Bæjarráð Fjallabyggðar

712. fundur 05. október 2021 kl. 12:00 - 13:00 í Ráðhúsi Fjallabyggðar, Gránugötu 24, Siglufirði
Nefndarmenn
  • Nanna Árnadóttir aðalmaður, I lista
  • Jón Valgeir Baldursson aðalmaður, H lista
  • S. Guðrún Hauksdóttir formaður, D lista
Starfsmenn
  • Guðrún Sif Guðbrandsdóttir deildarstjóri stjórnsýslu- og fjármála
Fundargerð ritaði: Guðrún Sif Guðbrandsdóttir deildarstjóri stjórnsýslu- og fjármála
Undir þessum lið sátu Tómas Atli Einarsson bæjarfulltrúi, Helga Helgadóttir bæjarfulltrúi, Guðrún Linda Rafnsdóttir bæjarfulltrúi og Helgi Jóhannsson bæjarfulltrúi. Einnig sátu undir þessum lið Ármann V. Sigurðsson deildarstjóri tæknideildar, Jóhann K. Jóhansson slökkviliðsstjóri og Birgir Ingimarsson bæjarverkstjóri.

1.Úrkoma á Ólafsfirði 2. - 3. október 2021

Málsnúmer 2110009Vakta málsnúmer

Farið var yfir stöðuna sem kom upp í Ólafsfirði þann 2. og 3. október sl.

Á laugardagskvöld 2. október var mikil rigning á Tröllaskaga. Samkvæmt upplýsingum frá Veðurstofu Íslands var úrkomumagn í Ólafsfirði 124mm þann sólarhringinn á móti 77mm á Siglufirði. Um nóttina var óvissustigi almannavarna lýst yfir á svæðinu. Síðdegis á laugardag fékk slökkvilið fyrstu tilkynningu um að vatn væri farið að flæða inn í hús á Ólafsfirði sem ágerðist þegar leið að miðnætti. Þegar varð ljóst að um stórt verkefni væri að ræða og voru Björgunarsveitin Tindur og Björgunarsveitin Strákar kallaðar út í verðmætabjörgun. Úrkoman og ákefðin var mikil alla nóttina og ef eitthvað er bætti í um tíma. Í fyrstu var talið að fráveitukerfi bæjarins væri ekki að standast áhlaup veðursins en síðar kom í ljós að lækur við Hornbrekku hafði flætt yfir bakka sína þar sem ræsi undir Ólafsfjarðarveg hafði ekki undan vatnsstraumnum sem venjulega fer beint í Ólafsfjarðarvatn. Því tók vatn að flæða inn að þéttbýli Ólafsfjarðar. Um leið og það uppgötvaðist var hægt að fara í aðgerðir við að koma vatni frá bænum og fékk þjónustumiðstöðin og slökkvilið stórvirka vinnuvél til þess að reisa varnargarða á tveimur stöðum. Þannig var hægt að vinna á því vatnsmagni sem þegar hafði flætt inn í bæinn.
Slökkvilið og björgunarsveitir unnu að aðgerðum í um 20 húsum í Ólafsfirði. Björgunarsveitir fengu aðstoð frá öðrum björgunarsveitum í Eyjafirði og slökkvilið fékk aðstoð frá Slökkviliði Dalvíkur og Slökkviliði Akureyrar. Aðgerðir stóðu í tæpan sólarhring.
Bæjarráð vill koma kærum þökkum til allra þeirra viðbragðsaðila sem unnu að aðgerðum báða þessa daga. Ljóst er að ef þeirra nyti ekki við hefði ástandið orðið mun verra. Einnig fá íbúar kærar þakkir fyrir dugnað og þolinmæði á meðan unnið var úr aðstæðum.

Verið er að skoða leiðir til úrbóta og bæjarráð óskar eftir umsögn deildarstjóra tæknideildar fyrir næsta fund ráðsins.
Undir þessum lið sátu Tómas Atli Einarsson bæjarfulltrúi, Helga Helgadóttir bæjarfulltrúi, Guðrún Linda Rafnsdóttir bæjarfulltrúi og Helgi Jóhannsson bæjarfulltrúi. Einnig sátu undir þessum lið Ármann V. Sigurðsson deildarstjóri tæknideildar, Jóhann K. Jóhansson slökkviliðsstjóri og Birgir Ingimarsson bæjarverkstjóri.

2.Úrkoma á Siglufirði 28. september 2021

Málsnúmer 2109085Vakta málsnúmer

Farið var yfir stöðuna sem kom upp á Siglufirði þann 28. september sl..

Á þriðjudag 28. september hlýnaði snögglega eftir snjókomu fyrr um daginn og nóttina sem var til þess að snjó leysti í mikilli rigningu og tók vatn að safnast fyrir í bænum.
Slökkvilið Fjallabyggðar, starfsmenn þjónustumiðstöðvar og Björgunarsveitin Strákar unnu hörðum höndum að því að koma fólki til aðstoðar þar sem vatn flæddi inn í hús á nokkrum stöðum.
Tveir af þremur dælubrunnum sem sinna fráveitukerfi bæjarins höfðu undan vatnselgnum en flöskuháls myndaðist við þriðja brunninn þar sem yfirfallslögn hafði ekki undan. Staðbundið vandamál skapaðist því á einu svæði.

Á 711. fundi bæjarráðs þann 30. september sl. var óskað eftir umsögn frá deildarstjóra tæknideildar.

Lagt fram vinnuskjal deildarstjóra tæknideildar dags. 4. október 2021 þar sem farið er yfir tillögur að úrbótum.





Bæjarráð vill koma kærum þökkum til allra þeirra viðbragðsaðila sem unnu að aðgerðum. Ljóst er að ef þeirra nyti ekki við hefði ástandið orðið mun verra. Einnig fá íbúar kærar þakkir fyrir dugnað og þolinmæði á meðan unnið var úr aðstæðum.

Bæjarráð óskar eftir að deildarstjóri tæknideildar komi með kostnaðarmat á úrbótum sem hægt er framkvæma strax og vísar frekari úrbótum til gerðar fjárhagsáætlunar 2022.

Fundi slitið - kl. 13:00.