Flugfélagið Ernir hefur ákveðið að fjölga flugferðum milli Reykjavíkur og Sauðárkróks um tvær ferðir í viku. Flogið verður á mánudögum sem ekki hefur verið gert áður og aukaflug verður á föstudögum.
Ástæða þessara breytinga er að sögn félagsins mikil aukning farþega til og frá Sauðárkróki yfir vetrarmánuðina.
Flugfélagið Ernir hefur einnig ákveðið að bjóða upp á fríar rútuferðir milli Siglufjarðar og Sauðárkróks í tengslum við áætlunarflugið. Með því móti verði Siglfirðingum og gestum sem ætla til Siglufjarðar gert kleift að fljúga á sama verði og aðrir á Sauðárkróki.