að tryggja þeim sem standa fyrir reiðnámskeiðum fyrir börn og unglinga aðgang að aðstöðunni.

Minnisblað deildarstjóra fræðslu-, frístunda og menningarmála og sviðsstjóra fræðslu- og menningarsviðs Dalvíkurbyggðar um niðurgreiðslu á árskortum í líkamsrækt lagt fram. Lagt er til að gjaldskrám Fjallabyggðar og Dalvíkurbyggðar verði breytt á þann veg að árskort í líkamsrækt verði kr. 55.000 fyrir starfandi lögreglumenn á Tröllaskaga.

Aðalfundur Lánasjóðs sveitarfélaga ohf. verður haldinn fimmtudaginn 14. mars 2024 kl. 16:30 í Silfurbergi Hörpu.

Athygli sveitarstjórna er vakin á því að á árinu fagnar lýðveldið Ísland áttatíu ára afmæli.
Hátíðahöld í tilefni afmælisins munu ná hámarki 17. júní með hefðbundinni dagskrá í sveitarfélögum en að auki verður sérstök hátíðardagskrá á Þingvöllum þar sem landsmenn eru hvattir til að heimsækja þjóðgarðinn og skoða sýninguna Hjarta lands og þjóðar helgina 15.-16. júní.
Afmælisnefnd, sem forsætisráðherra skipaði í október sl., óskar eftir samstarfi við sveitarfélög í tengslum við hátíðardagskrána með miðlun og hvatningu til þátttöku eins og best hentar á hverjum stað.

Með erindi dags. 15. febrúar sl. óskaði Fjallabyggð eftir umsögn Veðurstofu Íslands eftir upplýsingum um stöðu endurskoðunar á hættumati undir Strengsgili á Siglufirði.
Eins og bent er á í tölvupóstinum frá 15. febrúar, hefur dregist úr hömlu að fylgja eftir bréfi Veðurstofunnar til Fjallabyggðar um endurskoðun hættumats undir Strengsgili eftir snjóflóðin á Flateyri í janúar 2020. Þessi endurskoðun hefur tafist vegna þess að þróun nýs snjóflóðalíkans sem notað er við endurskoðunina hefur tekið lengri tíma en vonast var til. Líkanið er nú tilbúið og hefur verið keyrt fyrir þá varnargarða sem til stóð og taldir eru upp í bréfi Veðurstofunnar til Fjallabyggðar frá október 2020. Veðurstofan stefnir að því að ljúka endurskoðun hættumats undir leiðigörðum neðan Strengsgilja á Siglufirði og við Hornbrekku á Ólafsfirði í vetur.

Fundargerð 153. fundar félagsmálanefndar lögð fram til kynningar.