Bæjarráð Fjallabyggðar

Lagt fyrir erindi Teiknistofunnar Víðihlíð 45 um þóknunaráætlun arkitekta vegna hönnunar á stækkun skólabygginga Grunnskóla Fjallabyggðar.

Bæjarráð samþykkir að veita bæjarstjóra umboð til að ganga til samninga við Teiknistofuna.

Bæjarráð lýsir ánægju með þann framkvæmdahug sem fram kemur í áformum Rauðku ehf og tengdra aðila.
Bæjarráð samþykkir að hefja viðræður við aðila og leggur hér með fram tillögur sem fyrsta skref í viðræðum á milli aðila.
Bæjarstjóra er falið að boða til fundar um næstu skref.
Bæjarráð vill koma eftirfarandi upplýsingum á framfæri svo aðilar geri sér ekki óraunhæfar væntingar um fjárhagslega aðkomu sveitarfélagsins. 
Fjallabyggð, eins og önnur sveitarfélög, er bundin af lögum til þess að sinna ákveðnum skyldum og hefur til þess markaða tekjustofna.
Um fjármál sveitarfélaga gilda strangar reglur. Þær er nú verið að þrengja enn frekar.
Bæjarráð vill auk þess benda á samþykkta þriggja ára áætlun sveitarfélagsins, sem aðgengileg er á heimasíðu Fjallabyggðar. Hún hefur ekki að geyma neitt sem tengist umræddum erindum nema hvað varðar golfvallarsvæðið.
Þrátt fyrir það er bæjarfélagið tilbúið til þess að beita tiltækum úrræðum s.s. í skipulagsmálum svo ná megi árangri í atvinnu- umhverfis- og afþreyingarmálum. Bæjarráð mun vísa neðanrituðum áformum Rauðku ehf. og tengdra aðila til fagnefnda 

A. Svar vegna máls nr. 1106092. Byggingaráform um Hótel.
Í erindi segir : "Á næstu vikum líkur fyrsta áfanga í uppbyggingu Rauðku ehf. Annar áfangi hefur verið í undirbúningi síðustu mánuði. Um er að ræða byggingu á hóteli á suðurkanti smábátahafnarinnar. Hótelið yrði byggt að hluta til á lóð félagsins, svokallaðri Sunnulóð. Um væri að ræða tvílyft hús í stíl við aðrar byggingar í nágrenninu. Núverandi hönnun gerir ráð fyrir 64 herbergjum, alls um 1.500 fermetra að grunnfleti í þremur álmum. Ein álman yrði byggð á uppfyllingu. Lítil smábátahöfn yrði fyrir innan hótelið. Rauðka ehf óskar hér með eftir viðræðum við Fjallabyggð um viðbótarlóð undir væntanlegt hótel."

Bæjarráð Fjallabyggðar felur Skipulags- og umhverfisnefnd að afgreiða umsókn Rauðku ehf, eins fljótt og auðið verður. Bæjarráð leggur áherslu á að unnið verði hratt í máli þessu þar sem mikið getur verið í húfi. Um er að ræða uppbyggingu sem skapar störf í lengd og bráð og framtíðartekjur fyrir bæjarfélagið í formi fasteignarskatta. Bæjarráð lýsir því hér með yfir að fullur vilji er til þess að ráðast í stækkun svæðisins um leið og búið er að samþykkja teikningar af umræddu húsi og lóðarblöð. Bæjarráð leggur áherslu á að tryggt verði að af umræddum framkvæmdum verði. Ljóst er að í mikið er ráðist af hálfu bæjarfélagsins, en gera má ráð fyrir því að gatnagerðargjald muni standa undir stækkun svæðisins að stórum hluta.

B. Svar vegna máls nr. 1106092. Skíðasvæði í Skarðsdal.
Í erindi segir :
"Þann 1. október 2009 skrifuðu Fjallabyggð og Valló ehf undir samning um rekstur á skíðasvæðinu í Skarðsdal. Samningurinn var gerður til 3 ára. Mikill árangur hefur náðst í fjölgun skíðagesta á skíðasvæðið þrátt fyrir misjafnt tíðafar á háannatímanum. Mikið verk er fyrir höndum við áframhaldandi uppbyggingu og markaðssetningu skíðasvæðisins. Aðstandendur Valló ehf. sjá mikla möguleika í eflingu á skíðasvæðinu ef unnið er með langtímahassmuni að leiðarljósi. Markviss vinnubrögð og fagmennska skipta þar meginmáli. Til að gera skíðasvæðið í Skarðsdal samkeppnishæft þurfa nokkur atriði að koma til. Ákveða hvort flytja eigi skíðaskála og neðstu lyftu, malbika þarf veg og bílastæði. Koma upp nýrri lyftu til að tengja Bungulyftu. Þá þarf að byggja nýjan og stærri skíðaskála. Rauðka ehf lýsir hér með yfir áhuga á að koma að byggingu nýs skíðaskála ef að um semst. Aðstandendur Valló ehf hafa fullan hug á að standa að þessari uppbyggingu með Fjallabyggð. Óskar Valló ehf því hér með eftir viðræðum við Fjallabyggð um nýjan langtímasamning milli aðila um rekstur skíðasvæðisins."

