Bæjarráð Fjallabyggðar

Ólöf Ýrr Atladóttir mætti til fundarins og fór yfir framvindu verkefnis sem snýr að eflingu ráðstefnuhalds og funda á Siglufirði.

Ólöf Ýrr Atladóttir mætti til fundarins og fór yfir verkefnið "Nærandi ferðaþjónusta í Fjallabyggð."

Rekstraryfirlit málaflokka fyrir tímabilið janúar til nóvember 2023 lagt fram til kynningar.

Markaðs- og menningarnefnd vísar drögum að söfnunarreglum Listaverkasafns Fjallabyggðar til umfjöllunar í bæjarráði.

Lögð fram drög að samstarfssamningi við Björgunarsveitina Stráka sem gildir frá 2024-2026.

Lögð fram drög að samstarfssamningi við Björgunarsveitina Tind sem gildir frá 2024-2026.

Vetraríþróttamiðstöð Íslands var stofnuð á Akureyri með staðfestingu samstarfs milli menntamálaráðuneytisins, Akureyrarbæjar, Íþrótta- og ólympíusambands Íslands og Íþróttabandalags Akureyrar þann 18. mars 1995 sbr. reglugerð útgefinni af menntamálaráðherra þann sama dag.
Vetraríþróttamiðstöð Íslands, VMÍ, er þjónustustofnun sem hefur að megin verkefni að efla vetraríþróttir, íþróttafræðslu og útivist og stuðla þannig að heilbrigðu lífi og heilsurækt meðal almennings, svo sem skólafólks, fatlaðra og keppnis- og afreksfólks í íþróttum með hefðbundnar vetraríþróttir, íþróttafræðslu og útivist að leiðarljósi.
Staða verkefnisins í dag er sú að stjórnvöld hafa að mestu leyti dregið sig út úr verkefninu og er það í dag fjármagnað af Akureyrarbær. Ráðherra mennta og barnamála veitt VMÍ styrk til að endurskilgreina og þróa starfsemina áfram og hefur SSNE verið falin verkefnastjórn í því verkefni. Tekin hafa verið viðtöl við fjölmarga hagsmunaaðila bæði tengt vetraríþróttagreinum sem og forstöðumenn þeirra innviða sem tengjast verkefninu.
Stjórn VMÍ horfir í dag til þess að útvíkka starfsemi VMÍ og horfa meðal annars til fleiri vetraríþróttagreina sem og breiðara samstarfs. Þá er horft til þess að VMÍ taki til afreksíþrótta, íþróttaiðkunnar barna og unglinga, vetraríþrótta fyrir almenning og vetraríþrótta fyrir ferðamenn, bæði innlendra sem og erlendra.
Í tengslum við áframhaldandi þróun og aukið samstarf er leitað til sveitarfélaga á Norðurlandi um afstöðu þeirra til þess að koma að verkefninu.

Lögð fram tillaga deildarstjóra stjórnsýslu og fjármáladeildar yfir greiðslur og skiptingu framlags til stjórnmálasamtaka fyrir árið 2023. Lagt er til að úthlutað verði í samræmi við ákvæði 5. gr. laga nr. 162/2006 eftir kjörfylgi í kosningum 2022 og rúmast innan gildandi fjárhagsáætlunar 2023.

Lögð er fram umsagnarbeiðni frá Sýslumanninum á Norðurlandi eystra vegna umsóknar um tímabundið áfengisleyfi vegna lengri opnunartíma fyrir Höllinna veitingahús ehf , í tilefni af dansleik að kvöldi 26.des nk.

