Bæjarstjórn Fjallabyggðar tekur undir bókun bæjarstjórnar Akureyrar um Reykjavíkurflugvöll

Mynd: www.isavia.is

Á fundi bæjarstjórnar Fjallabyggðar í gær, miðvikudaginn, 10. febrúar, var samþykkt tillaga Steinunnar Maríu Sveinsdóttur að taka undir bókun bæjarstjórnar Akureyrar þar sem skorað er á ríkisstjórn Íslands og borgarstjórn Reykjavíkur að tryggja óskerta starfsemi Reykjavíkurflugvallar.

Eftirfarandi var bókað:

Bæjarstjórn Fjallabyggðar tekur undir bókun bæjarstjórnar Akureyrar sem samþykkt var þann 2. febrúar sl., þar sem skorað er á ríkisstjórn Íslands og borgarstjórn Reykjavíkur að tryggja óskerta starfsemi Reykjavíkurflugvallar, a.m.k. þar til að jafngóð eða betri lausn finnst svo ekki verði dregið úr öryggi íbúa landsbyggðanna.

Bókunin er eftirfarandi:

"Bæjarstjórn Akureyrar skorar á ríkisstjórn Íslands og borgarstjórn Reykjavíkur að tryggja óskerta starfsemi Reykjavíkurflugvallar og tryggja þar með öryggishagsmuni íbúa landsbyggðanna, a.m.k. þangað til jafngóð eða betri lausn finnst. Það er með öllu ólíðandi að dregið verði úr öryggi sjúklinga og slasaðra sem þurfa að komast með hraði á Landspítalann þar sem staðsett er sérhæfð þjónusta s.s. hjartaþræðingar, heila- og taugaskurðlækningar og vökudeild.

Árið 2015 voru 752 einstaklingar fluttir í sjúkraflugi þar af rúmlega 85% með flugvélum Mýflugs og tæplega 15% með þyrlum Landhelgisgæslunnar.

Því miður er óraunhæft að ætla að í náinni framtíð skapist þær aðstæður í íslenskri heilbrigðisþjónustu að ekki verði þörf á að koma mörgum af erfiðustu tilfellunum sem koma upp á landsbyggðunum á Landspítalann við Hringbraut.

Mikilvægt er að aðgengi íbúa landsbyggðanna að öflugustu heilbrigðisþjónustu landsmanna sé tryggt".