Fræðslu- og frístundanefnd Fjallabyggðar

Undir þessum lið sátu Erla Gunnlaugsdóttir skólastjóri Grunnskóla Fjallabyggðar, Halldóra María Elíasdóttir fulltrúi kennara og Hulda Teitsdóttir fulltrúi foreldra.
Skólastjóri fór yfir skýrslu um innra mat grunnskólans skólaárið 2021-2022. En innra mat skólans er unnið í samstarfi við Ásgarð ehf.
Fræðslu- og frístundanefnd þakkar kynningu á skýrslunni og vill koma á framfæri hrósi til starfsfólks grunnskólans fyrir vel unnið innra mat og skýrslu. Skýrslan verður birt til kynningar inn á vef grunnskólans og vef Fjallabyggðar.

Undir þessum lið sat Haukur Sigurðsson forstöðumaður Vinnuskóla Fjallabyggðar. Haukur fór yfir starfið í sumar. Óvenju fáir unglingar eða 34 samtals voru skráðir í skólann í sumar en fjöldinn var þó misjafn eftir vikum og mánuðum. Smíðaskólinn var opinn dagana 11 - 21. júlí og var þátttaka mjög góð.

Núgildandi reglur um úthlutun styrkja til fræðslumála lagðar fram til kynningar. Fræðslu- og frístundanefnd gerir ekki tillögur að breytingum reglnanna. Auglýst verður eftir umsóknum um fræðslustyrki í byrjun október.

Fræðslu- og frístundanefnd fór í skoðunarferð í nýtt húsnæði félagsmiðstöðvarinnar, Suðurgötu 2-4 Siglufirði. Deildarstjóri fræðslu-, frístunda- og menningarmála fór yfir stöðu framkvæmda í húsnæðinu. Framkvæmdum er ekki lokið og harmar fræðslu- og frístundanefnd það, en verklok voru áætluð fyrir skólabyrjun. Það verður því töf á upphafi starfs í félagsmiðstöðinni og vill nefndin biðja nemendur á unglingastigi grunnskólans afsökunar á því. Vonandi mun framkvæmdum ljúka sem allra fyrst.