Bæjarstjórn Fjallabyggðar

Bæjarstjórn vill koma kærum þökkum til allra þeirra viðbragðsaðila sem unnu að aðgerðum þessa daga. Ljóst er að ef þeirra nyti ekki við hefði ástandið orðið mun verra. Einnig fá íbúar kærar þakkir fyrir dugnað og þolinmæði á meðan unnið var úr aðstæðum.

Bæjarstjórn felur slökkviliðsstjóra og starfandi verkstjóra þjónustumiðstöðvar í samvinnu við deildarstjóra tæknideildar að skila greinargerð um atburði síðastliðinnar helgar ásamt tillögum að bráðaaðgerðum og leggja fyrir næsta fund bæjarráðs.
Bæjarstjórn felur deildarstjóra stjórnsýslu- og fjármáladeildar einnig að skila greinargerð fyrir næsta fund bæjarráðs um hver tryggingaleg staða sveitarfélagsins er í ljósi atburðanna.

Bæjarstjórn Fjallabyggðar skorar á Innviðaráðherra og þingmenn Norðausturkjördæmis í ljósi nýafstaðinna atburða í kjölfar mikillar úrkomu við utanverðan Tröllaskaga að beita sér þegar í stað fyrir því að undirbúningi Fljótaganga verði hraðað. Mikið hættuástand skapaðist á Siglufjarðarvegi eftir atburði síðustu daga, sem sýnir að um forgangsmál er að ræða þegar kemur að samgöngu- og öryggismálum landsins.

Bæjarstjórn lýsir sig reiðubúna til að fara í beinar viðræður um efnisatriði bréfsins en óskar eftir ráðrúmi til frekari undirbúnings. Bæjarstjóra falið að svara lögmanni Selvíkur ehf.