Fræðslu- og frístundanefnd Fjallabyggðar

Undir þessum lið sat Skarphéðinn Þórsson forstöðumaður Íþróttamiðstöðva Fjallabyggðar. Forstöðumaður lagði fram hugmynd að opnunartíma íþróttamiðstöðva á komandi vetri sem felur í sér meiri samræmingu milli opnunartíma íþróttamiðstöðva í báðum bæjarkjörnum. Nefndin tekur jákvætt í hugmynd forstöðumanns en óskar eftir að hann taki saman aðsóknartölur og leggi fyrir nefndina í ágúst. Með því móti sé hægt að skoða raunverulega nýtingu á sundlaugum og líkamsræktum sveitarfélagsins.

Undir þessum lið sat Erla Gunnlaugsdóttir skólastjóri Grunnskóla Fjallabyggðar. Skólastjóri fór yfir niðurstöður nemendakönnunar Skólapúlsins. Alls tóku 95 nemendur í 6.-10. bekk þátt í könnuninni sem er 91,3% svarhlutfall. Nefndin lýsir yfir ánægju með niðurstöður og er sérlega ánægjulegt að einelti í Grunnskóla Fjallabyggðar mælist undir landsmeðaltali. Nefndin þakkar skólastjóra kærlega fyrir yfirferðina.

Undir þessum lið sat Erla Gunnlaugsdóttir skólastjóri Grunnskóla Fjallabyggðar. Skólastjóri og deildarstjóri fræðslu-, frístunda- og menningarmála fóru yfir vinnuskjal sitt með skipulagi næsta skólaárs m.t.t. mannaflaþarfar, en ljóst er að nemendum skólans mun fjölga á milli skólaára. Fræðslu- og frístundanefnd vísar vinnuskjali skólastjóra og deildarstjóra til umfjöllunar í bæjarráði þar sem ljóst er að auka þarf lítillega heimiluð stöðugildi í kennslu.

Undir þessum lið sat Erla Gunnlaugsdóttir skólastjóri Grunnskóla Fjallabyggðar.

Lagt fyrir til kynningar bréf frá Íþrótta- og Ólympíusambandi Íslands (ÍSÍ) og Ungmennafélagi Íslands (UMFÍ) sem vilja vekja athygli á bæklingi sem gefinn hefur verið út á tíu tungumálum um ávinning þess að stunda íþróttir með íþróttafélagi. Bæklingurinn er ætlaður foreldrum barna af erlendum uppruna. Bæklingana er bæði hægt að nálgast á rafrænu formi á heimasíðum samtakanna www.isi.is og www.umfi.is en einnig á prentuðu formi á skrifstofum þeirra.
Nefndin leggur til að upplýsingar úr bréfinu verði settar á vef Fjallabyggðar og sendar leik- og grunnskóla til að hafa aðgengilegar.

Undir þessum lið sat Erla Gunnlaugsdóttir skólastjóri Grunnskóla Fjallabyggðar.
Erindi hefur borist frá nokkrum foreldrum nemenda í eldri deild Grunnskóla Fjallabyggðar þar sem þeir leggja til að fræðslu- og frístundanefnd skoði að seinka skólabyrjun nemenda í 6.-10. bekk og vísa til rannsókna sem gerðar hafa verið á áhrifum lengri svefns unglinga á líðan og námsárangur.
Fræðslu- og frístundanefnd þakkar fyrir erindið og fagnar því. Skipulagsbreytingar eins og um ræðir þarfnast góðs undirbúnings og samráðs við hagsmunaaðila. Nefndin leggur til að skoðað verði hvort þessar hugmyndir geti samrýmst þeim breytingum sem verða á skipulagi skólastarfs við flutning 5. bekkjar yfir í starfsstöðina við Tjarnarstíg haustið 2024. Nefndin vísar erindinu til úrvinnslu hjá deildarstjóra fræðslu-, frístunda- og menningarmála og skólastjóra grunnskólans.