Fræðslu- og frístundanefnd Fjallabyggðar

Forstöðumaður íþróttamiðstöðvar sat undir þessum lið og fór yfir opnunartíma sundlauga og Íþróttamiðstöðvar Fjallabyggðar í vetur. Fræðslu- og frístundanefnd felur forstöðumanni að skoða möguleika á lengri opnun 1-2 skipti í viku líkt og síðasta vetur.

Undir þessum lið sátu Erla Gunnlaugsdóttir skólastjóri Grunnskóla Fjallabyggðar og Brynhildur Reykjalín Vilhjálmsdóttir fulltrúi kennara. Skólastjóri fór yfir byrjun skólaárs í grunnskólanum. Nemendafjöldi grunnskólans er nú 211. Skólastarf fer vel af stað.

Undir þessum lið sátu Erla Gunnlaugsdóttir skólastjóri Grunnskóla Fjallabyggðar og Brynhildur Reykjalín Vilhjálmsdóttir fulltrúi kennara. Skólastjóri kynnti skýrslu um innra mat grunnskólans frá síðasta ári sem unnið er í samstarfi við Ásgarð ehf. (áður Trappa ehf.). Fræðslu- og frístundanefnd lýsir ánægju sinni með ítarlega og greinargóða skýrslu. Niðurstaða innra mats síðasta skólaárs er mjög jákvæð.

Deildarstjóri fræðslu-, frístunda- og menningarmála fór yfir dagskrá og fyrirkomulag Frístundar á haustönn 2021. Frístund er samstarfsverkefni Fjallabyggðar, grunnskólans, íþróttafélaga og tónlistaskólans. Nemendum í 1.-4. bekk gefst kostur á að sækja félagsstarf, íþróttaæfingar eða tónlistarnám á tímabilinu kl. 13:35 - 14:35 eða strax að loknum skólatíma. Að Frístund lokinni tekur Lengd viðvera við fyrir þau börn sem það þurfa og er hún til kl. 16:00.
Mjög góð þátttaka er í Frístund og hefur hún vaxið ár frá ári. Fræðslu- og frístundanefnd vill þakka þeim sem að Frístund koma frábært samstarf.

Deildarstjóri fræðslu-, frístunda- og menningarmála kynnti fundarmönnum fyrirhugað upphaf starfs í félagsmiðstöðinni Neon. Nýtt húsnæði Neon er ekki tilbúið til notkunar og mun Fjallabyggð framlengja leigusamning við Siglunes guesthouse og verður félagsmiðstöðin starfrækt á sama stað og undanfarin ár, fram að áramótum. Karen Sif Róbertsdóttir verður umsjónarmaður Neon í vetur og með henni eru sömu starfsmenn og síðastliðinn vetur.