Í framhaldi af þessum ábendingum og/eða óskum vill Bæjarráð Fjallabyggðar taka fram:
1. Bæjarráð telur eðlilegt að skýrsla "Nefndar um uppbyggingu skíðasvæðisins í Skarðsdal", frá árinu 2009, verði höfð til hliðsjónar við mótun skíðasvæðisinns. Í skýrslunni er m.a. lagt til að skáli, bílastæði og neðstalyfta verði flutt af snjóflóðahættusvæði.
2. Bæjarráð telur að vegagerð að skíðasvæðum sé á könnu Vegagerðarinnar. Bæjarráð mun gera það sem í þess valdi stendur til þess að af nauðsynlegri vegagerð geti orðið.
3. Bæjarráð telur einnig rétt að kanna hvort og þá hvernig Ofanflóðasjóður kemur að flutningi mannvirkja s.s. skíðalyftna og skíðaskála af snjóflóðahættusvæði.
4. Bæjarráð mun ekki setja sig á móti því að rekstraraðili byggi nýjan skíðaskála, og að tekið verði tillit til fjárfestingar rekstraraðila á svæðinu við framlengingu samnings. Bæjarráð telur rétt að hefja viðræður um nýjan langtímasamning við Valló ehf. Bæjarráð telur rétt að vísa erindinu hér með til umfjöllunar Frístundanefndar og Skipulags- og umhverfisnefndar. 

C. Svar vegna máls nr. 1106092, Rif á húsnæði Selvíkur við Gránugötu.
Í erindi segir :
"Fyrir skömmu keypti Selvík ehf., systurfyrirtæki Rauðku ehf., fasteign, vélar og tæki fyrirtækisins Egilssíld ehf. Tilgangur kaupanna var að tryggja að sú starfsemi sem í húsnæðinu væri félli að starfssemi og uppbyggingu Rauðku ehf. Mikil aukning ferðamanna með hjólhýsi og í húsbílum hefur kallað á aukna þörf fyrir stærra og betra tjaldstæði. Einn af möguleikunum til að bæta svæðið er sú að rífa þá byggingu sem starfssemi Egilssíldar er í verði rifin til að opna og bæta svæðið. Þar sem skipulagsmál við ofanverða Gránugötu hafa umtalsverð áhrif á starfsemi Rauðku ehf þá óskar félagið hér með eftir viðræðum við Fjallabyggð um framtíðarskipulag á svæðinu."

Bæjarráð felur bæjarstjóra að boða forsvarsmenn Selvíkur ehf. á næsta fund Skipulags- og umhverfisnefndar.
Bæjarráð leggur áherslu á að Skipulags- og umhverfisnefnd láti vinna skipulag af svæðinu í samvinnu við umsækjendur. Sú vinna byggir m.a. á ákvörðun um rif á umræddri eign. 

D. Svar vegna máls nr. 1106092. Bygging golfvallar.
Í erindi segir :
"Undanfarna mánuði hafa Golfklúbbur Siglufjarðar og Rauðka ehf. skoðað möguleika á byggingu á golfvelli í Hólsdal. Sameiginleg niðurstaða aðila málsins er að framkvæmdin verði í höndum Rauðku ehf. Rauðka ehf mun leggja framkvæmdinni til 40 miljónir króna í fyrsta áfanga. Golfklúbbur Siglufjarðar mun verða aðili að skipulagi og fyrirkomulagi mála. Samkomulag er við verktakafyrirtækið Bás ehf. um vinnu við fyrsta áfanga vallarins. Bæjarstjórn Fjallabyggðar hefur samþykkt að leggja framkvæmdinni til 16 miljónir króna á næstu fjórum árum. Lagt er til að sú upphæð gangi beint frá Fjallabyggð til golfklúbbsins/verktaka sem gagngreiðsla við frágangi á malarnámum. Með bréfi þessu sækir Rauðka ehf því um land fyrir golfvöll. Golfvöllurinn yrði byggður á fyrirliggjandi hönnun sem Golfklúbbur Siglufjarðar hefur látið gera."

