Bæjarráð Fjallabyggðar

Tekið til afgreiðslu erindi sem frestað var á 334. fundi bæjarráðs.

Lagt fram uppfært erindi frá Ferðatröllum, ásamt ítarupplýsingum vegna landshlutasíðu fyrir utanverðan Tröllaskaga, dagsett 12. febrúar 2014.

Heimasíðugerð, www.visittrollaskagi.is

Í framhaldi af erindi frá 18. desember s.l. hafa fulltrúar Ferðatrölla, Freyr Antonsson, Kolbrún Reynisdóttir og Kristján Hjartarson, ásamt Margréti Víkingsdóttur, upplýsingafulltrúa Dalvíkurbyggðar og Kristni Reimarssyni, markaðs- og menningarfulltrúa Fjallabyggðar skoðað betur hvað felst í landshlutavef frá Stefnu og hvaða kostnaður er við uppsetningu og rekstur.

Í kjölfarið fékkst nákvæmara verðtilboð frá Stefnu sem miðast við landshlutavef sem inniheldur "visit einingu" og er einnig skalanlegur fyrir snjalltæki eins og síma og spjaldtölvur.

Í framhaldi af þeirri skoðun er lagt til að Dalvíkurbyggð og Fjallabyggð skipti á milli sín kostnaði við kaup á kerfinu og rekstri þess, en Ferðatröll taki að sér verkefnisstjórn og beri kostnað af því, en kostnaður við verkefnisstjórn er áætlaður á bilinu 300.000 til 500.000 kr.
Áætlaður hlutur á hvort sveitarfélag yrði þá um 594.000 kr.
Samkvæmt tilboðinu er mánaðargjald 14.900 kr., þessar tölur eru án vsk.

Bæjarráð samþykkir samhljóða stofn- og rekstrarstyrk í verkefnið samtals 860 þúsund og vísar upphæð til gerðar viðauka við fjárhagsáætlunar 2014.

Lögð fram til kynningar ályktun Landssambands eldri borgara um húsnæðisstefnu.  
Ályktunin var til umfjöllunar á stjórnarfundi Félags eldri borgara á Siglufirði 19. febrúar s.l. og formanni falið að kynna bæjarráði.
Um leið er bæjarráði þakkaður stuðningur við starfsemi félagsins og óskað góðrar samvinnu við sveitarfélagið í framtíðinni að málefnum eldri borgara.

Lagt fram yfirlit fyrir umsóknir félaga og félagasamtaka um styrk til greiðslu fasteignaskatts á árinu 2014.
Í áætlun var gert ráð fyrir kr. 2.000.000.- og leggur bæjarráð til við bæjarstjórn að styrkir að upphæð kr. 1.965.526 verði samþykktir í samræmi við framlagt yfirlit.

Niðurstaða bæjarráðs er skráð sem trúnaðarmál.

Starfsreglur fyrir Svæðisskipulag Eyjafjarðar 2012-2024, teknar til umfjöllunar.

Bæjarráð leggur til við bæjarstjórn að starfsreglurnar séu samþykktar.

Niðurstaða bæjarráðs er skráð sem trúnaðarmál.

Lagt fram bréf frá Lánasjóði sveitarfélaga ohf, dagsett 28. febrúar 2014 um aðalfund.
Fundurinn verður haldinn 27. mars 2014, kl. 14:00 á Grand hóteli Reykjavík.
Bæjarráð samþykkir að bæjarstjóri fari með atkvæði sveitarfélagins á fundinum.
Jafnframt var lagt fram bréf frá sjóðnum, þar sem auglýst er eftir framboðum í stjórn Lánasjóðs sveitarfélaga.

Markaðs- og menningarnefnd tók fyrir á 6. fundi sínum 17. mars 2014 erindi Þórðar Guðmundssonar og Elísar Hólms Þórðarsonar f.h. óstofnaðs einkahlutafélags, dagsett 13. febrúar 2014, þar sem óskað er leyfis Fjallabyggðar til að ferja fólk upp á fjöll sem eru í eigu sveitarfélagsins, með sérútbúnum snjótroðara, til útsýnis- og skíðaferða. Fari svo að leyfi fáist er stefnt að því að hefja ferðir veturinn 2014-2015.

Á fund nefndarinnar mætti Þórður Guðmundsson til að kynna nánar hugmyndir að fólksflutningum á fjöll. Leitað er eftir heimild fyrir að ferja fólk upp í Múlakollu í Ólafsfjarðarmúla og Burstabrekkudal og Hólkotshyrnu í Ólafsfirði. Laga þarf vegaslóða þessu tengdu og er óskað heimildar til að sjá um það.
Markaðs- og menningarnefnd tekur jákvætt erindið.
Lagt er til við bæjarráð að afnot af landi sé heimiluð, af því gefnu að haft verði samráð við tæknideild varðandi slóðagerð og sótt verði um leyfi til skipulags- og umhverfisnefndar.

Bæjarráð tekur undir bókun markaðs- og menningarnefndar og leggur áherslu á að fullt samráð verði haft við landeigendur og tæknideild er varðar slóðagerð á fyrirhuguðum svæðum og að framkvæmdir stangist ekki á við aðal- eða deiliskipulag Fjallabyggðar.

Lagt fram til kynningarbréf dagsett 25. febrúar 2014, þar sem lýsing er á endurskoðunarþjónustu KPMG og skilgreining á ábyrgð KPMG annars vegar og stjórnenda sveitarfélagsins hins vegar. Um er að ræða uppfært bréf með hliðsjón af breyttum lögum, reglum og/eða stöðlum er varða endurskoðun sveitarfélaga frá því að síðasta bréf um endurskoðun var undirritað.
Bæjarráð vísar kynningarbréfinu til bæjarstjórnarfundar.

Fundargerð frá 28. febrúar 2014, lögð fram til kynningar.