Lagt fram dreifibréf frá menningar- og viðskiptaráðuneytinu þar sem nú stendur yfir vinna við tilnefningu sundlaugamenningar á skrá UNESCO yfir óáþreifanlegan menningararf mannkyns. Um er að ræða fyrstu sjálfstæðu tilnefningu Íslands á skrána en áður hefur Ísland, ásamt Norðurlöndunum, staðið að tilnefningu á handverki við smíði súðbyrðinga á skrána. Skrár UNESCO á sviði menningararfs hafa reynst mjög áhrifamiklar og felst í slíkri skrásetningu ákveðinn heiður og viðurkenning á viðkomandi hefð og sérstöðu hennar fyrir land og þjóð. Því er um að ræða stórt og mikilvægt skref að Ísland standi nú að tilnefningu á sundlaugamenningu.
Verkefnið hefur hlotið verðskuldaða athygli og jákvæð viðbrögð í samfélaginu. Sundlaugamenning á Íslandi er sannarlega útbreidd hefð sem mikill meirihluti landsmanna stundar. Nýjar kannanir sýna að 79% fullorðinna landsmanna fer í sund og þar af fer um 40% reglulega í sund. Þá er ótalin sundiðkun barna og ungmenna. Vegna þessarar miklu útbreiðslu hafa margir nú þegar lagt tilnefningunni lið og lýst stuðningi við hana.
Flest sveitarfélög landsins reka almenningssundlaugar. Að auki reka þau grunnskóla þar sem sundkennsla barna fer fram. Sveitarfélög gegna því veigamiklu hlutverki í sundlaugamenningu landsmanna.
Tilnefning á skrá UNESCO verður ekki að veruleika nema með samþykki og stuðningi þeirra sem þekkja og stunda viðkomandi hefð. Eins og að framan greinir gegna sveitarfélögin mikilvægu hlutverki í sundlaugamenningu á Íslandi. Þess vegna leitum við til ykkar eftir samtali og stuðningi við tilnefninguna.

Lögð fram umsókn um rekstrarstyrk til Kvennaathvarfs á Norðurlandi.

Með umsókn dagsettri 12. desember 2023 sækja Guðbrandur Kristinn Jónasson og Guðný Halldórsdóttir eftir endurnýjun lóðarleigusamnings við Þormóðsgötu 34 á Siglufirði. Einnig lagt fram lóðarblað tæknideildar dags. 19.12.2023.

Á 224. fundi bæjarstjórnar Fjallabyggðar var samþykkt að hækka álagningarhlutfall útsvars árið 2023 í kjölfar samkomulags milli Sambands íslenskra sveitarfélaga og þriggja ráðuneyta um sérstaka viðbótarfjármögnun á þjónustu við fatlað fólk. Gert var ráð fyrir að útsvarsálagning sveitarfélaga myndi hækka um 0,22% árið 2023 gegn samsvarandi lækkun tekjuskattsálagningar ríkisins.
Komi til sams konar breyting á álagningarhlutfalli útsvars fyrir árið 2024 er bæjarráði falin heimild skv. 5. mgr. 31. gr. og 32. gr. samþykktar um stjórn Fjallabyggðar til að fullnaðarafgreiða málið fyrir 31.12.2023.

Á 237. fundi bæjarstjórnar Fjallabyggðar - málsnr. 2311033 var bæjarráði Fjallabyggðar falin heimild skv. 5. mgr. 31. gr. og 32. gr. samþykktar um stjórn Fjallabyggðar til að fullnaðarafgreiða málið fyrir 31.12.2023 ef til kæmi sams konar breyting á álagningarhlutfalli útsvars fyrir árið 2024.

Fyrir liggur samkomulag á milli ríkis og sveitarfélaga, dags. 15.12.2023, varðandi fjármögnun þjónustu við fatlað fólk og hækkun útsvarsálagningar.

Eftirfarandi tillaga lögð fram.
Með vísan til ákvæða varðandi breytingu á fjármögnun á þjónustu við fatlað fólk í fyrirliggjandi samkomulagi milli ríkis og sveitarfélaga, dags. 15.12.2023, er byggir á breytingu á lögum um tekjustofna sveitarfélaga sem samþykkt var á Alþingi 15.12.2023, samþykkir bæjarráð Fjallabyggðar, á grundvelli heimildar til fullnaðarafgreiðslu að álagningahlutfall útsvars fyrir árið 2024 hækki um 0,23% og verði 14,93%.

Fundargerðir 56., 57. og 58. fundar stjórnar Samtaka sveitarfélaga og atvinnuþróunar á Norðurlandi eystra lagðar fram til kynningar.

Fundargerð 39. fundar skólanefndar Tónlistarskólans á Tröllaskaga lögð fram til kynningar.