Bæjarráð hefur nú þegar fjallað um málið og hefur því verið lokið í bæjarstjórn. Skýr skilyrði frá Rauðku ehf um fjármögnun og rekstrafyrirkomulag voru forsenda samþykktar bæjarstjórnar. Að svo komnu máli telur Bæjarráð ekki forsendur til þess að breyta fyrri samþykkt í grundvallaratriðum. Bæjarráð samþykkir að Rauðka ehf verði framkvæmdaraðili í stað sjálfeignarstofnunarinnar eins og fyrri samþykkt gerir ráð fyrir, enda verði staðið við þau skilyrði sem sett voru af hálfu Rauðku ehf s.l. haust, sem bæjarstjórn gerði einnig að sínum skilyrðum. Skipulag svæðisins er nú í skoðunarferli. Náist víðtæk sátt um svæðið mun bæjarráð, að óbreyttu, leggja til land undir golfvöll í Hólsdal samkvæmt fyrri samþykkt. Bæjarráð vill ítreka að ekki er hægt að gefa út framkvæmdarleyfi fyrr en búið er að samþykkja deiliskipulag svæðisins. Stjórnendur golfklúbbsins hafa unnið að deiliskipulagi golfvallarsvæðisins og kynnt sín áform hagsmunaaðilum svæðisins sem og skipulags- og umhverfisnefnd Fjallabyggðar. 

E. Svar vegna máls nr. 1106092. Umhverfismál - tanginn.
Í erindi segir:
"Með tilkomu Héðinsfjarðargangna og aukinni áherslu á ferðamennsku í Siglufirði skipta umhverfismál í orðið auknu máli.
Uppfylling í innanverðum firðinum hefur stækkað til muna á síðustu árum. Lítið skipulag hefur verið á þessari stækkun og frágangur oft til lítils sóma. Verktakafyrirtækið Bás ehf rekur steypustöð neðst á tanganum og fiskverkunarfyrirtæki innar á landfyllingunni. Bás ehf og Rauðka ehf lýsa hér með áhuga á að koma að með Fjallabyggð umbreytingu á svæðinu þar sem landfyllingunni yrði breytt að stórum hluta í útivistarsvæði með tjaldstæði, grunnu vatni og hólmum. Verkfræðistofan Teikn á Lofti á Akureyri hefur teiknað grunnhugmynd af svæðinu sem fylgir með erindinu."

Umrætt svæði er skipulagt sem iðnaðarsvæði. Bæjarráð er sammála því að svæðið er ekki til sóma eins og það er.
Bæjarráð hefur falið umhverfisfulltrúa og Skipulags- og umhverfisnefnd að ljúka við hreinsun svæðisins og er þar einnig lögð rík áhersla á umbreytingu svæðisins.
Teikningar af svæðinu hafa verið samþykktar í fagnefnd bæjarfélagsins. Svæðið á að verða í takt við framkomnar hugmyndir sem útivistar svæði og friðland.
Bæjarráð og Hafnarstjórn vinna nú að verkefni um "hafnsækna starfsemi" og er sú vinna rétt hafinn. Fram kom í kynningu á verkefninu að Rauðka ehf og Bás ehf myndu sækja um flutning á verktakafyrirtækinu Bás ehf, inn á hafnarsvæðið við Óskarsbryggju til að ná fram sínum hugmyndum. Það er skoðun bæjarráðs að flutningur á starfsemi verktakafyrirtækisins Bás ehf sé ekki tímabær þar til séð verður hvað þessar hugmyndir um "hafnsækna starfsemi" hafi í för með sér.

Lagt fyrir bæjarráð samkomulag við Erluberg, um endanlegt uppgjör vegna lóðarleigusamninga aðila um fasteignina Tjarnargötu 2-4 Siglufirði.
Aðilar hafi með samkomulagi þessu náð sátt um fullnaðargreiðslu til lúkningar öllum kröfum Erlubergs á hendur Fjallabyggðar sem tengdar eru fyrrgreindum lóðarleigusamningi og uppsögn hans, þ.m.t. kröfu um "fullar bætur“ samkvæmt ákvæði þar um.
Samhliða samkomulagi þessu gefur Erluberg út afsal fyrir öllum þeim mannvirkjum sem á lóðinni eru og er það afsal fylgiskjal 1 með samkomulaginu.
Samhliða samkomulagi þessu gefur Erluberg einnig út afsal fyrir bát sínum Daníel SI-152, skrán. nr. 0482, sem við undirritun samkomulags þessa stendur á lóðinni og er það afsal fylgiskjal 2 með samkomulaginu. Samkvæmt samningi þessum skal Fjallabyggð greiða Erlubergi samtals 14 milljónir á tímabilinu 2011 til 2014.
Bæjarráð staðfestir samkomulagið fyrir sitt leyti.  Jafnframt er samkomulagi vísað til endurskoðunar fjárhagsáætlunar og þriggja ára áætlunar.

