Á árinu 2012 má gera ráð fyrir töluverðum breytingum á almenningssamgöngum milli Siglufjarðar og Ólafsfjarðar sem
og akstri til Dalvíkur og Akureyrar þar sem sveitarfélögin í Eyþingi munu væntanlega taka við því verkefni af
Vegagerð ríkisins um áramót.
Í fjárhagsáætlun fyrir árið 2012 er gert ráð fyrir fjármagni til gatna- og gangstétta framkvæmda og er ætlunin að
setja upp biðskýli og merkja stoppistöðvar sérstaklega. Áætlað er að stoppistöðvar
verði þrjár í hvorum byggðarkjarna og er gert ráð fyrir að framkvæmdum verði lokið í byrjun sumars.
Stefnt er að því að í júní verði búið að koma á reglubundnum ferðum á milli Siglufjarðar og Akureyrar með
þremur ferðum á dag alla daga vikunnar nema á sunnudögum þá verður um að ræða eina ferð.
Fram að þeim tíma verða stoppistöðvar á eftirfarandi stöðum:
· Farið verður frá
Ólafsfirði frá Íþróttamiðstöðinni og stoppað við gatnamót Aðalgötu/Ægisbyggðar/Ólafsvegar.
· Þegar komið verður til
Ólafsfjarðar verður ekki stoppað við gatnamót Aðalgötu/Ægisbyggðar/Ólafsvegar, heldur farið beint á aðalstoppistöð, sem
verður annað hvort við Menntaskólann á Tröllaskaga, Tjarnarborg eða íþróttamiðstöðina, samkvæmt akstursplani hverju
sinni.
· Þegar farið verður
frá Siglufirði verður farið frá Grunnskólanum við Hlíðarveg eða Ráðhústorgi (fer eftir aksturplani) og stoppað verður
við gatnamót Snorragötu/Norðurtúns.
· Þegar komið verður til
Siglufjarðar verður stoppað við gatnamót Norðurtúns/Hafnartúns, sé þess óskað. Svo á hefðbundnum stoppistöðum
þ.e. við ráðhústorg, grunnskóla og íþróttamiðstöð, samkvæmt akstursplani hverju sinni.
Sigurður Valur Ásbjarnarson
Bæjarstjóri
