Skipulags- og umhverfisnefnd Fjallabyggðar

Lögð voru fram drög að lýsingu vegna skipulagsvinnu við Leirutanga, þar sem gert verður ráð fyrir tjaldsvæði, athafnasvæði, útivistarsvæði og fuglafriðlandi. Nefndin gekk frá kaflanum "Áherslur skipulags- og umhverfisnefndar" og leggur til að lýsingin verði samþykkt og auglýst í samræmi við ákvæði skipulagslaga.

Lögð fram umsögn Sambands íslenskra sveitarfélaga um tillögu skipulagsstofnunar að landsskipulagsstefnu 2015-2026.

Nefndin gerir ekki athugasemdir við tillöguna.

Lagt fram bréf Verkís fyrir hönd sveitarfélagsins Skagafjarðar. Þar er kynnt breyting á aðalskipulagi sveitarfélagsins vegna Gönguskarðsárvirkjunar. Athugasemdir vegna þessa skulu berast fyrir 11.febrúar til skipulags- og byggingarfulltrúa Skagafjarðar.

Nefndin gerir ekki athugasemdir við tillöguna.

Sirkus Íslands kannar möguleika á að vera með sýningu í Fjallabyggð á tímabilinu 28.júlí-10.ágúst.

Nefndin fagnar komu Sirkus Íslands í Fjallabyggð og bendir á að sýningahald er mögulegt í báðum byggðarkjörnum.

Bás ehf. sækir um úthlutun á lóðum nr. 12 og 2 við Ránargötu á Siglufirði. Hugmyndir Bás ehf. er að reisa iðnaðarhúsnæði á lóð nr.12. Á lóð nr. 2 eru uppi hugmyndir um að þar verði steypustöð og efnisvinnsla ásamt efnisgeymslu.

Nefndin samþykkir að úthluta Bás ehf. lóð nr.12 við Ránargötu. Lóð nr.2 er ekki hæf til úthlutunar fyrr en búið er að ganga frá lóðinni í samræmi við deiliskipulag.

Lagðar fram breytingar á gjaldskrám fyrir þjónustumiðstöð, vatnsveitu og fráveitu. Breytingin felur í sér viðbót vegna útseldrar vinnu starfsmanna.

Erindi samþykkt.

Lagt fram til kynningar bréf frá Vegagerðinni. Þar kemur fram að Vegagerðin stefni að því að hefja framkvæmdir sjóvarna á Siglunesi sem fyrst, þar sem öll tilskilin leyfi og skilyrði hafi verið uppfyllt.