Bæjarráð Fjallabyggðar

Deildarstjóri fræðslu-, frístunda- og menningarmála mætti til fundarins og fór yfir verkefni deildarinnar.

Á 122. fundi fræðslu-, og frístundanefndar, þann 6. mars sl. var reglum um sérstakan stuðning Fjallabyggðar við starfsfólk Leikskóla Fjallabyggðar sem jafnframt eru í námi í leikskólakennarafræðum vísað til umfjöllunar og samþykktar bæjarráðs.

Skólastjóri Leikskóla Fjallabyggðar hefur sagt upp starfi sínu. Starfslok verða 30. júní nk.
Lagt er fram vinnuskjal deildarstjóra fræðslu-, frístunda- og menningarmála um að hefja ráðningarferli nýs skólastjóra.

Lagt fram tilboð og verklýsing Áhættulausna ehf. vegna útboðs í vátryggingar hjá sveitarfélaginu fyrir 2024-2026. Áætlaður kostnaður er kr. 2.457.000. Lagt fram vinnuskjal deildarstjóra stjórnsýslu- og fjármáladeildar þar sem fram kemur að vátryggingar sveitarfélagsins þarf að bjóða út á EES svæðinu. Lagt er til að gengið verði til samninga við Áhættulausnir ehf. sem sérhæfir sig í ráðgjöf til fyrirtækja og stofnana á sviði vátrygginga og áhættugreiningar.

Lagt fram minnisblað deildarstjóra tæknideildar vegna aðgengismála að íþróttahúsi að sunnanverðu.

Lagt fram fundarboð til aðalfundar Lánasjóðs sveitarfélaga sem haldinn verður föstudaginn 31. mars 2023 á Grand Hótel Reykjavík.

Lagt fram dreifibréf Sambands íslenskra sveitarfélaga til allra sveitarstjórna um innleiðingu heimsmarkmiðanna hjá sveitarfélögum og hvatningu um að öll sveitarfélög svari fyrir 31. mars nk. könnun í tilefni af skýrslugerð Íslands til Sameinuðu þjóðanna í júlí nk.

Lagt fram fundarboð stjórnar Stapa lífeyrissjóðs til fulltrúaráðsfundar sjóðsins sem haldinn verður miðvikudaginn 12. apríl 2023.

Lagðar fram nýjar reglur Barnaverndarþjónustu Mið - Norðurlands um veitingu fjárstyrks til greiðslu lögmannskostnaðar sbr. 47.gr. barnaverndarlaga nr. 80/2002.
Reglurnar voru unnar af aðilum fagráðs Barnaverndarþjónustu Mið - Norðurlands sem samþykkti reglurnar fyrir sitt leyti 13. mars sl. og vísaði þeim til umfjöllunar framkvæmdaráðs og til afgreiðslu hjá hverri sveitarstjórn aðildarfélaga Barnaverndarþjónustu Mið - Norðurlands. Reglurnar voru kynntar á framkvæmdaráðsfundi 16. mars s.l.

Samband íslenskra sveitarfélaga efnir til opins fjarfundar undir yfirskriftinni Samræmd fræðsla og upplýsingagjöf sem ein undirstaða hringrásarhagkerfis miðvikudaginn 22. mars kl. 10:00 til 11:30.
Tilefnið eru breytingar á ýmsum lögum vegna innleiðingar hringrásarhagkerfis sem innleiddar voru í íslenskt regluverk í júní 2021 og komu til framkvæmda um síðustu áramót. Í lögunum er lögð áhersla á fræðslu til almennings og lögaðila og bera Umhverfisstofnun, sveitarfélög, Úrvinnslusjóður og Endurvinnslan ákveðna ábyrgð á henni. Á fundinum verður kynnt sú fræðsla sem lykilaðilar til að koma á hringrásarhagkerfi munu standa fyrir á næstunni.

Innviðaráðuneytið vekur athygli á því að í samráðsgátt stjórnvalda hafa verið kynntar gagngerar breytingar á regluverki Jöfnunarsjóðs sveitarfélaga. Breytingarnar miða að því að bæta gæði jöfnunar og einfalda útreikninga og skipulag sjóðsins. Þá er það markmið að umgjörð sjóðsins endurspegli og fylgi þróun sveitarfélagagerðarinnar. Umsagnarfrestur er til 27. mars nk.
Skýrsla starfshóps um endurskoðun á regluverki Jöfnunarsjóðs sveitarfélaga, drög að frumvarpi til nýrra heildarlaga um Jöfnunarsjóð sveitarfélaga, sem byggja á niðurstöðum starfshópsins, auk frekari umfjöllunar má finna í samráðsgátt stjórnvalda og á vef ráðuneytisins.

Lagt fram dreifibréf SSNE þar sem vakin er athygli á því að drög að hvítbók um samgöngumál og umhverfismatsskýrsla hefur verið birt á Samráðsgátt stjórnvalda.

Forsætisráðuneytið í samstarfi við Stofnun stjórnsýslufræða og stjórnmála stendur fyrir málþingi um samspil stjórnmálamanna og embættismanna á tímum stöðugra umbreytinga, aukinna krafna og alþjóðlegra áskorana. Tilefnið er að forsætisráðherra hefur skipað starfshóp sem ætlað er að fjalla um hlutverk og starfsskilyrði embættismanna með hliðsjón af þróun í nágrannalöndunum. Málþingið, sem fer fram á ensku, verður haldið fimmtudaginn 23. mars nk. á Hilton Nordica hótelinu í Reykjavík.

Fundargerð aðalfundar Flokkun Eyjafjarðar ehf. lögð fram til kynningar.
Einnig fundargerð stjórnarfundar Flokkun Eyjafjarðar ehf. og ársreikningur ársins 2022.

Fundargerð aðalfundar Moltu ehf. frá 15. mars 2023 lögð fram til kynningar.