Innsent erindi, tillaga til Landsþings Sambands íslenskra sveitarfélaga

Til máls tók Elías Pétursson bæjarstjóri.

Fyrir fundinn er lögð tillaga til landsþings Sambands Íslenskra sveitarfélaga ásamt tölvupóstum. Í tillögunni, sem 31 forsvarsaðili 20 sveitarfélaga rita undir, er lagt til að landsþing hafni lögfestingu lágmarksíbúafjölda sveitarfélaga.
Bæjarstjórn Fjallabyggðar tekur undir þau meginsjónarmið sem fram koma í framlagðri tillögu. Bæjarstjórn telur affarsælla að sameining sveitarfélaga eigi sér stað með lýðræðislegum hætti og að þar ráði vilji íbúa sem og geta sveitarfélags til að standa undir lögbundnum hlutverkum sínum. Hvort sem sveitarfélagið rækir lögbundin hlutverk sín eitt og sjálft eða í samstarfi með öðrum sveitarfélögum. Einnig telur bæjarstjórn nauðsynlegt að tekjustofnar sveitarfélaga verði styrktir og hlutverk sveitarfélaga sem og kröfur sem til þeirra eru gerðar af hálfu ríkisins verði skýrð þar sem það á við.

Bæjarstjórn samþykkir samhljóða með 7 atkvæðum framlagða bókun.