Bæjarráð Fjallabyggðar

Skólastjóri Leikskóla Fjallabyggðar óskar eftir leyfi til að ráða starfsmann í hlutastarf, til að sinna sérfræðiþjónustu við Leikskóla Fjallabyggðar. Um er að ræða brýna þörf og þar á meðal barn með skilgreinda fötlun sem þarf á slíkri þjónustu að halda.

Bæjarráð felur fræðslu og menningarfulltrúa, í samráði við leikskólastjóra, að auglýsa 30% stöðugildi laust til umsóknar frá 1. október 2011.

Bæjarstjóra er falið að taka tillit til þessarar ákvörðunar við breytingar á fjárhagsáætlun ársins.

Fjárbændur í Ólafsfirði vilja minna bæjarstjórn á ósk sína frá 9. mars s.l. um nýja fjárrétt við bæinn Kálfsá í Ólafsfirði.

Bæjarráð vísar í fyrri bókun sína, en þar kemur fram að málið verður tekið til umræðu og afgreiðslu við gerð fjárhagsáætlunar fyrir árið 2012.

Bæjarstjóri upplýsti að Vegagerðin muni ekki koma að, eða hafa afskipti af fjárrétt vestan ósa í Ólafsfirði.

Halldóra Salbjörg Björgvinsdóttir, bæjarfulltrúi Samfylkingarinnar í bæjarstjórn Fjallabyggðar óskar eftir leyfi frá störfum í bæjarstjórn og fræðslunefnd frá 1. september 2011 um óákveðinn tíma vegna veikinda.

Bæjarráð telur rétt að verða við framkominni ósk um leið og Halldóru Salbjörgu er óskað alls velfarnaðar og góðs bata.

Egill Rögnvaldsson lagði undir þessum dagskrárlið fram bréf dags. 29. ágúst 2011 um breytingar í bæjarstjórn og fræðslunefnd á vegum Samfylkingarinnar þar sem Halldóra S Björgvinsdóttir hefur óskað eftir leyfi frá störfum bæjarfulltrúa vegna veikinda.

Guðmundur Gauti Sveinsson kemur inn sem bæjarfulltrúi.
Guðrún Árnadóttir kemur inn sem varabæjarfulltrúi.

Jakob Kárason verður aðalmaður í fræðslunefnd.
Hilmar Elefsen verður varamaður í fræðslunefnd.

Sigurjón Magnússon leggur fram hugmynd sína og tillögu um að bæjarfélagið kaupi eignarhlut hans í Námuvegi 2 og að hann kaupi áhaldahús bæjarfélagsins í Ólafsfirði.
Safni verði fyrir komið í Námuvegi 2 og verði hugsað sem alhliða fugla-, náttúru-, sögu- og munasafn.
 
Bæjarráð þakkar Sigurjóni Magnússyni áhuga hans á safnamálum í Ólafsfirði en telur óraunhæft að Fjallabyggð taki á sig þær fjárskuldbindingar sem felast í hugmyndum hans.

Jafnframt telur bæjarráð að "áhugahópur um náttúrugripasafn í Ólafsfirði", sem stofnaður var á fundi í Tjarnarborg í sumar,  ásamt fagráði bæjarfélagsins, verði með í ráðum um fyrirkomulag safnamála í Ólafsfirði.

Fjallabyggð annast samninga við verktaka í samráði við Jón Magnússon, f.h. Vegagerðarinnar. 
VSÓ mun stilla upp tilboðsskrá sem nota má við samningsgerð, en stefnt er að því að ljúka verkinu að fullu fyrir veturinn. 

Reynist veðurfar óhagstætt í síðari hluta verksins  kann að reynast nauðsynlegt að fresta malbikun, kantsteinum og gangstéttum. 

Verður þá gengið frá götuyfirborði með þynnra efra burðalagi sem verður endurunnið vorið 2012.

Bæjarráð fagnar umræddum framkvæmdum og leggur áherslu á að verkinu verði lokið fyrir áramót. 

Búið er að velja verktaka í gangstéttarframkvæmdir í Ólafsfirði og eru framkvæmdir að hefjast.
Endurnýjun á gangstétt í Hrannabyggð byggir m.a. á þeirri staðreynd að Rarik ætlar að skipta út ljósastaurum og rafmagnskössum í götunni. Umræddar framkvæmdir hafa leitt í ljós að slæmt ástand er á fráveitu sem liggur undir gangstéttinni.
Eftir útboð er verið að fóðra lögnina og er áætlaður kostnaður um 6.8 m.kr. Áætluð verklok eru 15. september, en þá verður búið að ganga frá gangstéttum ásamt lagfæringum á fráveitu.

Umrædd framkvæmd þ.e. kostnaður við fráveitu kemur inn í heildarendurskoðun á fjárhagsáætlun ársins.

Lagðar fram upplýsingar frá Siglingastofnun og Innanríkisráðuneytinu um að fé hafi fengist til viðgerða á bæði sandfangara og Vesturgarði í Ólafsfirði, alls 18 m.kr. sem nemur 75% af heildarkostnaði.

Áætlaður heimahlutur bæjarfélagsins er 6 m.kr.
Málið er nú til umfjöllunar í hafnarstjórn. Ætlunin er að lagfæra garðinn í ár fyrir um 4,5 m.kr. og er hlutur hafnarinnar um 1,2 m.kr.  Sá kostnaður er tekinn af viðhaldsfé hafnarinnar á fjárhagsáætlun ársins.

Fundargerð lögð fram til kynningar.

Lagt fram til kynningar.
Ólafi Marteinssyni er falið umboð bæjarfélagsins á fundinum.

Bæjarráð telur rétt að beina þeim óskum til stjórnar að umhverfi og útlit húsnæðis Seyru verði tekið til skoðunar m.t.t. lagfæringar.