Í erindi framkvæmdastjóra Háfells er þess farið á leit við sveitarfélagið að það samþykki fyrir sitt leyti samkomulag milli Árna Helgasonar, Háfells og Vegagerðarinnar um frágang á athafnasvæði verktaka í Ólafsfirði og Siglufirði í tengslum við Héðinsfjarðargöng, þannig að uppgjör vegna aðstöðu Háfells við Vegagerðina geti átt sér stað. Aðkoma sveitarfélagsins er forsenda fyrir uppgjöri á aðstöðu Háfells við Vegagerðina.
Bæjarráð samþykkir fyrir sitt leyti samkomulagið.
Í tengslum við afgreiðslu þessa erindis er jafnframt samþykkt áframhaldandi stöðuleyfi vegna skrifstofubygginga Háfells ehf Siglufirði, nú í eigu Árna Helgasonar ehf, til 31. maí 2012.

Í erindi Skíðafélags Ólafsfjarðar frá 16. júní 2011 er óskað eftir því að fá að gera minniháttar lagfæringu skíðabrekku í Tindaöxl í Ólafsfirði.
Bæjarráð samþykkir erindið.

Eftirfarandi tillaga var samþykkt með þremur atkvæðum.
 

"Bæjarráð Fjallabyggðar telur að framkomin frumvörp veiki atvinnulíf í Fjallabyggð.
Jafnframt harmar bæjarráð Fjallabyggðar að ríkisstjórnin viðhafi svo óvönduð vinnubrögð í svo mikilvægu máli.
Að öðru leiti vísast til álita sem fram hafa komið s.s.:

Alþýðusambands Íslands.
Samtaka atvinnulífsins.

Farmanna- og fiskimannasambands Íslands.
Landsamband íslenskra útvegsmanna.

Landsambands smábátaeigenda.

Helga Áss Grétarssonar

Hagfræðinganefndar sjávarútvegsráðherra."

Dagana 21. júní til 24. júní 2011 hjólaði Þórir Kr. Þórisson fyrrverandi bæjarstjóri í Fjallabyggð frá Seltjarnarnesi til Siglufjarðar og safnaði í leiðinni fyrir sérhæfðum búnaði fyrir "skynörvunarherbergi“ í nýju húsnæði Iðju/dagvistar við Aðalgötu 7 á Siglufirði.
Iðja/dagvist í Fjallabyggð veitir fólki þjálfun, umönnun, afþreyingu og vinnu við létt verkefni sem vegna fötlunar sinnar þurfa sérhæfða og einstaklingsmiðaða þjónustu.

Fyrir bæjarráði liggur þakkarbréf frá aðstandendum söfnunarinnar, þeim Þóri Kr. Þórissyni, Erlu Bjartmarz og Guðmundi Guðlaugssyni fyrir stórkostlegar móttökur við komu þeirra til Siglufjarðar og stuðning við söfnunina.
Samkvæmt bréfinu hefur nú safnast rúmlega 1,4 milljónir.

Bæjarráð þakkar aðstandendum söfnunarinnar fyrir frábært framtak.

Í framhaldi af fundi bæjarráðs þriðjudaginn 21.06.2011 fór bæjarstjóri yfir stöðu mála með umhverfisfulltrúa og deildarstjóra tæknideildar er varðaði:
a. Vinnuskóla.
b. Atvinnuátak Vinnumálastofnunar.
c. Umhverfisátak bæjarfélagsins með Vinnumálastofnun.
Bæjarstjóri lagði fram og fór yfir minnisblað um atvinnu og umhverfisátak Fjallabyggðar frá 23. júní s.l.

Fundargerð deildarstjóra Fjallabyggðar frá 23. júní lögð fram til kynningar.

Lögð fram skýrsla Verkfræðistofu Siglufjarðar um stöðu framkvæmda við snjóflóðavarnir í Siglufirði.
Í skýrslunni er lagt til að Fjallbyggð hefji viðræður við Umhverfisráðuneyti og stjórn Ofanflóðasjóðs um gerð framkvæmdaáætlunar um að ljúka stoðvirkjagerð í Siglufirði, sem miði að því að framkvæmdir geti hafist á næsta ári.
Bæjarráð samþykkir að fela bæjarstjóra að senda erindi til Umhverfisráðuneytis og stjórnar Ofanflóðasjóðs varðandi málið.

Fundargerð lögð fram til kynningar.