Skipulags- og umhverfisnefnd Fjallabyggðar

Á 220. fundi skipulags- og umhverfisnefndar var lagt fram erindi Egils og Óðins Rögnvaldssona, þar sem óskað var eftir breytingu á deiliskipulagi frístundasvæðis á Siglufirði, þannig að heimilt væri að vera með blandaðan búskap í hesthúsunum. Nefndin fól tæknideild að leita umsagna hjá hesthúsaeigendum og hestamannafélaginu Glæsi á Siglufirði vegna málsins.

Lagðar fram sex umsagnir hesthúsaeigenda ásamt umsögn hestamannafélagsins Glæsis.

Beiðni um breytingu á deiliskipulagi frístundasvæðis er hafnað þar sem umsagnaraðilar eru almennt mótfallnir tillögu um breytingu á deiliskipulaginu. Nefndir veitir Agli og Óðni undanþágu til að halda sauðfé í hesthúsunum til sumars 2018.

Lagt fram erindi hestamannafélagsins Glæsis dags. 5. janúar 2018.

1. Óskað er eftir undanþágu til að nýta göngustíg meðfram Langeyrartjörn að austanverðu til útreiða.
2. Einnig er óskað eftir því að hægt verði að nýta svæði sunnan byggðarinnar við Eyrarflöt til útreiða og Fjallabyggð moki snjó af einum hring á umræddu svæði svo hægt sé að nota það til útreiða.

Nefndin hafnar erindi hestamannafélagsins með vísan til þess að vegurinn frá hesthúsunum að Skarðsvegi hefur verið mokaður, sem opnar möguleika á að fara í reiðtúr um svæðið.

Lagt fram erindi Herdísar Erlendsdóttur dags. 8. janúar 2018. Í erindi sínu óskar Herdís eftir leyfi/undanþágu til að nota göngustíginn við Langeyrartjörn til útreiðartúra fjórum sinnum í viku milli kl. 18-21 í janúar og febrúar fyrir unga iðkendur á aldrinum 9-17 ára sem leggja stund á reiðmennsku.

Nefndin veitir Herdísi umbeðna undanþágu til að nýta göngustíg meðfram Langeyrarvegi (Langeyrartjörn) fyrir iðkendur sína. Nefndin setur það skilyrði að allur hestaskítur verður fjarlægður eftir hvern reiðtúr og tryggt að gangandi vegfarendur njóti forgangs en að öðrum kosti verður undanþágan afturkölluð.

Lögð fram uppfærð samþykkt um búfjárhald í Fjallabyggð þar sem vísað er í ný lög um búfjárhald nr. 38/2013 sem leystu af hólmi eldri lög nr. 103/2002.

Erindi frestað.

Lögð fram umsókn Hólmars Hákonar Óðinssonar um leyfi til búfjárhalds. Óskað er eftir leyfi til að halda 5 sauðfé að Hlíðarenda í Ólafsfirði.

Umsóknin uppfyllir skilyrði 3. gr. samþykktar um búfjárhald í Fjallabyggð. Tæknideild falið að gefa út leyfisbréf í samræmi við 5. gr. samþykktarinnar.

Lögð fram umsókn Ólafs Helga Marteinssonar um leyfi til búfjárhalds. Óskað er eftir leyfi til að halda 28 hross að Fákafeni 5 og 5A.

Umsóknin uppfyllir skilyrði 3. gr. samþykktar um búfjárhald í Fjallabyggð. Tæknideild falið að gefa út leyfisbréf í samræmi við 5. gr. samþykktarinnar.

Lögð fram umsókn Margrétar Ólafar Eyjólfsdóttur þar sem óskað er eftir leyfi til að halda þrjár hænur að heimili hennar, Bylgjubyggð 59.

Erindi samþykkt.

Lagt fram erindi J. Hilmars Antonssonar dagsett 3. janúar 2018. Óskað er eftir leyfi fyrir stækkun lóðarinnar Árdals að Kleifum skv. meðfylgjandi gögnum.

Erindi samþykkt.

Með umsókn dags. 13. desember 2017 sækir J. Hilmar Antonsson um byggingarleyfi fyrir geymsluskúr á lóðinni Árdalur skv. framlögðum aðaluppdráttum.

Erindi samþykkt.

Teknar fyrir ábendingar íbúa sem bæjarráð vísaði til skipulags- og umhverfisnefndar.

1. Tekin fyrir ábending Kristjáns Haukssonar. Kristján bendir á að svæðið milli MTR, gamla tónskólans og íþróttamiðstöðvarinnar líti illa út og sé nauðsynlegt að laga. Einnig bendir Kristján að snyrta mætti trjágróður við tjarnarsvæðið í Ólafsfirði og fegra opna svæðið milli Aðalgötu og Brimnes Hótels.

2. Tekin fyrir ábending frá Inga Reyndal vegna umhirðu við vatnsbakka Ólafsfjarðarvatns við Bylgjubyggð.

Nefndin tekur jákvætt í ábendingarnar og felur tæknideild að sinna umhirðuverkefnum sem bent er á.

Lögð fram til kynningar tilkynning Vegagerðarinnar, dags.14. desember 2017 vegna niðurfellingar Kálfsárkotsvegar.

Lagt fram til kynningar erindi Landgræslu ríkisins dags. 12. desember 2017. Með erindi þessu vill Landgræðslan upplýsa um gagnsemi og mikilvægi votlendis fyrir íslenskt samfélag. Nauðsynlegt er að sveitarstjórnir landsins séu upplýstar um málefnið og þær skyldur sem á þeim hvíla varðandi leyfisveitingar ef raska á eða ræsa fram votlendi.