Bæjarráð Fjallabyggðar

Lagt fram til kynningar vinnuskjal deildarstjóra tæknideildar dags. 22. apríl 2022 er varðar opnun tilboða í verkið „Viðbygging við íþróttamiðstöð Siglufjarðar“. Í vinnuskjalinu kemur fram að engin tilboð hafi borist í verkefnið.

Lagt fram vinnuskjal deildarstjóra tæknideildar dags. 25. apríl 2022 er varðar ósk deildarstjóra um heimild bæjarráðs til að bjóða út verkefnið „Siglufjörður Álalækjaryfirfall“, einnig lagðar fram teikningar af yfirfallslögn.

Lagt fram minnisblað deildarstjóra stjórnsýslu- og fjármála dags. 25. apríl 2022 er varðar viðaukabeiðni vegna svokallaðs hagvaxtaauka, en frá 1. apríl bætist hagvaxtarauki kr. 10.500.- við launatöflur gildandi kjarasamninga Sambands íslenskra sveitarfélaga. Í minnisblaðinu óskar deildarstjóri eftir að kostnaður vegna hagvaxtaauka verði settur í viðauka nr. 9/2022 við fjárhagsáætlun 2022 og að útgjöldum vegna hans verði mætt með lækkun á handbæru fé. Einnig lagður fram útfærður viðauki nr. 9 við fjárhagsáætlun 2022.

Heildaráhrif vegna hagvaxtarauka á launagreiðslur Fjallabyggðar á yfirstandandi ári nema kr. 30.706.624.- sem skiptist á bókhaldslykil 1110 laun kr. 24.833.216.- og á bókhaldslykil 1890, launatengd gjöld kr. 5.873.408.-.

Lögð fram drög að samningi um dúntekju á varpsvæðum 1 til 4 í bæjarlandi Siglufjarðar ásamt skýringum, samningsdrögin eru samin af Ingvari Hreinssyni, Sigurði Ægissyni og Örlygi Kristfinnssyni sem allir óskuðu eftir að nýta áfram svæði sem þeir hafa verið með í nýtingu. Einnig lagði bæjarstjóri fram og fór yfir gögn er varða samskipti og viðræður sem hafa átt sér stað milli sveitarfélagsins og framangreindra aðila.

Lagt fram ódagsett erindi Óskars Þórðarsonar, Önnu Maríu Björnsdóttur og Maríu Jóhannsdóttur er varðar ósk um frían aðgang að sundlauginni á Siglufirði vegna sundnámskeiðs fyrir leikskólabörn á tímabilinu 7. til 16. júní. Einnig lagt fram vinnuskjal deildarstjóra fræðslu-, frístunda- og menningarmála dags. 26. apríl 2022.

Lagt fram erindi Sýslumannsins á Norðurlandi eystra, dags. 31.03.2022 er varðar beiðni um umsögn vegna umsóknar Hjúkrunarheimilisins Hornbrekku um tímabundið áfengisleyfi (tækifærisleyfi) vegna fyrirhugaðs kráarkvölds íbúa, ættingja og starfsfólks þann 5. maí nk.

Lagt fram fundarboð vegna aðalfundar veiðifélags Ólafsfjarðar sem haldinn verður 11. júní 2022.

Lagt fram erindi frá hestamannafélaginu Glæsi dags. 25. apríl 2022 ásamt bréfi lögmannsstofunnar Lex dags. 22. apríl 2022. Í erindinu óskar hestamannafélagið eftir fundi með bæjarráði.

Lagt fram að nýju erindi Hrefnu K. Svavarsdóttur dags. 12. apríl 2022 ásamt fylgiskjölum þ.m.t. dómi í máli E-3321/2020. Í erindinu fer Hrefna fram á að fá afhent yfirlit yfir kostnað vegna aðkeyptrar lögfræðiráðgjafar sveitarfélagsins vegna framangreinds máls. Erindið fékk umfjöllun á 738. fundi bæjarráðs undir trúnaði enda um persónulegt mál að ræða að mati sveitarfélagsins. Einnig lagt fram erindi Hrefnu K. Jónsdóttur dags 25. apríl 2022 hvar hún óskar eftir því að erindi hennar verði tekið til umfjöllunar í bæjarráði og að afgreiðsla bæjarráðs verði birt í fundargerð á heimasíðu sveitarfélagsins. Að síðustu er lagt fram svarbréf sveitarfélagsins dags. 25. apríl 2022 er varðar höfnun á ósk um afhendingu gagna með vísan til 3. tl. 6. gr. upplýsingalaga nr. 140/2012.

Bæjarstjóri lagði fram myndir frá flugvallarsvæðinu á Siglufirði. Á myndunum má sjá gámaeiningar og muni sem eru í suðvestur horni svæðisins og eru til lýta í ásýnd svæðisins.

Lagt fram til kynningar samkomulag Sjúkratrygginga Íslands og Fjallabyggðar um framlengingu á samningi um rekstur þjónustu hjúkrunarheimilis að Hornbrekku, Ólafsfirði, dags. 20. desember 2019 ásamt fylgiskjölum.

Lagt fram til upplýsingar erindi Önnu M. Guðlaugsdóttur f.h. sóknarnefndar Ólafsfjarðarprestakalls er varðar ósk um viðræður við sveitarfélagið varðandi nýjan kirkjugarð í Ólafsfirði.