Fræðslu- og frístundanefnd Fjallabyggðar

Á fundinn mætti forstöðumaður íþróttamannvirkja Haukur Sigurðsson.
Forstöðumaður leggur til við fræðslu- og frístundanefnd að því fyrirkomulagi að kynjaskipta aðgengi að gufubaðinu í íþróttamiðstöð Siglufjarðar verði hætt en til vara verði fyrirkomulaginu framhaldið en eingöngu fyrir hádegi.
Nefndin samþykkir tillögu forstöðumanns að kynjaskipt verði fyrir hádegi líkt og verið hefur og síðan opið öllum og jafnframt að gufubaðið verði opið alla daga.

Haukur Sigurðsson forstöðumaður íþróttamannvirkja kynnti úthlutun á frítímum í íþróttamannvirkjum Fjallabyggðar til aðildarfélaga UÍF. Fræðslu- og frístundanefnd samþykkir úthlutunina fyrir sitt leyti.

Haukur vék af fundi kl. 17:21

Á fundinn mættu Olga Gísladóttir leikskólastjóri, Berglind Hrönn Hlynsdóttir fulltrúi starfsmanna og Katrín Sif Andersen fulltrúi foreldra. Olga fór yfir starfsáætlun leikskólans fyrir skólaárið 2016 - 2017. Fræðslu- og frístundanefnd þakkar Olgu kynninguna og staðfestir starfsáætlun leikskólans.

Olga, Berglind Hrönn og Katrín Sif véku af fundi kl. 17:41

Á fundinn mættu Jónína Magnúsdóttir skólastjóri Grunnskóla Fjallabyggðar og Sigurlaug Guðjónsdóttir fulltrúi kennara.
Jónína fór yfir beiðni hennar um að fá að framkvæma starfendarannsókn á störfum sínum sem skólastjóri við Grunnskóla Fjallabyggðar. Rannsóknin verður unnin í tengslum við meistaraprófsverkefni hennar við Félagsvísindadeild Háskólans á Bifröst.
Fræðslu- og frístundanefnd samþykkir beiðni Jónínu.

Jónína Magnúsdóttir skólastjóri fór yfir starfsáætlun Grunnskóla Fjallabyggðar fyrir skólaárið 2016 - 2017. Fræðslu- og frístundanefnd þakkar Jónínu kynninguna og staðfestir starfsáætlun grunnskólans.

Jónína Magnúsdóttir kynnti símenntunaráætlun Grunnskóla Fjallabyggðar fyrir skólaárið 2016 - 2017. Um leið og fræðslu- og frístundanefnd þakkar Jónínu kynninguna vill hún hvetja kennara, leiðbeinendur og aðra starfsmenn skólans að nýta þau tækifæri sem gefast til að sækja sí- og endurmenntunarnámskeið þannig að þeir eflist í starfi.

Jónína og Sigurlaug véku af fundi kl. 18:32

Lögð fram umsókn um námsvist grunnskólanema utan lögheimilssveitarfélags.
Samþykkt.

Kristinn J. Reimarsson deildarstjóri fræðslu-, frístunda- og menningarmála kynnti helstu áherslur í starfi félagsmiðstöðvarinnar fyrir veturinn 2016 - 2017. Fræðslu- og frístundanefnd leggur til að skoðað verði að hafa skipulagt starf fyrir 5. - 7. bekk.