Bæjarráð Fjallabyggðar

Saman-hópurinn óskar eftir styrk fyrir árið 2014.

Bæjarráð hafnar erindinu.

Umhverfis- og auðlindaráðuneytið hefur falið Skipulagsstofnun að vinna tillögu að landsskipulagsstefnu í samræmi við ákvæði skipulagslaga nr. 123/2010. Skipulagsstofnun býður til samráðs og þátttöku fyrir 10. febrúar n.k. Starfsmenn tæknideildar eru hvattir til að taka þátt í verkefninu.

Lagt fram vinnuskjal er varðar lóðarrétt að Brekkugötu 9 og við bæjarlæk á Brimnesi, Ólafsfirði.

Eftir yfirferð og skoðun samþykkir bæjarráð fram lagða bókun:

"Með vísan til minnisblaðs Landslaga frá 27. nóvember 2013 er um að ræða mál vegna atburða sem áttu sér stað um miðja síðustu öld. Kröfur vegna þeirra eru fyrst settar fram núna.

Sveitarfélagið hefur reynt að afla gagna til að upplýsa málið eins og kostur er, en engar nýjar upplýsingar hafa komið fram. Ógerningur er eftir svo langan tíma að staðreyna málavexti eða fullyrðingar aðila enda flestir sem komu að þessum málum gengnir.

Sveitarfélagið getur því ekki fallist á að greiða skaðabætur með vísan til minnisblaðs Landslaga, en hvetur málsaðila til að láta reyna á rétt sinn, telji þeir sig eiga kröfur á hendur sveitarfélaginu.

Varðandi meinta ofgreidda lóðarleigu er lögmanni sveitarfélagsins falið að ræða við lögmann málsaðila og leita samkomulags þar um."

Samþykkt samhljóða.

Inkasso ehf hefur hug á að koma á samstarfi við bæjarráð Fjallabyggðar er varðar innheimtumál fyrir bæjarfélagið.

Þjónustuver Inkasso er m.a. staðsett á Siglufirði.
Fyrir fundinum lágu upplýsingar um að verið sé að útbúa verðkönnun þar sem samningar eru lausir við núverandi innheimtufyrirtæki.

Bæjarráð fagnar aukinni starfsemi í bæjarfélaginu og felur deildarstjóra stjórnsýslu- og fjármála að tryggja að Inkasso verði með í umræddri verðkönnun.

Bæjarráð leggur til við bæjarstjórn að gjaldskrár ársins 2014, sem eru bundnar vísitölu, verði óbreyttar á árinu og miðist við vísitölu í lok árs 2013.

Gjaldskrár verða teknar til endurskoðunar ef verðlagsforsendur við gerð áætlunar fyrir árið 2014 ganga ekki eftir.

Lögð fram tillaga frá markaðs- og menningarnefnd, skrifstofu- og fjármálastjóra og forstöðumanni bóka- og héraðsskjalasafns.

Lagt er til að ráða Hrönn Hafþórsdóttur sem forstöðumann bóka- og héraðsskjalasafns Fjallayggðar.

Samþykkt samhljóða.

Lagðar fram tillögur er varðar afslætti af fasteignaskatti, fyrir tekjulága elli- og örorkulífeyrisþega sem eiga lögheimili í Fjallabyggð.
Bæjarráð leggur til við bæjarstjórn að til viðbótar við 2% hækkun á tekjuviðmiðum, hækki hámarksafsláttur frá 46.200 í 55.000 krónur.

Samþykkt samhljóða.

Lögð fram fundargerð þjónustumiðstöðvar frá 24.01.2014.

Í 10. kafla sveitarstjórnarlaga nr.138/2011 er fjallað um samráð sveitarstjórnar við íbúa. Þar kemur m.a. fram að hægt sé að taka ákvörðun um íbúakosningar um einstök málefni sveitarfélagsins, sbr. 107 gr. og 2. mgr. 108 gr. laganna. Þjóðskrá mun halda sérstakan kynningarfund fyrir sveitarfélög um rafrænar íbúakosningar þann 5. febrúar að Borgartúni 21 Reykjavík.

Lagt fram til kynningar.

Lagðar fram til kynningar hugmyndir um endurbætur á Ólafsvegi 4.

Lögð fram til kynningar ósk skólastjóra GF um launalaust leyfi næsta skólaár.  Erindið er til umfjöllunar í fagnefnd.

Á stofnfundi nýs byggðasamlags sem haldinn var 29. janúar 2014 á Sauðárkróki, undirrituðu fulltrúar níu sveitarfélaga samþykktir nýs byggðasamlags sem fengið hefur nafnið Rætur bs.

Tilgangur samlagsins er að fara með málefni fatlaðs fólks á vestanverðu Norðurlandi. Aðildarsveitarfélög byggðasamlagsins eru; Akrahreppur, Blönduósbær, Dalvíkurbyggð, Fjallabyggð, Húnavatnshreppur, Húnaþing vestra, Skagabyggð, Sveitarfélagið Skagafjörður og Sveitarfélagið Skagaströnd.

Lagt fram til kynningar.