Nýtt skólaár hafið – metskráning í Frístund

Nýhafið er skólaárið 2020-2021 í Grunnskóla Fjallabyggðar. Áfram verður nemendum í 1.-4. bekk gefinn kostur á frístundastarfi strax að loknum skólatíma kl. 13.35 - 14.35. Starfið er fjölbreytt og í samstarfi við íþróttafélög, danskennara og tónlistarskólann. Nemendur eru skráðir í frístundastarfið hálfan vetur í einu. Í undanteknum tilvikum, ef gild ástæða er til, er hægt að endurskoða skráningu 25.-27. hvers mánaðar og tæki breytingin þá gildi um næstu mánaðamót á eftir.

Nú á haustönn 2020 er boðið upp á íþróttaæfingar hjá Ungmennafélaginu Glóa, Blakfélagi Fjallabyggðar, Knattspyrnufélagi Fjallabyggðar og Tennis- og badmintonfélagi Siglufjarðar. Þeir sem velja íþróttaæfingar greiða æfingargjöld til íþróttafélaga. Bjarney Lea Guðmundsdóttir danskennari býður upp á jazzdans fyrir 3-4. bekk gegn æfingargjaldi. Tónlistarskólinn á Tröllaskaga býður upp á kórstarf og Bílskúrsbandið og er það endurgjaldslaust fyrir nemendur. Önnur gjaldfrjáls viðfangsefni í Frístund eru sund, hringekja (ýmis viðfangsefni) og jazzdansskóli fyrir 1.-2. bekk. Þá geta nemendur nýtt þennan tíma í tónlistarnám séu þeir nemendur í Tónlistarskólanum á Tröllaskaga.

Yfirlit yfir viðfangsefni í Frístund er að finna hér

Óhætt er að segja að nú þegar skráningu er lokið fyrir haustönn 2020, við upphaf fjórða starfsár Frístundar sé öllum upphaflegum markmiðum hennar náð.

• Að efla og styðja við félagsleg tengsl og þroska nemenda.
• Að jafna möguleika nemenda til að stunda tómstundastarf.
• Að allir nemendur hafi aðgang að félagsskap að loknum skóladegi.
• Að gefa nemendum kost á að sækja íþróttaæfingar og tónlistarskóla í beinu framhaldi af skóladegi.
• Að a.m.k. 90% nemenda nýti sér frístund að loknum skóladegi.

Mjög góð skráning er nú í Frístund, sú besta á þeim þremur árum sem hún hefur verið starfrækt því þrjá daga í viku eru um 90% nemenda í 1.-4. bekk að njóta þess sem Frístund hefur upp á að bjóða. 

Skráningin í Frístund er eftirfarandi:

Mánudagur 74 nemendur           80,4% barna í 1-4. bekk
Þriðjudagur 82 nemendur           89,1% barna í 1-4. bekk
Miðvikudagur 84 nemendur       91,3 % barna í 1-4. bekk
Fimmtudagur 82 nemendur       89,1% barna í 1-4. bekk
Föstudagur 57 nemendur.           70 % barna í 1-4. bekk

Að lokinni Frístund tekur Lengd viðvera við fyrir nemendur 1.-4. bekkja og býður upp á afþreyingu til kl. 16:00 á daginn. Að lokinni Frístund, áður en nemendur fara heim eða í Lengda viðveru fá allir ávaxtabita.

Fjallabyggð færir öllum samstarfsaðilum kærar þakkir fyrir gott og hugmyndaríkt samstarf og grunnskólanum sérstaklega fyrir umsjón og útsjónarsemi, án ykkar allra væri Frístund ekki það sem hún er í dag.