Fræðslu- og frístundanefnd Fjallabyggðar

Undir þessum lið sátu Olga Gísladóttir, leikskólastjóri og Kristín H Karlsdóttir, aðstoðarleikskólastóri .
Fylgdu þær úr hlaði greinargerð sinni um húsnæðismál Leikskála á Siglufirði. Í greinargerðinni kemur fram að húsnæði Leikskála rúmar ekki lengur starfsemina og leggja þær áherslu á að gripið verði til aðgerða sem fyrst. Benda þær á að umsóknum um leikskólapláss hefur fjölgað mjög umfram væntingar og skýrist þessi fjölgun af jákvæðri íbúaþróun í bæjarfélaginu. Telja leikskólastjórar raunhæfasta kostinn að að setja upp lausa kennslustofu á lóð leiksólans til að bregðast við vandanum.

Fræðslu- og frístundanefnd tekur undir sjónarmið leikskólastjóranna og beinir þeim tilmælum til bæjaryfirvalda að þegar í stað verði leitað efir lausri kennslustofu til leigu til skemmri tíma, meðan ákvörðun er tekin um framhaldið.
Jafnframt telur nefndin nauðsynlegt að ráðast í greiningarvinnu á framtíðarlausn húsnæðismála Leikskála.

Undir þessum lið sat Jónína Magnúsdóttir, skólastjóri GF.
Jónína gerði grein fyrir skóladagatali grunnskólans fyrir skólaárið 2014-2015.  Að þessu sinni er skóladagatalið samræmt skóladagatali grunnskólans í Dalvíkurbyggð.

Fræðslu- og frístundanefnd samþykkir skóladagatalið fyrir sitt leyti.

Þjónustusamningar sem í gildi eru vegna skólamáltíða fyrir Grunnskóla Fjallabyggðar renna út í júnímánuði.
Fræðslu- og frístundanefnd samþykkir að gerð verði skrifleg verðfyrirspurn, skv. 20. gr. innkaupareglna Fjallabyggðar og send þjónustuaðilum fyrir 10. maí næst komandi.
Nefndin leggur til að nýir þjónustusamningar gildi til næstu tveggja ára.

Rekstraryfirlit fyrir fyrstu tvo mánuði ársins lagt fram til kynningar. Niðurstaða fyrir fræðslumál er 103,1 millj. kr. sem er 105% af áætlun tímabilsins sem var 98,1 millj. kr.
Niðurstaða fyrir æskulýðs- og íþróttamál er 33,5 millj. kr. sem er 102% af áætlun tímabilsins sem var 32,9 millj. kr.

Fræðslu- og frístundanefnd hefur borist áskorun frá 40 notendum líkamsræktaraðstöðu í Íþróttamiðstöð Fjallabyggðar á Siglufirði um endurnýjun á tækjabúnaði í líkamsræktaraðstöðunni. Benda þau á að mörg tækin séu úrelt og slitin og af þeim geti stafað slysahætta. Telja þau að ef í endurnýjunina yrði ráðist megi fullvíst telja að notendum fjölgi, sem er til hagsbóta fyrir sveitarfélagið, bæði fjárhagslega og heilsufarslega. Hvetja undirrituð nefndarmenn til að íhuga þessa áskorun vel og vandlega.

Fræðslu- og frístundanefnd þakkar fyrir góð og gild rök og vísar málinu til gerð næstu fjárhagsáætlunar.

Fræðslu- og frístundanefnd samþykkir að vinna verði sett af stað við gerð samstarfssamnings milli Fjallabyggðar og UÍF. Markmið samningsins verði m.a. að auka gæði íþróttastarfs í Fjallabyggð, vinna að heilsueflingu innan bæjarfélagsins, efla forvarnarstarf íþróttafélaganna og efla samstarf og samráð UÍF og Fjallabyggðar.

Deildarstjóri lagði fram drög að samningum við Golfklúbb Ólafsfjarðar, Golfklúbb Siglufjarðar, Hestamannafélagið Gnýfara og Hestamannafélagið Glæsi.

Fræðslu- og frístundanefnd samþykkir drögin fyrir sitt leyti.

Undirbúningur fyrir Vinnuskólann á komandi sumri stendur nú sem hæst. Gengið hefur verið frá ráðningu flokkstjóra og auglýsing um skráningu nemenda verður birt í næstu Tunnu.
Umsóknarfrestur um starf hjá vinnuskólanum er til 20. maí næst komandi.
Vinnuskólinn hefur starfsemi sína 10. júní og mun starfsemin vera með hefðbundnu sniði.
Árgangur 2000 fær vinnu í 4 vikur, árgangur 1999 í 5 vikur og árgangar 1998 og 1997 í 8 vikur.

Lagður fram kynningarbæklingur frá Codland efh um vinnuskóla um sjávarútveg.

Fræðslu- og frístundanefnd telur verkefnið áhugavert, en kostnaður er umfram það sem nefndin hefur til ráðstöfunar fyrir verkefni vinnuskólans sumarið 2014.

Á fundi fræðslu- og frístundanefndar þann 7. febrúar s.l. var tekið fyrir erindi frá Jónínu Magnúsdóttur, skólastjóra Grunnskóla Fjallabyggðar um leyfi frá störfum næsta skólaár, til þess að sinna endurmenntun.
Meðan á námsleyfi Jónínu stendur mun Ríkey Sigurbjörnsdóttir, aðstoðarskólastjóri og staðgengill skólastjóra gegna stöðu skólastjóra GF, skólaárið 2014-2015.