Skipulags- og umhverfisnefnd Fjallabyggðar

Í apríl 2010 sendu húseigendur húseigna við Hlíðarveg 1c,3c,7c og Hátúns erindi til nefndarinnar þar sem óskað var að aðkoma að umræddum húseignum yrði bætt.

Erindi hefur borist frá Friðbirni Björnssyni og Kristínu Guðbrandsdóttur fyrir hönd húseigenda húseigna við Hlíðarveg 1c,3c,7c og Hátúns þar sem farið er fram á að þau verði upplýst um hvenær þau mega eiga vona á að framkvæmdir hefjist og jafnframt er farið fram á að fá upplýsingar um hönnun og útfærslu á aðkomu og aðgengi að húsum þeirra.

Nefndin harmar þær tafir sem orðið hafa á málinu og ítrekar fyrri bókun nefndarinnar þar sem óskað er eftir því við tæknifræðing að fá frekari útfærslu, þar sem skoðuð er tenging við Hóla- og Hlíðaveg.

Hallgrímur Páll Sigurbjörnsson fyrir hönd eigenda Suðurgötu 6 óskar eftir að skráningu á tveimur efstu hæðum eignarinnar verði breytt úr félagsheimili í íbúðarhúsnæði.

Nefndin samþykkir erindið en óskað er eftir grunnmynd og skráningartöflu.

Svandís Svavarsdóttir umhverfisráðherra sendir inn erindi þar sem sveitarfélög eru hvött til að nýta dag Íslenskrar náttúru til að vekja athygli almennings á gögnum og gæðum íslenskrar náttúru og hvetji fólk til að njóta hennar.

Nefndin þakkar innsent erindi og leggur til að skipuð verði vinnuhópur til að skipuleggja dagskrá.

Sigurjón Þórðarson fyrir hönd Heilbrigðiseftirlit Norðurlands vestra óskar eftir að sveitarfélagið taki saman gögn um stöðu og áform í fráveitumálum  í sveitarfélaginu fyrir 10. september nk.

Nefndin felur tæknideild að taka saman stöðumat á fráveitumálum í Fjallabyggð og svara erindinu.

Katrín Dröfn Haraldsdóttir Laugarvegi 28, Siglufirði óskar eftir að sveitarfélagið setji fullnægjandi drenlögn ofan við lóðina, sem er í eigu sveitarfélagsins.  Í lóðinni fyrir ofan Laugarveg 28 er uppspretta og mikill vatnsagi sem rennur inn á lóðina við, auk þess sem snjó af Suðurgötu er mokað á lóðina þannig að á vorin er ástandið mjög slæmt.

Deildastjóra tæknideildar er falið að meta aðstæður og koma með tillögu að úrbótum.

Lögð er fram tillaga að breytingu á stærð lóðar við Háveg 15, Siglufirði.

Erindið samþykkt.

Lögð er fram tillaga að breytingu á stærð lóðar við Hverfisgötu 18, Siglufirði.

Erindi samþykkt.

Umhverfisráðuneytið óskar eftir umsögn um meðfylgjandi vinnudrög um reglugerð um framkvæmdaleyfi og að þau berist eigi síðar en 15. ágúst nk.

Nefndinni falið að lesa drögin og koma með athugsemdir fyrir 1. ágúst.

Ólafur Kárason og Ingvar Kr. Hreinsson fyrir hönd Golfklúbbs Siglufjarðar sækja um framkvæmdaleyfi til bráðabirgða fyrir hönd óstofnaðs félags um uppbyggingu nýs golfvallar í Hólsdal.  Framkvæmdaleyfið verði einskorðað við malarnámu og afmarkað af tæknifræðingi Fjallabyggðar.  Framkvæmdaaðilar leggja mikla áherslu á að geta byrjað vinnu við völlinn sem fyrst svo ekki komi til tafa á opnun, en áætlanir gera ráð fyrir að völlurinn verði opnaður árið 2014.

Nefndin getur ekki orðið við beiðninni þar sem deiliskipulag liggur ekki fyrir.  

Hannes Rútsson og Jóhanna Kristjánsdóttir eigendur neðri hæðar Norðurgötu 14, Siglufirði óska eftir að fá úthlutað lóð sem stendur milli lóðanna Norðurgötu 14 og Vetrarbrautar 17 og 17b við Austurgötu.  Umrædd lóð hefur verið í umsjá umsækjenda síðastliðin 22 ár sem hafa grætt hana upp með grasi og trjám.

Erindi samþykkt.

Örlygur Kristfinnsson fyrir hönd Síldarminjasafn Íslands óskar eftir leyfi  til að koma fyrir upplýsingaskilti á safnlóð eins og sýnt er á meðfylgjandi korti.  Ætlunin er að sameina tvö skilti á eina grind og staðsetja sunnan Gránu.

Erindi samþykkt.

Leonard Birgisson fyrir hönd Vegagerðarinnar sendir inn erindi þar sem athygli er vakin á útgáfu reglugerðar nr. 492/2009 um merkingu og aðrar öryggisráðstafanir vegna framkvæmda á og við veg sem tók gildi 15. maí 2009.

Lagt fram til kynningar.

Jón Sigurðsson Hrannarbyggð 16, Ólafsfirði sækir um endurnýjun leyfis frá 3. september 1986 til að byggja við húseign sína skv. meðfylgjandi teikningu.

Erindi samþykkt.

Lagðar eru fram teikningar af húseign sem fyrirhugað er að byggja á lóðinni Hólavegi 83, Siglufirði.  Óskað er eftir byggingarleyfi.

Erindið samþykkt.

Bæjarráð hefur vísað erindi Óðins Freys Rögnvaldssonar og Haraldar Björnssonar um umsókn vegna fjárhúsabyggingu á reit 2 samkvæmt núgildandi deiliskipulagi um hesthúsabyggð og fjárhúsabyggð á Siglufirði fyrir neðan reiðskemmu, þar sem reitir sunnan við núverandi hesthúsabyggð eru mjög kostnaðarsamir byggingarlega séð. 

Óskar bæjarráð að nefndin taki erindið til umfjöllunar með tilliti til staðsetningar austast á reit í núgildandi deiliskipulagi um hesthúsa og fjárhúsabyggð.

Nefndin samþykkir tillögu bæjarráðs og felur tæknideild að gera viðeigandi breytingar á deiliskipulagi.