Vatnsveita í Brimnesdal

Deildarstjóra tæknideildar falið að hefja undirbúning á vatnstöku í Brimnesá. Nýtt inntaksmannvirki skal geta veitt vatni inn á miðlunartank sveitafélagsins og þannig aukið til muna almenna afkastagetu til sveiflujöfnunar sem og til slökkvistarfs. Inntakið á einnig að geta tengst veitu til stórnotenda. Inntakið skal útbúið með þeim hætti að líkur á lit og óhreinindum í vatni séu lágmarkaðar með viðunandi síun, líkt og gert er í Hólsdal. Frumdrög að lausn óskast kynnt í bæjarráði innan þriggja vikna.

Bæjarráð felur deildarstjóra tæknideildar að hefja og klára forhönnun á nýrri lögn meðfram Aðalgötu og niður að hafnarsvæði og sem og endurbætur á vatnstöku Múlalindar. Tæknideild ber að tryggja samlegðaráhrif af öðrum fyrirhuguðum gatnaframkvæmdum. Ekki er hægt að klára hönnun á nýju inntaki í Brimnesá fyrr en farvegurinn er orðinn snjólaus, en nákvæm staðsetning á vatnsinntaki er nauðsynleg til að ákvarða útfærslu á tengingu við bæjarkerfið. Halda þarf áfram vinnu við að tryggja aðgengi að varavatnsbóli utan Brimnesdals.