Bæjarráð Fjallabyggðar

Á 229. fundi bæjarstjórnar Fjallabyggðar var bæjarráði falin heimild til fullnaðarafgreiðslu málsins.
Lögð fram staðfesting bæjarfélagsins á stofnframlagi sínu til verkefnisins við Vallarbraut ásamt upplýsingum um form stofnframlags og sundurliðun á fjárhæð þess.

Lagt fram minnisblað deildarstjóra tæknideildar vegna efnislosunar á Leirutanga.

Deildarstjóri stjórnsýslu og fjármála mætti til fundarins og fór yfir helstu verkefni deildarinnar.

Lagt fram til kynningar yfirlit staðgreiðslu fyrir apríl 2023. Staðgreiðsla fyrir tímabilið nemur kr. 109.026.973,- eða 91,27% af tímabilsáætlun 2023. Íbúum bæjarfélagsins hefur fjölgað um 20 það sem af er árinu.

Lagt fram til kynningar yfirlit yfir launakostnað og kostnað vegna langtímaveikinda frá janúar til apríl 2023.

Bæjarstjórn Fjallabyggðar samþykkti formlega á fundi sínum 8. febrúar 2023 að stofna samráðshóp um stefnumótun og framtíðarsýn í íþróttamálum í Fjallabyggð. Samráðshópurinn hefur fundað fjórum sinnum, unnið markvisst, kallað eftir og tekið saman gögn um málið. Samráðshópurinn hefur skilað inn stöðuskýrslu um framvindu vinnunnar til bæjarráðs.

Lögð fram undirrituð viljayfirlýsing frá febrúar 2022 milli Fjallabyggðar og Regus á Íslandi um sameiginlega vilja aðilanna til þess að opna skrifstofusetur í Fjallabyggð.

Fjallabyggð lýsir yfir þungum áhyggjum vegna ákvörðunar Innviðaráðuneytisins og Reykjavíkurborgar um uppbyggingu í Skerjafirði. Með ákvörðuninni er samkomulag ríkisins og Reykjavíkurborgar frá 2019 haft að engu þar sem forsenda þess var að tryggja rekstraröryggi Reykjavíkurflugvallar þar til nýr flugvöllur er tilbúinn til notkunar.
Reykjavíkurflugvöllur sinnir mikilvægu hlutverk og er lífæð landsbyggðanna. Með uppbyggingu í Skerjafirði er vegið að framtíð og öryggi landsbyggðanna gagnvart sjúkraflugi og nauðsynlegri heilbrigðisþjónustu sem og aðgengi almennings, atvinnulífi og stjórnsýslu að mikilvægum innviðum.
Fjallabyggð skorar á borgarstjórn og Innviðaráðherra að fresta ákvörðuninni þar til að sú vinna sem lagt var upp með í fyrrgreindu samkomulagi sé lokið og framtíðarlausn innanlandsflugs tryggð.

Lagt fram erindi Örlygs Kristfinnssonar um leyfi til að lagfæra grjótgarð á Granda í austanverðum Siglufirði. Málið var tekið fyrir á 298. fundi skipulags- og umhverfisnefndar sem samþykkti lagfæringu grjótgarðs með fyrirvara um samþykki bæjarráðs fyrir kostnaðarþátttöku sveitarfélagsins á verkefninu.

Lagt fram erindi dagsett 10.04.2023 þar sem Alexander Vestfjörð Kárason sækir um frístundalóð nr. 8 við Sundlaugargötu í Ólafsfirði. Umsóknin var samþykkt á 298. fundi skipulags- og umhverfisnefndar og vísað til afgreiðslu bæjarráðs.

Lögð fram bókun frá 46. fundi byggðaráðs sveitarfélags Skagafjarðar frá 3. maí 2023.

Bæjarráð Fjallabyggðar fagnar ályktun byggðaráðs Skagafjarðar um bættar samgöngur á milli Fjallabyggðar og Skagafjarðar. Bæjarráð tekur undir með byggðaráði að mikilvægt sé að fjármunir verði tryggðir svo hægt sé að tryggja áframhaldandi undirbúning framkvæmda og endalega hönnun ganganna. Bæjarstjóra falið að koma afstöðu bæjarráðs á framfæri við þingmenn og samgönguyfirvöld.

Lagt fram erindi frá Vinum íslenskrar náttúru (VÍN) um skipulag skógræktar og ábyrgð sveitarstjórna.

Stjórn Samtaka orkusveitarfélaga hefur ákveðið að halda Orkufund 2023 þann 10. maí á Hilton Reykjavík Nordica. Fundinum verður einnig streymt.

Markaðsstofa Norðurlands boðar til aðalfundar þriðjudaginn 16. maí 2023 kl. 13:00.
Fundurinn verður haldinn á Hótel Laugarbakka.

Lögð fram erindi frá nefnda- og greiningarsviði Alþingis.

Boðað er til ársfundar Náttúruhamfaratrygginga Íslands (NTÍ) fimmtudaginn 25. maí frá kl. 11.30 - 13.00 á Grand hótel. Bæjarráð hvetur kjörna fulltrúa til þess að skrá sig til þátttöku.

Fundargerð 145. fundar félagsmálanefndar Fjallabyggðar lögð fram til kynningar.