Skipulags- og umhverfisnefnd Fjallabyggðar

Lagt fram erindi svæðisskipulagsnefndar Eyjafjarðar dags. 4.10.2023. Þar kemur m.a. fram að ákveðið hafi verið á síðasta ári að fara í endurskoðun svæðisskipulags og að greina þurfi hvort þörf sé á heildar endurskoðun svæðisskipulags eða einstakra kafla.

Svæðisskipulagsnefndin óskar eftir að umræða verði tekin í skipulagsráðum/nefndum og sveitarstjórnum sveitarfélaganna um endurskoðun og framtíð svæðisskipulags Eyjafjarðar.

Með umsókn dagsettri 17. október 2023 sækja Valtýr Sigurðsson og Sigurður Valtýsson eftir endurnýjun lóðarleigusamnings við Suðurgötu 80 á Siglufirði. Einnig lagt fram lóðarblað tæknideildar dags. 18.10.2023.

Lagt fram erindi Aðalheiðar S. Eysteinsdóttur dags. 13.10.2023. Óskað er eftir úthlutun lóðarinnar Túngötu 22 og að hún verði sameinuð lóð Alþýðuhússins að Þormóðsgötu 11-15. Markmið Aðalheiðar er að koma upp skúlptúra garði á lóðinni sem opinn verður gestum og heimamönnum. Einnig óskað eftir leyfi til að byggja steyptan vegg til að afmarka garðinn til vesturs.

Tekið fyrir að nýju erindi eiganda Sandvalla í Héðinsfirði þar sem óskað er eftir leyfi fyrir breyttri tilhögun áður samþykktrar verkframkvæmdar á bakkavörn við veiðihús á Sandvöllum sem unnin er í samstarfi við Landgræðsluna. Breytingin felur í sér í megindráttum að í stað þess að nota staura í bakkavörnina, verður notast við efni úr fjöruborði Héðinsfjarðar. Er það mat landeigenda að betur færi á því ef notað yrði efni á staðnum sem falli betur að landslagi og sé jafnvel betur fallið til þess að verja bakka Sandvalla. Einnig lagt fyrir samþykki Fiskistofu fyrir framkvæmdinni dags. 10.10.2023 og samþykki landeigenda Víkur í Héðinsfirði. Heimild Fiskistofu gildir til 1. apríl 2024.

Lögð fram drög að endurskoðuðum reglum um úthlutun lóða í Fjallabyggð.