Fræðslu- og frístundanefnd Fjallabyggðar

Lögð fram drög að reglum um húsaleigustyrki Fjallabyggðar til UÍF og aðildarfélaga. Reglurnar eru um úthlutun á svo kölluðum frítímum til aðildarfélaga UÍF. Almenna reglan er að Grunnskóli Fjallabyggðar og Menntaskólinn á Tröllaskaga hafa fyrsta forgang. Íþróttafélög fá úthlutuðum tíma eftir að skólatíma lýkur til kl. 19.00 á daginn. Eftir kl. 19.00 eru tímar til almennar útleigu.
Fræðslu- og frístundanefnd samþykkir reglurnar fyrir sitt leyti.

Tillaga að sumaropnum Íþróttamiðstöðvar Fjallabyggðar frá 8. júní til 31. ágúst 3015.
Á Ólafsfirði verði Íþróttamiðstöðin opin mánudaga til fimmtudaga frá kl. 06:30 - 19:00, föstudaga frá kl. 06:30 - 19:00 og laugardaga og sunnudaga frá kl. 10:00 - 18:00.
Á Siglufirði verði opnunartími, mánudaga til fimmtudaga frá kl. 06:30 - 19:45, föstudaga 06:30 - 19:00 og laugardaga og sunnudaga frá kl. 14:00 - 18:00.
Fræðslu- og frístundanefnd samþykkir tillöguna.

Knattspyrnufélag Fjallabyggðar óskar eftir breyttu fyrirkomulagi á aksturstöflu sumaráætlunar frístundaaksturs í sumar. Er það til að koma til móts við óskir foreldra um tímasetningar á æfingatíma yngri iðkenda auk þess sem betri nýting fáist á mannskap og æfingaraðstöðu. Beiðni KF felur í sér talsverða aukningu á ferðafjölda og kostnaði þar með.
Fræðslu- og frístundanefnd samþykkir fyrir sitt leyti beiðni um breyttan aksturstíma vegna yngstu iðkendanna, en vísar beiðni um akstur fyrir eldri iðkendur til bæjarráðs.

Íþrótta- og tómstundafulltrúi gerði grein fyrir starfsemi vinnuskólans á komandi sumri. Starfstími vinnuskólans verður frá 8. júní til 7. ágúst.
Fyrir liggur að talsvert færri skráningar eru í vinnuskólann en gert var ráð fyrir. Í ljós þess, leggur fræðslu- og frístundanefnd til, að starfstími 8. bekkjar verði frá 8. júní til 7. ágúst, 3,5 tíma á dag og starfstími 9. og 10. bekkjar verði frá 7. júní - ágúst í 7 tíma á dag.
Fræðslu- og frístundanefnd samþykkir tillöguna fyrir sitt leyti, enda rúmast þessi breyting innan ramma launaáætlunar vinnuskólans.

Lagðar fram verklagsreglur um afnot af bifreiðinni YL-131, sem er í eigu Fjallabyggðar og nýtt í akstur fyrir Skálarhlíð og Grunnskóla Fjallabyggðar, auk annarra verkefna tengdum menningar, íþrótta- og æskulýðsstarfi.
Verklagsreglurnar kveða á um hvaða skilyrði þarf að uppfylla til að fá afnot af bifreiðinni.
Gjaldtaka verði eftir eknum kílómetrum, samkvæmt gjaldskrá ferðanefndar ríkisins.

Fyrir liggur tillaga íþrótta- og tómstundafulltrúa um viðauka við gjaldskrá Íþróttamiðstöðvar 2015. Nýr liður bætist við gjaldskrána vegna salarleigu ,,minniháttar mannfagnaðir og veislur" kr. 80.000.
Fræðslu- og frístundanefnd samþykkir tillöguna fyrir sitt leyti.

Rætt um húsnæðismál félagsmiðstöðvarinnar Neon. Nefndin beinir þeim tilmælum til bæjarráðs að auglýst verði eftir húsnæði undir starfsemi félagsmiðstöðvarinnar.

Fyrir liggur umsókn frá Herdísi Erlendsdóttur, um að fá að taka við frístundakortum fyrir þátttakendur á reiðnámskeið sem hún er í forsvari fyrir.
Fræðslu- og frístundanefnd samþykkir beiðnina.
Haukur vék af fundi kl. 17:30.

Skólastjóri leikskólans, Olga Gísladóttir mætti á fundinn kl. 17:30.
Fyrir liggur drög að nýjum starfsreglum um sérkennslu í Leikskóla Fjallabyggðar.
Fræðslu- og frístundanefnd frestar afgreiðslu málsins til næsta fundar.

Fyrir liggur drög að nýjum skráningar- og innritunarreglum fyrir Leikskóla Fjallabyggðar.
Fræðslu- og frístundanefnd frestar afgreiðslu málsins til næsta fundar.

Leikskólastjóri lagði fram til kynningar sjálfsmatsáætlun Leikskóla Fjallabyggðar 2015-2017.

Borist hefur umsókn um launað námsleyfi frá Gunnlaugu Björk Guðbjörnsdóttur.
Fræðslu- og frístundanefnd sér sér ekki fært að verða við beiðninni að svo stöddu, en umsóknin verður tekin til athugunar við gerð fjárhagsáætlunar næsta árs. Nefndin fagnar hins vegar áhuga umsækjanda á að auka við menntun sína.
Olga vék af fundi kl. 18:00.

Skólastjóri Grunnskóla Fjallabyggðar, Ríkey Sigurbjörnsdóttir, mætti á fundinn kl. 18:00.
Námsmatsstofnun hefur í bréfi dags. 5. maí 2015 tilkynnt að Grunnskóli Fjallabyggðar er í hópi þeirra skóla sem hefur verið valinn til ytra mats á starfi skólans. Verkefnið er fjármagnað með framlögum frá Mennta- og menningarmálaráðuneytinu og Jöfnunarsjóði sveitarfélaga.
Lagt fram til kynningar.

Lögð fram umsókn um tímabundna námsvist grunnskólanema utan lögheimilissveitarfélags.
Erindi samþykkt.
Ríkey vék af fundi kl. 18:25.

Lagt fram rekstaryfirlit fyrir mars 2015.