List á landamæra í Iðjunni

Hátíðin á Norðurlandi er vettvangur viðburða og stendur frá 3.–22. maí.

Markmið Listar án landamæra er að auka aðgengi, fjölbreytni og jafnrétti í menningarlífinu. Að koma list fólks með fötlun á framfæri og koma á samstarfi á milli fatlaðs og ófatlaðs listafólks. Sýnileiki ólíkra einstaklinga er mikilvægur, bæði í samfélaginu og í samfélagsumræðunni og hefur bein áhrif á jafnrétti á öllum sviðum. Það er von aðstandenda hátíðarinnar að sem flestir komi og njóti þess sem um er að vera.

Iðjan á Siglufirði tekur þátt í List án landamæra og verður Opið hús í Iðjunni, Aðalgötu 7. fimmtudaginn 8. maí og föstudaginn 9. maí milli kl. 09:00 - 17:00. Handverkssýning, tónlist og ljóðalestur.

Af öðrum dagskrárliðum Listar án landamæra á Norðurlandi má nefna:

Á Húsavík verður opið hús, vormarkaður og kaffihúsastemning í Miðjunni laugardaginn 17. maí kl. 14–16. Í Samkomuhúsinu á Húsavík verða þrjár sýningar sunnudaginn 18. maí á Stuttmyndinni X kl. 13, 15 og 17. Þetta er hetjustuttmynd byggð á Þrymskviðu og hinum japönsku sentai ofurhetjum en myndin er unnin í samstarfi við Sam og Marinu Rees.

Vorfánar og alls konar myndir munu dagana 9.–23. maí prýða verslunina Eymundsson á Akureyri. Það eru verk eftir notendendur í Skógarlundi sem mynda sýninguna en hún er opin á opnunartíma verslunarinnar.

Garðurinn blómstar í Skógarlundi fimmtudaginn 15. maí og föstudaginn 16. maí kl. 9-11 og 13–15.30. Þá er gestum og gangandi boðið að koma í heimsókn. Í garðinum verða sýnd verk notenda sem eru unnin undir handleiðslu myndlistarkonunnar Aðalheiðar S. Eysteinsdóttur og starfsmannafélag Skógarlunds mun selja veitingar.