Bæjarráð Fjallabyggðar

Lögð eru fram drög að breyttri gjaldskrá vatnsveitu sem unnin eru í samræmi við bókun bæjarráðs á 734. fundi ráðsins.

Lagt fram bréf Umhverfis-, orku- og loftlagsráðuneytisins dags, 21. mars 2022 ásamt fylgjandi minnisblaði Veðurstofu Íslands (VÍ) er varðar endurskoðun hættumats undir leiðigörðum. Einnig eru lögð fram fyrri samskipti Fjallabyggðar, ráðuneytis og VÍ vegna málsins.

Í minnisblaði VÍ er farið yfir stöðu mála er varða endurskoðun hættumats undir leiðigörðum en ákveðið var að endurmeta snjóflóðahættu neðan varnargarða sem reistir hafa verið hér á landi eftir snjóflóðin á Flateyri í janúar 2020. Í minnisblaðinu kemur fram að vinna þurfi töluverða greiningarvinnu m.a. í svokölluðum snjóflóðahermi til þess að meta þörf á hugsanlegum breytingum á varnarmannvirkjum. Einnig kemur fram í minnisblaðinu að einhverju leyti verði greiningarvinnan unnin samhliða fyrir alla staði en að í fyrstu verði lögð áhersla á Strengsgil og Seljalandshlíð. Að síðust kemur fram í minnisblaðinu að stefnt sé á að niðurstöður fyrir framangreinda staði liggi fyrir í haust.

Formaður bæjarráðs leggur til að unnin verði alhliða úttekt á viðhaldsþörf á ytra byrði Skálarhlíðar, úttektin skal innihalda sundurliðað mat á kostnaði við úrbætur og vera lögð fyrir bæjarráð eigi síðar en 14. apríl n.k

Lagt fram minnisblað deildarstjóra dags. 21. mars 2022 er varðar útilýsingu við stofnanir Fjallabyggðar en bæjarráð óskaði eftir minnisblaðinu á 733. fundi ráðsins. Í framlögðu minnisblaði kemur fram að þörf sé úrbóta við nokkrar stofnanir og er áætlaður kostnaður vegna þeirra nemi 4 millj.kr.

Lagt fram til kynningar yfirlit deildarstjóra tæknideildar yfir stöðu framkvæmda á framkvæmdaáætlun.

Lagt fram minnisblað deildarstjóra tæknideildar dags. 24. mars 2022 er varðar flísalögn á útisvæði íþróttamiðstöðvar Ólafsfjarðar. Í minnisblaðinu, sem unnið er að ósk bæjarráðs, er lagt til að farið verði í lagfæringar á flísalögn samhliða framkvæmdum í búningsklefum íþróttamiðstöðvarinnar. Áætlaður kostnaður við lagfæringar er um 10 millj.kr., framkvæmdin er ekki á fjárhagsáætlun 2022.

Lagt er fram vinnuskjal deildarstjóra stjórnsýslu- og fjármála dags. 28. mars 2022 hvar lagt er til við bæjarráð að heimildarákvæði um framlengingu verði nýtt og samningurinn þannig framlengdur til 14. maí 2023.

Lagður er fram tölvupóstur Jóhanns Más Sigurbjörnssonar f.h. Golfklúbbs Siglufjarðar (GKS) dags, 22. mars 2022 er varðar ósk GKS um framhald afnota GKS af svæði suður af Hóli líkt og síðastliðið sumar. Einnig eru lögð fram drög að samkomulagi vegna afnota af umræddu svæði, framlag Fjallabyggðar er sláttur á svæðinu þrisvar sinnum í sumar.

Lagt fram til kynningar erindi Íslandsdeildar Transparency International dags. 22. mars 2022 er varðar styrkbeiðni til að fjárhæð 50 til 250 þúsund.

Lagt fram erindi Eignarhaldsfélags Brunabótafélags Íslands (EBÍ), dags. 24. mars 2022 þar sem fram kemur að opnað hefur verið fyrir umsóknir í styrktarsjóð félagsins. Sveitarfélög geta sótt um styrk úr sjóðnum til athugana eða rannsókna á ýmsum þróunarþáttum í atvinnulífi, samgöngum, fræðslu og menningarmálum, samkvæmt úthlutunarreglum. Umsóknarfrestur er til aprílloka.

Lagt fram erindi Karólínu Sigurjónsdóttur f.h. Bridgefélags Siglufjarðar dags. 25. mars 2022 er varðar beiðni um ókeypis afnot af íþróttasal íþróttamiðstöðvarinnar á Siglufirði dagana 2. til 4. september nk. Einnig er lagt fram vinnuskjal deildarstjóra fræðslu-, frístunda- og menningarmála dags 28. mars hvar fram kemur að félaginu hafi áður verið veittur sambærilegur styrkur. Einnig kemur fram að gjald fyrir leigu salarins í 3 sólarhringa nemi 388.500 og að sú fjárhæð, komi til þess að bæjarráð ákveði að styrkja félagið, rúmist innan fjárheimilda yfirstandandi árs.

Lagður er fram til kynningar úrskurður Úrskurðarnefndar umhverfis- og auðlindamála dags. 25. mars 2022 vegna máls nr. 164/2021 er varðar kæru vegna ákvörðunar bæjarstjórnar Fjallabyggðar frá 13. október 2021 um að synja beiðni um niðurfellingu sorphirðugjalds vegna Þormóðsgötu 34, Fjallabyggð. Í úrskurðinum er kröfu kæranda um ógildingu ákvörðunar bæjarstjórnar Fjallabyggðar frá 13. október 2021 um að synja beiðni hans um niðurfellingu sorphirðugjalds vegna Þormóðsgötu 34, Fjallabyggð hafnað.

Lagt fram bréf Jóns Gunnarssonar dómsmálaráðherra dags. 21. mars 2022 er varðar fyrirhugaða endurskipulagningu sýslumannsembætta. Í bréfinu er reifuð sjónarmið ráðherra er snúa að fyrrgreindri endurskipulagningu og þær miklu breytingar og tækifæri sem miklar framfarir í stafrænni þjónustu hafa í för með sér. Einnig er í bréfinu skýrt tekið fram að markmið þeirra aðgerða sem boðaðar eru sé ekki að færa núverandi starfsemi undir eitt þak á höfuðborgarsvæðinu, markmiðið sé þvert á móti að efla núverandi starfsemi og styrkja starfstöðvar sem eru að þjónusta almenning um land allt.

Lagt fram til kynningar erindi velferðarnefndar Alþingis dags. 24. mars er varðar umsögn um tillögu til þingsályktunar um mótun stefnu í aðdraganda aðgerðaráætlunar í heilbrigðisþjónustu við aldraða til ársins 2030, 418. mál.

Lagt fram til kynningar erindi velferðarnefndar Alþingis dags. 24. mars er varðar umsögn um frumvarp til laga um rafrettur og áfyllingar fyrir rafrettur (nikótínvörur), mál 450.

Lögð er fram til kynningar fundargerð 136. fundar félagsmálanefndar Fjallabyggðar.