Bæjarstjórn Fjallabyggðar

Bæjarstjóri lagði fram drög að samningi við Leigufélagið Bríeti ehf., drögin eru unnin í samræmi við bókun bæjarstjórnar á 212. fundi hennar. Einnig lagði bæjarstjóri fram viðauka nr. 10/2022 við fjárhagsáætlun 2022 vegna sölu umræddra 16 íbúða til félagsins. Heildaráhrif viðaukans eru þær að skuldir lækka um 150 millj.kr. Bókfærðar eignir íbúðasjóðs munu lækka um 38 millj.kr., hlutafjáreign mun hækka um 158 millj.kr. vegna eignarhlutar í Leigufélaginu Bríeti. Viðaukinn hefur ekki áhrif á handbært fé.

Bæjarstjóri lagði fram drög að ársreikningi 2021 ásamt fylgiskjölum, drögin voru samþykkt af bæjarráði á 740. fundi ráðsins 2. maí 2022 og vísað til umfjöllunar í bæjarstjórn í samræmi við samþykktir sveitarfélagsins.

Á fundinn kom kl.17:00, í fjarfundi, Þorsteinn Þorsteinsson endurskoðandi sveitarfélagsins og fór yfir helstu niðurstöður ársreiknings Fjallabyggðar fyrir árið 2021. Þorsteinn vék af fundi kl.17.52.

Rekstrarniðurstaða samstæðu (A og B-hluta) er neikvæð um 155 millj.kr. en var jákvæð um 77 millj.kr. 2020. Meginástæða verri afkomu er hækkun á lífeyrisskuldbindingum vegna ytri ákvarðana um breytingar á forsendum útreikninga. Ef ekki hefði komið til umræddrar hækkunar lífeyrisskuldbindingar þá hefði rekstrarniðurstaða samstæðu orðið jákvæð um 30 millj.kr. Rekstrarniðurstaða A-hluta er neikvæð um 184 millj.kr. en hefði verið í jafnvægi ef ekki hefði komið til óvæntrar hækkunar lífeyrisskuldbindingar. Fjárfestingar ársins námu 222 millj.kr. og engin ný lán voru tekin. Veltufé frá rekstri nam 331 millj.kr. eða 10.1% af tekjum en var 377 millj.kr. árið 2020 (12.1%). Handbært fé hækkaði um 53 millj.kr. á árinu og nam 413 millj.kr. í árslok, veltufjárhlutfall er 1,50.