Skipulags- og umhverfisnefnd Fjallabyggðar

Lagt fram minnisblað skipulagsfulltrúa dags. 24.5.2023 þar sem fjallað er um fyrsta áfanga deiliskipulags vegna þéttingar byggðar. Markmiðið er að tryggja áfram framboð íbúðarlóða í sveitarfélaginu og nýta það byggingarland sem er að finna innan þéttbýlismarka Siglufjarðar og Ólafsfjarðar. Í samræmi við tillögu nefndarinnar frá 29.3.2023 er lagt til að hafist verði handa við deiliskipulag suðurbæjar á Siglufirði skv. meðfylgjandi afmörkun þar sem gert er ráð fyrir 17 nýjum lóðum.

Lögð fram kynning á fyrstu drögum að deiliskipulagi hafnarsvæðis á Siglufirði.

Lögð fram tillaga að deiliskipulagi kirkjugarðs við Saurbæjarás ásamt breytingu á Aðalskipulagi Fjallabyggðar 2020-2023. Tillögurnar voru kynntar fyrir opnu húsi þann 22. maí sl.

Lögð fram tillaga að deiliskipulagi brimbrettaaðstöðu við Brimnestungu í Ólafsfirði ásamt breytingu á Aðalskipulagi Fjallabyggðar 2020-2023.

Á 230. fundi bæjarstjórnar var lögð fram bókun þess efnis að tæknideild væri falið að kanna frekar svæðið við Brimnes (ofan Ólafsfjarðarvegar) fyrir framtíðar kirkjugarð Ólafsfjarðar, skv. sömu mælikvörðum og aðrir valkostir hafa verið greindir. Lögð fram greining svæða sem lögð voru til sem framtíðar kirkjugarðar í Ólafsfirði þar sem svæðið við Brimnes er skoðað og greint með sama hætti.

Lögð fram umsókn dags. 3.5.2023 þar sem Sigrún S. Þór Björnsdóttir og Sigurbjörn Pálsson sækja um endurnýjun lóðarleigusamnings við Norðurgötu 4a á Siglufirði. Einnig lagt fram lóðarblað tæknideildar dags. 19.5.2023.

Lögð fram umsókn dags. 3.5.2023 þar sem Sindri Ólafsson sækir um endurnýjun lóðarleigusamnings fyrir Aðalgötu 16 á Siglufirði. Einnig lagt fram lóðarblað tæknideildar dags. 19.5.2023.

Lögð fram umsókn dags. 26.5.2023 þar sem Sæunn Gunnur Pálmadóttir sækir um endurnýjun lóðarleigusamnings fyrir Kirkjuveg 17. Einnig lagt fram lóðarblað tæknideildar dags.31.5.2023.

Lagt fram erindi dags. 23.5.2023 þar sem Þorleifur Gestsson sækir um stækkun lóðar sinnar við Aðalgötu 21, um 2,6m til suðurs skv. meðfylgjandi lóðarblaði.

Lögð fram umsókn um byggingarleyfi dagsett 12.5.2023 þar sem Hörður Björnsson og Guðrún Gunnarsdóttir sækja um leyfi fyrir byggingu bíslags á vesturhlið neðri hæðar í samræmi við meðfylgjandi teikningar.

Lögð fram umsókn um byggingarleyfi dagsett 23.5.2023 þar sem Ragnar Freyr Guðmundsson sækir um byggingarleyfi fyrir hönd Fríðu Bjarkar Gylfadóttur. Sótt er um leyfi fyrir viðbyggingu til suðurs á Túngötu 37. Tillagan hefur verið grenndarkynnt aðliggjandi lóðarhöfum án athugasemda.

Lögð fram umsókn um byggingarleyfi dagsett 24.5.2023 þar sem Ragnar Freyr Guðmundsson sækir um byggingarleyfi fyrir hönd Pauline Joy Richard. Sótt er um leyfi fyrir tengibyggingu milli tveggja húsa sem eru í dag á lóðinni Þormóðsgötu 20, skv. meðfylgjandi aðaluppdráttum.

Lögð fram umsókn um byggingarleyfi dagsett 31.5.2023 þar sem Fjallabyggð sækir um leyfi fyrir viðbyggingu skólahúss við Tjarnarstíg 3 í Ólafsfirði.

Lögð fram umsókn dags. 1.6.2023 þar sem Ólafur Helgi Halldórsson sækir um endurnýjun byggingarleyfis sem samþykkt var á fundi nefndarinnar þann 4.6.2020. Byggingarleyfið felur í sér að breyta kvist á norðurhlið hússins og endurnýjun járns á þaki.

Lagt fram erindi formanns f.h. nefndarinnar þar sem óskað er eftir því að tæknideild leggi fyrir nefndina uppfærðan, útvíkkaðan uppdrátt af hönnun tjaldsvæðis Ólafsfjarðar sem samþykkt var árið 2016. Hönnunin þarf að taka mið af notkun svæðisins bæði á sumri og vetrum.

Marlis Sólveig Hinriksdóttir sendi inn erindi dags. 14.5.2023 þar sem fjallað er um umsókn byggingarleyfis fyrir endurbyggingu húss við Suðurgötu 49. Jafnframt var óskað eftir upplýsingum um málsmeðferð umsóknar um byggingarleyfi til að rífa fasteignina Suðurgötu 49 auk afrits af starfsleyfi frá heilbrigðiseftirliti.

Lagt fram erindi Kristjáns L. Möller f.h. RÆS minningarfélags um síldarstúlkuna á Siglufirði. Óskað er eftir leyfi til að byggja landfestingu/undirstöður fyrir væntanlega bryggju sem áætlað er að byggja undir listaverkið Síldarstúlkan á Siglufirði. Umsóknin er sett fram til að vinna tíma vegna væntanlegrar bryggjusmíði. Framkvæmdin er að öllu leyti afturkræf.

Lögð fram tillaga að breytingu gjaldskrár og samþykkt frístundalóða í landi Fjallabyggðar. Breyting á gjaldskrá felur í sér vísun í grunn byggingavísitölu frá 2021 þar sem búið er að leggja niður þá vísitölu sem vísað er í í núgildandi gjaldskrá. Einnig er lögð til breyting á ofangreindri samþykkt þar sem felld er út síðasta setning 9.gr. til samræmis við 2.gr. gjaldskrár fyrir frístundalóðir í landi Fjallabyggðar.

Lögð fram kostnaðaráætlun frá Ástu Hermannsdóttur hjá fornleifadeild Byggðarsafns Skagfirðinga vegna uppfærslu á skráningu fornleifa í Hólsdal.

Lögð fram fyrirspurn Fanneyjar Hauksdóttur hjá AVH ehf. f.h. Árna Helgasonar ehf. vegna hugmynda um að breyta Aðalgötu 14 í gististað með um 7 herbergjum og veitingaþjónustu fyrir um 20 gesti. Jafnframt er óskað eftir viðræðum við Fjallabyggð um nýtingu og útfærslu á svæði framan við bygginguna.

Lagt fram til kynningar erindi Skógræktarfélags Íslands þar fjallað er um
rangfærslur sem nýlega voru sendar sveitarfélögum um skógrækt. Stjórn Skógræktarfélags Íslands varar við neikvæðum málflutningi andstæðinga skógræktar og lýsir sig reiðubúna til að veita upplýsingar og halda áfram að vinna með stjórnvöldum og sveitarfélögum landsins að því að klæða landið, gera það byggilegra og náttúruvænna með skipulagðri skógrækt.