Bæjarráð Fjallabyggðar

Lagt er fram minnisblað deildarstjóra fræðslu-, frístunda- og menningarmála dags. 7. september sl.. Í minnisblaðinu óskar deildarstjóri heimildar til útboðs á ræstingu Leikskóla Fjallabyggðar, annars vegar Leikhóla Ólafsfirði og hins vegar Leikskála Siglufirði. Í minnisblaðinu kemur einnig fram að báðir samningar renni út á yfirstandandi ári, byggt á núverandi samningsfjárhæðum, og að líkleg samningsfjárhæð muni í báðum tilvikum vera yfir viðmiðunarfjárhæð innkaupareglna Fjallabyggðar um útboðsskyldu. Að síðustu er lagt til að um tvö aðskilin útboð verði að ræða, annar svegar fyrir Leikhólum með samningstíma 15.11.2021-14.11.2024 og hins vegar í Leikskálum með samningstíma 1.1.2022 - 31.12.2024.

Lagt er fram vinnuskjal deildarstjóra fræðslu-, frístunda- og menningarmála dags. 8. september sl.. Í minnisblaðinu óskar deildarstjóri heimildar til undirritunar leigusamnings vegna leigu á neðri hæð Lækjargötu 8, Siglufirði fyrir starfsemi félagsmiðstöðvarinnar Neon til 31. desember 2021. Um er að ræða sambærilegan samning og hefur verið í gildi og rúmast hann innan gildandi fjárheimilda. Einnig eru fram lögð drög að leigusamningi.

Lögð er fram umsögn deildarstjóra fræðslu-, frístunda- og menningarmála dags. 8. september sl.. Umsögnin er unnin í samræmi við ósk bæjarráðs þar um, á 705. fundi ráðsins. Í umsögn deildarstjóra er lagt til að Berjadögum verði veittur hluti úthlutaðs styrks til hátíðarhalda 2021, þó ekki meira en helming þess er úthlutað var.

Lagðar eru fram endurskoðaðar útlánareglur Listasafns Fjallabyggðar.

Lagt er fram minnisblað deildarstjóra fræðslu-, frístunda- og menningarmála og markaðs- og menningarfulltrúa dags. 7. september sl.. Í minnisblaðinu er lagt til í ljósi reglna um samkomur og sóttvarnir að árshátíð starfsmanna Fjallabyggðar sem halda átti 2. október nk. verði aflýst. Ný dagsetning árshátíðar verði 5. mars 2022. Einnig er lagt til að í stað árshátíðar verði fjármagn sem ætlað er í fjárheimildum ársins 2021 til árshátíðarhalds nýtt til að gera jólagjöf starfsmanna veglegri í ár líkt og gert var á síðasta ári.

Bæjarstjóri fór yfir vinnu undanfarinna vikna, viðræður sem hann átti við heilbrigðisráðherra og þá niðurstöðu ráðherra að fela Sjúkratryggingum Íslands að semja við Fjallabyggð um möguleika á sveigjanlegri dagdvöl og dagþjálfun fyrir einstaklinga með heilabilun og aðra sem þarfnast endurhæfingar.

Lagt er fram erindi veiðifélags Ólafsfjarðar dags. 5. september sl.. Í erindinu er annars vegar óskað upplýsinga um stöðu mála er varða hækkað vatnsborð Ólafsfjarðarvatns, hins vegar er óskað eftir því að Fjallabyggð greiði kostnað vegna fjarlægingar brúar yfir Fjarðará í landi Kálfsár og Þóroddsstaða.

Lagt er fram erindi KF dags. 10. september 2021. Í erindinu er annars vegar þess krafist að bæjarráð fresti fyrirhuguðum framkvæmdum á Ólafsfjarðarvelli fram yfir kosningar jafnframt lýsa forsvarsmenn KF því yfir að þeir séu tilbúnir að mæta til fundar við bæjarráð. Að síðustu óska forsvarsmenn KF að fá að leggja fram upplýsingar sem þeir telja að sýni fram á lægri rekstrarkostnað en fram kemur í minnisblaði EFLU verkfræðistofu.

Lagðar eru fram til kynningar fundargerð 102. fundar Fræðslu- og frístundanefndar Fjallabyggðar og 133. fundar Félagsmálanefndar Fjallabyggðar.