Vatnsþarfir vegna styrjueldis í Ólafsfirði

Lagt fram erindi Eyþórs Eyjólfssonar, f.h. Hins Norðlenzka Styrjufjelags ehf. þar sem óskað er eftir viðræðum við bæjaryfirvöld vegna vatnsþarfar styrjueldis félagsins í Ólafsfirði.

Minnisblað EFLU vegna innviðagreiningar á vatnsveitu Ólafsfjarðar ásamt minnisblaði bæjarstjóra lagt fram.

Á 822. fundi bæjarráðs var bæjarstjóra falið að semja við landeigendur um þóknun vegna skertrar raforkuframleiðslu sem nemur áhrifum af vatnstöku sveitarfélagsins.
Deildarstjóra tæknideildar var falið að hefja strax ástandsskoðun á núverandi lögn frá Burstabrekku, svo koma megi vatni að núverandi mannvirkjum vatnsveitu við nyrðri enda lagnarinnar. Bæjarráð óskar eftir upplýsingum um ástand lagnarinnar á næsta fund bæjarráðs. Samhliða því skal hefja vinnu við að koma upp nauðsynlegum rafrænum vöktunarbúnaði fyrir vatnsveituna sem gefur heildræna sýn á stöðu veitunnar hverju sinni með fjarlestri.
Samhliða viðræðum bæjarstjóra við landeigendur var deildarstjóra tæknideildar einnig falið að hefja undirbúning á beintengingu við Styrjueldið með nýrri lögn frá núverandi veitumannvirkjum. Verði því við komið er æskilegt að nýta tímabundið ónotaðar eldri lagnir, ef þær eru taldar flýta fyrir afhendingu vatns, s.s. til að þvera götur eða erfið svæði.
Minnisblað deildarstjóra tæknideildar og bæjarstjóra lagt fram.

Með fundarboði bæjarráðs fylgdi ályktun Framfarafélags Ólafsfjarðar sem samþykkt var á fundi félagsins sem haldinn var 27.08.2024. Samþykkt er að koma eftirfarandi ábendingum og ályktun um vatnsbúskap í Ólafsfirði á framfæri við stjórnendur sveitarfélags Fjallabyggðar.