Bæjarráð Fjallabyggðar

Lagt fram minnisblað deildarstjóra stjórnsýslu og fjármála dags. 1. júlí 2022 þar sem óskað er eftir viðauka við fjárhagsáætlun 2022 að upphæð samtals kr. 13.841.755.- vegna hagvaxtarauka, kjarasamningshækkana og fleira.

Lagt fram minnisblað frá deildarstjóra tæknideildar dags. 26. júní 2022 þar sem fram kemur að lóðirnar við Eyrarflöt, Bakkabyggð og Mararbyggð eru á tilbúinni fyllingu og þarf því ekki að kanna jarðveg þar. Varðandi lóðir á malarvellinum á Siglufirði kemur fram að könnun hafi verið gerð á áttunda áratugnum og skv. þeim upplýsingum var ekki komið niður á fastan jarðveg.
Ef gera ætti nýja athugun á svæðinu yrði áætlaður kostnaður samtals kr. 500.000.-

Lagður fram til kynningar dómur í máli nr. E-446/2021 sem kveðinn var upp í Héraðsdómi Norðurlands eystra í máli Hreinsitækni gegn Fjallabyggð dags. 20. júní 2022.

Lagt fram vinnuskjal deildarstjóra tæknideildar dags. 1. júlí 2022, í vinnuskjalinu óskar deildarstjóri heimildar bæjarráðs til að bjóða út eftirfarandi verkefni :

1. Eyrarflöt 14-20, gatna og veitugerð.
2. Umhverfisbætur á svæði vestan Óskarsbryggju.
3. Timburstígur með fram tjörninni, Ólafsfirði.

Lagður fram tölvupóstur frá Marteini B. Haraldssyni f.h. Seguls 67 Brugghúss dags. 28 júní 2022 þar sem kemur fram að í ljósi breytinga á áfengislögum nr. 75/1998 er varða heimild sölu áfengis í smásölu á framleiðslustað, sem taka gildi 1. júlí 2022 er hér með óskað eftir því að bæjarstjórn veiti Sunnu ehf., kt. 471289-2569 heimild til slíkrar sölu um leið og lagaheimildir munu liggja fyrir.

Erindi þetta er sent svo tryggja megi skjóta afgreiðslu bæjarstjórnar þegar ósk um umsögn berst bæjarstjórn frá Sýslumannsembætti.

Lagður fram tölvupóstur frá Veiðifélagi Ólafsfjarðar dags. 29. júní 2022 varðandi fundarboð framhaldsaðalfundar sem haldinn verður laugardaginn 9. júlí nk..

Lagður fram tölvupóstur frá Davíð Örvari Hanssyni dags. 30. júní 2022 f.h. Umhverfisstofnunar þar sem fram kemur að:

Sveitarfélögum er bent á ársfund náttúruverndarnefnda sem haldinn verður þann 10. nóvember næstkomandi.

Að undirbúningi fundarins koma, auk Umhverfisstofnunar, Samtök íslenskra sveitarfélaga og Samtök náttúrustofa.

Á fundinum verður m.a. farið yfir hlutverk náttúruverndarnefnda, fjallað um hlutverk Umhverfisstofnunar, Samtök íslenskra sveitarfélaga og Samtök náttúrustofa, auk þess að fjalla um náttúruverndarmál.

Sveitarfélög eru hvött til að taka daginn frá og senda fulltrúa sinna nefnda á fundinn.

Fyrir þá sem ekki komast verður fundinum streymt.

Lagt fram erindi frá Mikael Mikaelssyni dags. 26. júní 2022 þar sem fram kemur að Mikael vill vekja athygli bæjarráðs á að Veiðifélaginu vanti aðila frá bæjarfélaginu í stjórn þess.

Bæjarfélagið sé stór aðili og réttindahafi í félaginu og því eðlilegt að það taki þátt í stjórn þess.

Lagt fram erindi frá Þóri Stefánssyni dags. 27. júní 2022 vegna útboða og verkkaupa.

Í erindinu kemur fram að Þórir vilji kalla eftir upplýsingum um útboð verklegra framkvæmda hjá bæjarfélagi Fjallabyggðar á síðasta kjörtímabili.
Það er að segja hvernig þau hafa staðist áætlanir þegar aukaverk og allur kostnaður við verkin eru upp talin.
Einnig langar mig að vita hvernig hefur verið staðið að verkkaupum á viðhalds verkefnum hjá bæjarfélaginu, hvort þau séu alltaf unnin eftir innkaupareglu bæjarfélagsins.

Lagður fram til kynningar undirritaður ársreikningur Greiðrar leiðar ehf., vegna ársins 2021.

Lögð fram til kynningar fundargerð aðalfundar Veiðifélags Ólafsfjarðar ásamt ársreikningi fyrir árið 2021 og skýrslu stjórnar.

Lögð fram til kynningar fundargerð 910. fundar stjórnar sambands ísl. sveitarfélaga frá 20. maí sl. og fundargerð 911. fundar frá 23. júní sl..