Bæjarstjórn Fjallabyggðar

Lagt fram minnisblað bæjarstjóra og deildarstjóra félagsmáladeildar um þörf á sértækum húsnæðisúrræðum í Fjallabyggð, með áherslu á aðgengi hreyfihamlaða, með altæka hönnun að leiðarljósi þar sem tekið er mið af ólíkum þörfum íbúa.
Fram kemur að brýn þörf er á að fjölga húsnæðisúrræðum til langtímaleigu fyrir fatlað fólk og öryrkja í Fjallabyggð, með áherslu á ásættanlegar lausnir varðandi aðgengi, innhúss sem utan. Núverandi leiguíbúðarkerfi uppfyllir aðeins að hluta til þá þörf sem til staðar er í bæjarfélaginu.
Til að bæta úr þessu ástandi er mælt með að Fjallabyggð festi kaup á viðeigandi og hentugum leiguíbúðum sem flokkaðar verði sem sértæk húsnæðisúrræði fyrir fatlað fólk og öryrkja, sbr. ákvæði laga um þjónustu við fatlað fólk með langvarandi stuðningsþarfir nr. 38/2018, 2. gr. 11. töluliður. Horft er til þess að íbúar í þessum íbúðum geti búið í sjálfstæðri búsetu með stuðningi, samkvæmt þjónustumati. Einnig er horft til þess að Fjallabyggð hafi til ráðstöfunar og úthlutunar sértæk húsnæðisúrræði sem ekki krefjast aðkomu einstakra húsnæðisfélaga.
Af því tilefni er lagður fram viðauki nr. 12 við fjárhagsáætlun 2023 þar sem fjárheimildir til fjárfestinga í sértæku húsnæði sbr. ofangreint eru auknar um kr. 67.000.000 og verður mætt með lækkun á handbæru fé.

Guðjón M. Ólafsson, Helgi Jóhannsson og Sigríður Ingvarsdóttir tóku til máls.

Lögð fram tillaga H-listans vegna byggingu íbúðarhúsnæðis í Ólafsfirði

H-listinn leggur hér fram eftirfarandi tillögu í þremur liðum.
a) Að hafin verði vinna við að deiliskipuleggja svæðið norðan við hús eldri borgara í Ólafsfirði að Aðalgötu með það fyrir augum að byggja þar hentugt húsnæði, raðhús, á einni hæð.
b) Einnig verði kannað hvort skynsamlegt geti verið að breyta núverandi deiliskipulagi við Bakkabyggð og Mararbyggð þannig að hægt verði að koma þar fyrir lóðum fyrir par- og raðhús og er aðallega horft til lóða norðan við göturnar. Engar skipulagðar lóðir eru fyrir par- eða raðhús í Ólafsfirði í dag.
c) Að bæjarstjóra verði falið að hefja viðræður við leigufélögin Brák og Bríeti um aðkomu þeirra og kaupum á nýjum íbúðum í Ólafsfirði. Markmiðið er að framkvæmdir við verkefnið gætu hafist árið 2024.

Guðjón M. Ólafsson, Helgi Jóhannsson, Arnar Þór Stefánsson og S. Guðrún Hauksdóttir tóku til máls.

Kosning í bæjarráð skv. A-lið 46. gr. samþykktar um stjórn Fjallabyggðar. Forseti bæjarstjórnar lagði fram tillögu um að aðalmenn í bæjarráði yrðu: Guðjón M. Ólafsson formaður, A-lista, S. Guðrún Hauksdóttir varaformaður, D-lista og Helgi Jóhannsson, H-lista.
Til vara : Sæbjörg Ágústsdóttir A-lista, Tómas Atli Einarsson, D-lista og Þorgeir Bjarnason, H-lista.

Lagt fram erindi Gáru ehf. um leyfi til að nota þyrlu í Fjallabyggð við komu skemmtiferðaskipsins Scenic Eclipse II til Siglufjarðar þann 28. júlí 2023.

Sigríður Ingvarsdóttir og Tómas Atli Einarsson tóku til máls.