Bæjarráð Fjallabyggðar

Á 845. fundi bæjarráðs var tekið fyrir erindi Laxóss ehf. til sveitarfélaga við Eyjafjörð vegna sjókvíaeldis með ófrjóan lax eða sértækt skiptieldi með silung eða eðlilegan lax.
Til fundarins mættu f.h. Laxóss ehf. Guðmundur Valur Stefánsson og Laufey María Jóhannsdóttir og fóru þau yfir erindi og áform félagsins.

Tölvupóstur barst tæknideild frá Samgöngustofu þess efnis að skráningin á Siglufjarðarflugvelli sem lendingarstað væri runnin út og þyrfti að endurnýja ef vilji er til að halda skráningunni. Endurnýjuninni fylgir ekki kostnaður fyrir sveitarfélagið en samkv. úttekt á flugvellinum frá júlí 2024 eru nokkur atriði sem sett var út á og þarf mögulega að lagfæra næsta sumar. Þessi atriði voru flest minniháttar og sneru helst að merkingum á brautum, gróðri í kringum merkingar o.þ.h. atriði.

Samningur Fjallabyggðar við Leyningsás um rekstrarframlag vegna skíðasvæðis er útrunninn. Nýr rekstrarsamningur er í undirbúningi. Fyrir liggur bráðabirgðarsamningur til tveggja mánaða.

Með fundarboði bæjarráðs fylgdi uppfært minnisblað bæjarstjóra og tæknideildar um framvindu mála og stöðu verkefna í kjölfar rigningaveðurs í ágúst.

Í framhaldi af fyrirspurn Landhelgisgæslunnar vegna varðskipsins Freyju og svörum bæjarstjóra hefur verið skoðað hvort mögulegt sé að koma fyrir ljósastaurum niður Ránargötu.

Á 833. fundi bæjarráðs var tekið fyrir minnisblað deildarstjóra tæknideildar þar sem óskað var eftir viðauka vegna aukinna fjárfestinga. Bæjarráð samþykkti að láta útbúa viðauka við fjárfestingahluta fjárhagsáætlunar 2024 að fjárhæð kr. 198.450.000 sem fjármagnað yrði með handbæru fé. Afgreiðsla bæjarráðs var staðfest á 245. fundi bæjarstjórnar.
Með fundarboði bæjarráðs fylgdi minnisblað deildarstjóra stjórnsýslu- og fjármáladeildar ásamt útfærðum viðauka nr. 4 við fjárhagsáætlun 2024 að fjárhæð kr. 198.450.000,- sem fjármagnaður er með handbæru fé. Áætlaðar fjárfestingarhreyfingar hækka úr kr. 228.450.000 í kr. 577.500.000.

Með fundarboði bæjarráðs fylgdi erindi Páleyjar Borgþórsdóttur, lögreglustjóra á Norðurlandi eystra varðandi verkefnið "Öruggara Norðurland eystra".

Tekið fyrir erindi Hestamannafélagsins Glæsis vegna samninga við Fjallabyggð.

Með fundarboði bæjarráðs fylgdi erindi Arnars Freys Þrastarsonar, byggingarverkfræðings hjá Verkís, þar sem lagt er til að komið verið fyrir nýrri útrás við Primex ehf.

Með fundarboði bæjarráðs fylgdi boð á Umhverfisþing, sem fer fram í Hörpu. 5. nóvember og stendur frá kl. 13-16.

Sambandið stendur fyrir málþingi í samstarfi við Landssamband eldri borgara þar sem fjallað er um starf öldungaráða. Málþingið verður haldið í Reykjavík en það er einnig boðið upp á streymi.

Er þess vinsamlegast óskað að upplýsingum um málþingið verði sent til fulltrúa sveitarstjórnar sem sitja í öldungaráði.

Með fundarboði bæjarráðs fylgdi yfirlit urðun úrgangs á þriðja ársfjórðungi 2024. Samantektin er send öllum sveitarfélögum á þjónustusvæði Norðurár bs til fróðleiks. Gögnin eru unnin upp úr skráningarkerfi hjá Norðurá bs og byggjast á þeim upprunaskráningum sem flutningsaðilar gefa upp við innvigtun á úrgangi til urðunar.

Tekið fyrir minnisblað bæjarstjóra um tillögur að nýju skipuriti fyrir sveitarfélagið sem byggir á tillögum sem komu fram í stjórnsýslu- og rekstrarúttekt Strategíu.