Bæjarráð Fjallabyggðar

Á fundi bæjarráðs þann 17. apríl sl. var tekið fyrir erindi frá Starfsmannafélagi Fjallabyggðar, þar sem kemur fram að mismunur hafi verið á greiðslu fæðispeninga til starfsmanna íþróttamiðstöðvar Fjallabyggðar. Er farið fram á að mismunurinn verði leiðréttur þannig að þeir starfsmenn sem ekki fengu fæðispeninga á tilteknu tímabili fái þá greidda.

Bæjarráð óskaði eftir kostnaðarútreikningum auk þess sem lögfræðiálit frá lögfræðingi hjá Sambandi íslenskra sveitarfélaga og lögfræðingi sveitarfélagsins liggja fyrir.

Að þeim álitum fengnum samþykkir bæjarráð að fæðispeningar verði leiðréttir fjögur ár aftur í tímann í samræmi við lög. Kostnaðurinn kr. 2.300.000 færist af lið 21600-1110 og 21600-1890.

Tilboð voru opnuð í verkið "Ráðhús Fjallabyggðar, utanhússviðgerðir", mánudaginn 28. maí sl.

Eftirfarandi tilboð bárust:

L7 ehf - 7.274.145 kr.

Kostnaðaráætlun hljóðaði upp á 6.870.000 kr.

Bæjarráð samþykkir að taka tilboðinu.

Deildarstjóri tæknideildar óskar eftir heimild til að halda lokað útboð vegna framkvæmda við 2. áfanga leikskólalóðarinnar á Siglufirði.

Eftirfarandi verktökum yrði gefinn kostur á að bjóða í verkefnið:

Árni Helgason ehf.
Bás ehf.
Magnús Þorgeirsson ehf.
Smári ehf.
Sölvi Sölvason.

Bæjarráð samþykkir að veita heimild til lokaðs útboðs.

Tekin fyrir fyrirspurn sem aðstoðarskólastjóri Grunnskóla Fjallabyggðar sendir fyrir hönd nokkurra nemenda á Ólafsfirði, um hvort hægt sé að taka aftur í notkun hjólabrettapall sem var á grunnskólalóðinni á Siglufirði og færa hann yfir á skólalóð grunnskólans í Ólafsfirði.

Bæjarráð óskar eftir umsögn deildarstjóra tæknideildar og deildarstjóra fræðslu-, frístunda- og menningarmála.

Á síðasta fundi bæjarráðs var tekið fyrir erindi frá Foreldrafélagi Leifturs þar sem óskað var eftir styrk að upphæð 1.100.000 kr. vegna kaupa á ærslabelg sem staðsettur yrði í Ólafsfirði. Bæjarráð tók jákvætt í erindið og óskaði eftir umsögn deildarstjóra tæknideildar vegna mögulegrar staðsetningar.
Í umsögn deildarstjóra eru tvær staðsetningar mögulegar og leggur hann til að ærslabelgurinn verði staðsettur við íþróttamiðstöðina.

Bæjarráð þakkar framtakið og samþykkir að veita styrk til kaupa á ærslabelgnum og felur deildarstjóra afgreiðslu málsins. Kostnaður færist á liðinn “Ýmis smáverk á framkvæmdaráætlun" í fjárhagsáætlun 2018.

Stýrihópur um heilsueflandi samfélag fékk styrk úr Samfélags- og menningarsjóði Siglufjarðar til kaupa á ærslabelg sem staðsettur yrði í miðbæ Siglufjarðar. Styrkurinn nemur 1.750.000 kr. sem er kostnaðarverð við kaup á miðstærð. Áætlaður kostnaður við niðursetningu og frágang er um 500.000 kr. sem færður verður af liðnum " Ýmís smáverk á framkvæmdaráætlun" við fjárhagsáætlun 2018.

Bæjarráð fagnar því að styrkur hafi verið veittur til verkefnisins og óskar eftir umsögn deildarstjóra tæknideildar vegna mögulegrar staðsetningar.

Tekið fyrir erindi frá afmælisnefnd um aldarafmæli fullveldis Íslands. Nefndin hefur látið útbúa fána í tilefni af afmælinu og hvetur til almennrar notkunar á honum á afmælisárinu.

Bæjarráð samþykkir að keyptir verði fjórir fánar, að upphæð kr. 12.480 og felur deildarstjóra stjórnsýslu og fjármála afgreiðslu málsins.

Tekið fyrir erindi frá Norðurskógum, þar sem Fjallabyggð er tilkynnt um að í tilefni 100 ára kaupstaðarafmælis Siglufjarðar hafi félagið ákveðið að færa sveitarfélaginu að gjöf 100 tré af elri, ættuðum frá Alaska.

Bæjarráð þakkar höfðinglega gjöf og felur deildarstjóra tæknideildar afgreiðslu málsins.

Ársreikningur Síldarminjasafns Íslands ses. fyrir árið 2017 lagður fram til kynningar.

Allsherjar- og menntamálanefnd Alþingis sendir yður til umsagnar frumvarp til laga um persónuvernd og vinnslu persónuupplýsinga, 622. mál.

Bæjarráð vísar málinu til Sambands íslenskra sveitarfélaga.

Lagt fram til kynningar erindi frá Jafnréttisstofu þar sem sveitarstjórnir eru minntar á ákvæði laga nr. 10/2008 um jafna stöðu og jafnan rétt karla og kvenna sem lúta að skyldum sveitarfélaga.

Lögð fram beiðni frá Sýslumanninum á Norðurlandi eystra er varðar umsögn um vegna umsóknar um rekstrarleyfi Rauðku ehf kt. 500807-1210 til veitingu veitinga, Gránugötu 19, 580 Siglufirði.

Bæjarráð samþykkir umsóknina fyrir sitt leyti.

Bæjarstjóri lagði fram tillögu um skipan í starfshóp um búfjárhald.

Lagt er til að starfshópurinn skipi Egill Rögnvaldsson formaður, Jakob Agnarsson og Kjartan Ólafsson.

Bæjarráð samþykkir tillöguna og vísar tillögunni til afgreiðslu bæjarstjórnar.

Lögð fram til kynningar fundargerð fundar stjórnar Leyningsáss ses. sem haldinn var 11. maí sl.

Lögð fram til kynningar fundargerð 860. fundar stjórnar Sambands íslenskra sveitarfélaga sem haldinn var 18. maí sl.

Lagðar fram til kynningar fundargerð 46. fundar yfirkjörstjórnar Fjallabyggðar sem haldinn var 31. maí sl. og fundargerð skólanefndar TÁT sem haldinn var 18. júní sl.