Markaðs- og menningarnefnd Fjallabyggðar

Markaðs- og menningarnefnd leggur til að auglýst verði eftir rekstraraðilum fyrir tjaldsvæði í Fjallabyggð til næstu þriggja ára. Nefndin vísar hugmynd að fyrirkomulagi útvistunar á rekstri tjaldsvæða til bæjarráðs í drögum að auglýsingu eftir rekstraraðila.

Markaðs- og menningarfulltrúi kynnir hugmynd að áhersluverkefni SSNE, Menningarbyggð, fyrir fundarmönnum. Um hugmynd á byrjunarstigi er að ræða og áframhaldandi þróun hennar á eftir að koma í ljós.

Þar sem auglýstir hafa verið stórir viðburðir og fundir um menningar-, ferða- og markaðsmál í Fjallabyggð á næstu vikum telur markaðs- og menningarnefnd of mikið að auglýsa einnig Vorfund ferðaþjónustu þar sem um sama markhóp er að ræða. Fyrirhuguð er norræn ráðstefna um nærandi ferðaþjónustu dagana 12.-14. mars nk. Ráðstefnan er haldin á Siglufirði og á Hólum í Hjaltadal. Þá verður vinnustofan Heilabrot og hugkvæmni: Samtal um sameiginleg hagsmunamál í menningar og ferðaþjónustu á Norðurlandi, haldin þann 4. apríl í Síldarminjasafni Íslands. Fundarröð Markaðsstofu Norðurlands, samstaða um markaðsmál, verður síðan 29. apríl á Siglufirði.
Markaðs- og menningarnefnd hvetur menningar- og ferðaþjónustuaðila í sveitarfélaginu til góðrar þátttöku í þessum viðburðum.
Markaðs- og menningarnefnd leggur því til að sleppa Vorfundi að þessu sinni.