Íris hlaut viðurkenningu fyrir mastersritgerð

Verðlaunin eru veitt annað hvert ár til sveitarfélaga, stofnana eða einkaaðila sem hafa gert vel á sviði skipulagsmála og lagt sitt af mörkum til að bæta og fegra umhverfi í þéttbýli og dreifbýli með faglegri skipulagsgerð. Markmið verðlaunanna er að hvetja til umræðu, auka skilning á skipulagsmálum og vekja athygli á því besta sem er að gerast á sviði skipulags á hverjum tíma.

Skipulagsverðlaunin eru annars vegar veitt fyrir skipulag, þ.e. skipulagstillögu eða staðfest skipulag og hins vegar fyrir sérstök og afmörkuð verkefni í tengslum við skipulag, svo sem frumkvöðlastarf og nýbreytni eða miðlun upplýsinga um skipulagsmál, svo eitthvað sé nefnt. 

Íris Stefánsdóttir, tæknifulltrúi Fjallabyggðar hlaut nemendaverðlaunin að þessu sinni fyrir mastersritgerð sína í Skipulagsfræðum við Landbúnaðarháskóla Íslands. Verkefnið ber heitið Ferðavenjur skólabarna í Reykjavík – Áhrif hins byggða umhverfis á val ferðamáta. 

Umsögn dómnefndar.

Var dómnefnd sammála um að hér væri á ferðinni áhugavert grasrótarverkefni. Það er samfélagslega mikilvægt að hafa áhrif á lífsstíl og það að ganga í skóla er og verði virkur ferðamáti. Verkefnið var vel unnið og mikilvægt skref í átt að sjálfbærri þróun og sjálfbæru skipulagi sveitarfélags.

Vill dómnefnd hvetja sveitarfélög til að huga að ferðavenjum barna við skipulagsgerð og benda á mikilvægi þess að fara fótgangandi í skóla sé virkur ferðamáti.

Hægt er að nálgast ritgerðina hér.

Íris Stefánsdóttir glöð með viðurkenninguna.